Abraham ne Abimelek
1 Abraham ur gin Mamre kal ge fah morkǝsǝŋ pǝ sǝr Kanaan, kaa kǝsyil Kades ne Sur, so ee ge kaa yaŋ Gerar. 2 Abraham a faa mawin ah Sara naa ma 'min o. Mor ah Abimelek goŋ Gerar pepee ge ɓaŋ Sara. 3 Amma Masǝŋ ge wo Abimelek ne lom ne suŋ faa nyi ko: Ɓǝ mawin mai mo ɓaŋ ɓo mo ga wuu, mor mawin ah a no ne worre. 4 Ka Abimelek ɓah kaa ne ki ya ba, faa: Dǝɓlii ɓe, mo ga ik za matǝ njaŋ tǝ ɓǝ mai ne? 5 Mor Abraham ne suu ah faa nyi me, Sara naa ma 'min o, Sara laŋ so faa Abraham naa ma 'min o. Me joŋ fan ah ɓo bai tan ɓǝ ahe, me joŋ faɓe' ah ɓo ka kee ya. 6 So Masǝŋ faa nyi ko ne lom faɗa: Me tǝ ɓe, mo joŋ fan ah bai ɓǝɓe' pǝ zahzyil ɓo, mor ah ame ye cak mo ka mo joŋ faɓe' wo ɓe ka, ko me nyi fahlii joŋ ah mo ya ko. 7 Mo nyi mawin dǝɓ ah nyi ko zǝzǝ̃ǝko, mor ako ye profeto Masǝŋ, a ga juupel mor ɓo ka mo wǝ ka. Amma mo jin ge nyi ya ɓe, ka mo tǝ, mo ga wuu 'manna 'manna, amo tǝkine za ɓo daŋ.
8 Abimelek ur ne zah'nan pim ɗii za yeɓ ah kee ɓǝ ah daŋ nyi ra. Zan ah ɗuura gal pǝlli. 9 So Abimelek ɗii Abraham faa nyi ko: Me joŋ faɓe' fẽe wo ɓo ka mo 'nam ɓǝɓe' malii mai ge tǝ ɓe tǝkine goŋ ɓe daŋ ne? Mo joŋ fan mai dǝfuu mo ka joŋ wo ki ya ɓo wo ɓe. 10 So Abimelek faa nyi Abraham faɗa: Mo foo ka joŋ fan mai sye kpak ɗǝne? 11 Abraham zyii faa: Mor me foo, ɗul Masǝŋ ka pǝ cok mai ya, a ga ira me mor mawin ɓe. 12 Kal daŋ ah ako ye naa pa ɓe 'manna, mǝlaŋ pa ɓe yo, amma ma ɓuu ka tǝki ya. So ciŋ mawin ɓe ɓo. 13 Ne cok Masǝŋ mo ɗii me gin yaŋ pa ɓe ka me kyãhe, me faa nyi Sara: Gboŋgboŋ mai mo ga joŋ wo ɓe mo yea naiko: cok daŋ na ge gŋ ɓe, mo faa ame ye naa ma ɓo.
14 Abimelek woo gwii ne dǝǝ tǝkine za yeɓ mawǝǝ ne maŋwǝǝ daŋ nyi nyi Abraham, jin mawin ah Sara nyi ko ta. 15 So Abimelek faa nyi ko: Mo laa ɓe, sǝr ɓe no pel ɓo, mo kaa pǝ cok makẽne mo 'nyah suu ɓo daŋ. 16 So faa nyi Sara: Mo kwo ɓe, me nyi vãm solai nyi naa pa ɓo ujenere ka ɓǝ ah mo yea wo ɓo pel za mo joŋ faɓe' ya .
17 So Abraham pǝǝ Masǝŋ, Masǝŋ laŋ laɓ Abimelek ne mawin ah tǝkine ŋwǝǝ ma joŋ yeɓ yaŋ ah mor ka mo bemra weere. 18 Mor Dǝɓlii cwãh zah byaŋ ŋwǝǝ ma piicel Abimelek ɓo daŋ tǝ ɓǝ Sara mawin Abraham.
© Bible Moundang © Alliance Biblique du Tchad, 1996.
