Isak lwaa mawin kanne
1 Abraham tam ɓe, joŋ syii pǝlli ɓe. Masǝŋ ẽe Abraham ne fan daŋ. 2 Abraham faa nyi dǝɓ yeɓ ah mai ako ye mo dǝɓlii yaŋ ahe, mai fan ah daŋ mo jol ahe: Mo maa jol ɓo ge mor ɓe , 3 me ga joŋ mo haa zah ne Dǝɓlii Masǝŋ ma coksǝŋ tǝkine sǝrri, mor ka mo ɓaŋ mawin nyi we ɓe kǝsyil wee ŋwǝǝ Kanaanien mai me kaa ɓo gŋ ka. 4 Amma mo ge sǝr ɓe, tǝgǝǝ zum ɓe, ka mo ɓaŋ ŋwǝǝ nyi we ɓe Isak gŋ. 5 Dǝɓ yeɓ ah faa nyi ko: Ko mawin mo zyii ka gin sǝr mai ne me ya ɓe, ka me pii soo ge sǝr mai mo pǝ̃ǝ gin gŋ ne we ɓo ne? 6 Abraham faa nyi ko: Mo joŋ yella ka mo pii soo ge ŋhaa ne we ɓe ka. 7 Dǝɓlii Masǝŋ ma coksǝŋ mai mo joŋ ka me pǝ̃ǝ gin yaŋ pa ɓe ne sǝr byaŋ ɓe, ako ye faa nyi me ne haa zah nyi me faa sye: Me ga nyi sǝr mai nyi wee ɓǝr ɓo. A ga pee pa pee ma coksǝŋ pel ɓo ka mo ɓaŋ ŋwǝǝ nyi we ɓe gŋ. 8 Amma mawin ah mo zyii ka gin ne mo ya ɓe, ka haazah ɓe wǝǝ gin tǝ ɓo ɓe, amma ka mo pii soo ge ŋhaa ne we ɓe ka. 9 Dǝɓ yeɓ maa jol ah ge mor dǝɓlii ah Abraham, haa zah nyi ko tǝ ɓǝ ahe.
10 So dǝɓ yeɓ ŋgee njoŋnjoŋ jemma kǝsyil njoŋnjoŋ dǝɓlii ahe, ur kal ne ko tǝkine zah fan sãh dǝɓlii ah mo jol ah camcam daŋ, kal ge yaŋ mai Nakor mo yea kaa ɓo gŋ pǝ sǝr Mesopotamia. 11 Ne cok mo ge dai gŋ, joŋ njoŋnjoŋ ah ka mo keara ge sǝŋ zahgooyaŋ lal gwari ne zah lak bii, ne cok com lil ne com mai ŋwǝǝ moo pǝ̃ǝra gin bea bii ne ko. 12 So faa: Masǝŋ, Dǝɓlii pah yaŋ ɓe Abraham, me pǝǝ mo, mo zyeɓ fahlii gwǝǝ ɓe tǝ'nahko. Mo joŋ gboŋgboŋ wo pah yaŋ ɓe Abraham sa. 13 Mo ẽe me uu ɓo zah lak bii nyeeno, wee ŋwǝǝ za yaŋ ah ga pǝ̃ǝra ka gin bea bii. 14 Ka mǝlaŋ mai me ga faa nyi ko, mo ɗǝŋ zah daŋ ɓo me ka me zwǝ bii ah sa, ka mo faako nyi me, mo zwǝ o, me ga nyi njoŋnjoŋ ɓo ra zwah ta, ka ako ye mo yea mǝlaŋ mai mo nǝǝ ɓo mor dǝɓ yeɓ ɓo Isak. Nai ɓe me ga tǝ, mo joŋ gboŋgboŋ wo dǝɓlii ɓe ɓe.
15 Vǝr ɓǝ faa ah ya ba, kwo Rebeka mǝlaŋ Betuel we Milka mawin Nakor naa mah Abraham pǝ̃ǝ kan daŋ ɓo tǝbǝǝsahe. 16 Mǝlaŋ ah pǝsãh no cam, woi yo, za wǝǝ tǝ ko ya ba. Ɗǝr ge zah bii, bee bii ge pǝ daŋ ahe, so yeeni. 17 Dǝɓ yeɓ Abraham ɗuu ge zyaŋ tǝl ah faa: Me pǝǝ mo, mo nyi bii pǝ daŋ ɓo me zwǝ sa. 18 Zyii faa: Mo zwǝ o dǝɓlii. So hǝǝ gaŋ ɗǝr daŋ ah gin tǝbǝǝsah ge jolle, so nyi ko zwǝ. 19 Ne cok mo nyi bii nyi ko zwǝ, so faa: Me ga bea nyi njoŋnjoŋ ɓo ra ka mo zwahra kǝ̃ǝ ta. 20 Hǝǝ gwari dǝǝ bii pǝ daŋ ah ge pǝ dahe. Ɗuu kal ge zah lak bii ka beeni, so bea mor njoŋnjoŋ ah ra daŋ. 21 Dǝɓ ah mo kwo nai so kaa gǝriŋ faa ɓǝ ki ya. A 'yah ka ẽere, ɗah Masǝŋ nyi fan gwǝǝ mai mo geko mor ah nyi ko ɓe ye nyẽe ne? Wala nyi ya ne?
22 Ne cok njoŋnjoŋ mo zwahra bii vǝrri, dǝɓ ah ɓaŋ tǝgaa vãm kaŋnyeeri masãhe, maa ge võo ahe, so woo fan zahkpẽm jol maluu gwa nyi ko. 23 So faa nyi ko: Mo zyii zah ɓe sa. Amo ye mǝlaŋ zune? Cok swul no yaŋ pa ɓo ka ru swah gŋ ne? 24 Rebeka zyii faa: Ame mǝlaŋ Betuel, we Milka mai mo byaŋ ne Nakor. 25 So faa: Zahwom ne ŋwǝrãi no yaŋ pa ɓe pǝlli, cok swul no gŋ ta. 26 So dǝɓ ah ɗǝŋ ge sǝŋ juupel wo Masǝŋ faa: 27 Osoko wo Masǝŋ, Dǝɓlii pah yaŋ ɓe Abraham, mo soɓ joŋ gboŋgboŋ ah tǝkine ɓǝ sãh ah wo dǝɓlii ɓe ya. Masǝŋ syee ne me tǝ fahlii ŋhaa ge dai yaŋ wee pah dǝɓlii ɓe ne me.
28 Mǝlaŋ ɗuu ge kee ɓǝ ah nyi mamme. 29-30 Rebeka no ne naa mam pǝworre, a ɗii ne Laban. Laa ɓǝ mai Rebeka mo kee nyi ra, tǝkine ɓǝ mai dǝɓ yeɓ Abraham mo faa nyi ko daŋ, so kwo tǝgaa ne fan zahkpem jol mo zahkpem jol naa mah ahe. So Laban pǝ̃ǝ ɗuu kal ge wo dǝɓ ah ka uu ɓo kah njoŋnjoŋ ah ra zah lak bii. 31 Faa nyi ko: Mo ge o, na ge yaŋ ɓe. Amo ye dǝɓ mai Masǝŋ mo ẽe ɓo. Mo uu lal mor fẽene? Ame zyeɓ yaŋ tǝkine cok mor njoŋnjoŋ daŋ ɓe.
32 Dǝɓ ah kal ge yaŋ ne ki, so Laban ɗǝr fan tǝ njoŋnjoŋ ge sǝŋ, nyi wom nyi njoŋnjoŋ ne ŋwǝrãi daŋ. Nyi bii vãh ɓal nyi ko tǝkine za mai mo ne ki daŋ. 33 Kanra farel pel ɓǝǝ ka renne, amma dǝɓ ah faa: Me ka re fan a, sai ka me faa ɓǝ mai me ge ne ka faa ɓe. Laban zyii faa: Mo faa o.
34 So tǝŋ ɓǝ faa: Ame dǝɓ yeɓ Abraham. 35 Masǝŋ ẽe pah yaŋ ɓe pǝlli, a ne joŋ no cam. Nyi faɓal manyee tǝkine maluu daŋ nyi ko, ne vãm solai, vãm kaŋnyeeri, tǝkine za yeɓ mawǝǝ ne maŋwǝǝre, njoŋnjoŋ tǝkine korro daŋ. 36 So Sara mawin pah yaŋ ɓe byaŋ we nyi ko ne syii tam ahe, so pah yaŋ ɓe soɓ fan mai mo ne daŋ nyi wel ahe. 37 Dǝɓlii ɓe haa zah nyi me faa: Mo ɓaŋ win nyi we ɓe kǝsyil Kanaanien mai me kaa ɓo sǝr ɓǝǝ ka. 38 Amma mo ge yaŋ pa ɓe kǝsyil zum ɓe, mo ɓaŋ mawin nyi we ɓe gŋ. 39 Me faa nyi dǝɓlii ɓe: Ko mawin ah mo zyii ka gin ne me ya ɓe ɗǝne? 40 Zyii faa nyi me: Masǝŋ mai mee syee mor ah a ga pee pa pee ah ma coksǝŋ ga ne mo, a ga zyeɓ fahlii gwǝǝ ɓo mor ka mo ɓaŋ win nyi we ɓe kǝsyil zum ɓe sǝr pa ɓe. 41 Ne cok mo ge dai zum ɓe ra ɓe, ka ɓǝ haazah ɓe wǝǝ gin tǝ ɓo ɓe, koo mo nyira nyi mo ya laŋ, ka ɓǝ haazah ɓe wǝǝ tǝ ɓo ɓe.
42 Mor ah me ge dai zah lak bii mai tǝ'nahko, me faa: Masǝŋ, Dǝɓlii pah yaŋ ɓe Abraham, mo 'yah zyeɓ fahlii gwǝǝ ɓe me tǝ ga ɓe, 43 me uu ɓo zah lak bii nyẽeno, ka woi yaŋ ah mo pǝ̃ǝ ka gin bee bii ɓe, ka me faa nyi ko mo nyi bii pǝ daŋ ɓo me zwǝ sa ɓe, 44 ka mo zyii faako nyi me, mo zwǝ o, me ga bea nyi njoŋnjoŋ ɓo ra ta, ka mo yeako mawin mai Masǝŋ mo nǝǝ ɓo mor we pah yaŋ ɓe. 45 Me ɓah vǝr ɓǝ mai pǝ zahzyil ɓe ya ba, Rebeka pǝ̃ǝ, kan daŋ ah ɓo tǝbǝǝsahe. Ge ɗǝr daŋ zahbii, so bee. Me faa nyi ko: Mo nyi me zwǝ sa. 46 Ɗǝr daŋ ah gin tǝbǝǝsah gwari faa: Mo zwǝ o, me ga nyi nyi njoŋnjoŋ ɓo ra zwah ta. 47 Me fii ko: Amo mǝlaŋ zune? Zyii faa: Ame mǝlaŋ Betuel we Nakor mai mo byaŋ ne Milka. So me maa tǝgaa ge võo, me maa fan zahkpem jol ge nyi jolle. 48 So me ɗǝŋ ge sǝŋ, me juupel wo Masǝŋ, me joŋ osoko nyi Masǝŋ Dǝɓlii pah yaŋ ɓe Abraham mai mo syee ne me tǝ fahlii masãhe, ŋhaa ka me ɓaŋ mǝlaŋ naa pah dǝɓlii ɓe mor wel ahe. 49 Zǝzǝ̃ǝko we 'yah joŋ gboŋgboŋ tǝkine ɓǝ sãh wo dǝɓlii ɓe ɓe, we faa nyi me, we joŋ ya laŋ, ka we faa nyi me ta, mor ka me pii soo, koo mee joŋ ɗǝne daŋ, me joŋ ba.
50 So Laban ne Betuel zyiira faa: Ɓǝ mai gee wo Masǝŋ ge, ru ka gak faa ɓǝ ki tǝl ah ya. 51 Rebeka no pel ɓo, mo ɓaŋ o, mo ge ne ki jam ka mo yeako mawin we dǝɓlii ɓo tǝgbana Masǝŋ mo faa.
52 Ne cok dǝɓ yeɓ Abraham mo laa ɓǝ faa ɓǝǝ naiko, ɗǝŋ ge sǝŋ juupel wo Masǝŋ. 53 So woo fan sãh camcam ma ne vãm solai, vãm kaŋnyeeri tǝkine mbǝro daŋ nyi Rebeka. Nyi fan masãh ah nyi naa mah ah tǝkine mah ah ta.
54 Fahfal ah ako ne za mai mo gera ne ki daŋ rera farelle, zwahra fanne, so swahra sǝŋ. Ne cok mo urra ne zah'nanne, dǝɓ yeɓ Abraham faa: We soɓ me pii soo ge wo pah yaŋ ɓe o. 55 So naa mah Rebeka tǝkine mah ah faara: Mo soɓ mǝlaŋ kaa ne ru zah'nan nje wala jemma vaŋno ɗao ka we kal ba. 56 Amma zyii faa nyi ra: We 'nam zah'nan nyi me kao, mor Masǝŋ zyeɓ gwǝǝ ɓe ɓe. We soɓ me pii soo ge wo pah yaŋ ɓe o. 57 Faara: Na ɗii mǝlaŋ ka na fii ko. 58 So ɗiira Rebeka, faara nyi ko: Mo 'yah ga ne dǝɓ mai no ne? Rebeka zyii faa: Me ganne. 59 Za yaŋ ah nyira fahlii nyi naa ma ɓǝǝ Rebeka ne mawin ma wol ko tǝkine dǝɓ yeɓ Abraham ne za ma ne ki daŋ. 60 Ẽera Rebeka, faara nyi ko: Naa ma ɓuuru, mo ga ciŋ mah za ujenere jemma zahlǝŋ ujenere, wee ɓǝr ɓo ga kaa swah tǝ za syiŋ ɓǝǝra. 61 Rebeka ur ne za yeɓ ah maŋwǝǝ, yeera njoŋnjoŋ ka ga ne dǝɓ yeɓ Abraham, so ɓaŋra fahlii kalle.
62 Ne cok ah ka Isak kaa ɓo sǝr Kanaan ne fah morkǝsǝŋ ah pǝ cok ma ɗii ne Lak Bii Lahai-Roi, a kǝsyicokki. 63 Ne cok lil Isak ge ɓo 'wah ka kyãh gŋ foo ɓǝ, ɓaŋ nahnǝn ahe, kwo njoŋnjoŋ tǝ ginra. 64 Rebeka laŋ ɓaŋ nahnǝn ahe, kwo Isak, zoo gin tǝ njoŋnjoŋ tǝ ge sǝŋ gwari. 65 Faa nyi dǝɓ yeɓ Abraham: Dǝɓ mai mo tǝ gin pǝ 'wah ka zyaŋ tǝ man ŋhaa zu ye ne? So dǝɓ yeɓ faa nyi ko: Pah yaŋ ɓe yo. Mo laa nai, so ɓaŋ godel ah jǝŋ ge tǝtǝlli.
66 Dǝɓ yeɓ ge kee ɓǝ fan mai mo joŋ daŋ nyi Isak. 67 Isak ɓaŋ Rebeka ge pǝ yaŋ mah ah Sara ne ko, kan ko, a 'yah ko pǝlli. Zahzyil Isak so wuu fahfal wul mah ah o.
© Bible Moundang © Alliance Biblique du Tchad, 1996.
