Ɓǝ tahsah mai mo muŋ
1 So Yuseɓ faa nyi wakiili ahe: Mo woo farel bar dah za rai nǝn korro ɓǝǝ moo gak ɓaŋ, ka mo so maa lak zune daŋ ge nyi zah dah ahe. 2 Mo maa tahsah ɓe ma vãm solai ge zah dah kahkǝr tǝkine lak lee sor ah daŋ. Dǝɓ ah joŋ tǝgbana Yuseɓ mo faa nyi ko. 3 Zah'nan mo cee o, nyira fahlii nyi za rai ne korro ɓǝǝ daŋ. 4 Ne cok mo pǝ̃ǝra gin tǝgǝǝ yaŋ, ka ara ka pǝɗǝk ya ba, Yuseɓ faa nyi wakiili ahe: Mo ur mo ɗuu ge mor zai, mo lwaa ra ɓe, mo faa nyi ra: We so soo ɓǝ sãh ne ɓǝɓe' mor fẽene? 5 Fan mai dǝɓlii ɓe moo zwan fan gŋ ne mai moo ẽe fan ma ga joŋ pel gŋ ye ka ne ? Fan mai we joŋ ɓo nyeeko we joŋ faɓe' ɓe.
6 Ne cok wakiili mo ge dai mor ɓǝǝra, faa ɓǝ nyẽe nyi ra. 7 So faara nyi ko: Dǝɓlii ɓuu faa ɓǝ mai nai mor fẽene? Masǝŋ mo cak byak ɓo ra ne fahlii ka joŋ fan ma morãiko. 8 Mo ẽe lak mai ru lwaa zah dah korro ɓuu ru woo gin sǝr Kanaan gee mo ne ko. A so joŋ ɗii ka ru kiŋ vãm solai wala vãm kaŋnyeeri yaŋ dǝɓlii ɓo ne? 9 Dǝɓ mai moo ga lwaa tahsah jol ah kǝsyil ɓuuru, a ga wuu. Aru laŋ ru ga ciŋ byak dǝɓlii ɓo. 10 So faa: Pǝsãhe, ɓǝ ah mo yea tǝgbana ɓǝ faa zah ɓiiri, dǝɓ mai dǝɓ moo ga lwaa tahsah jol ah a ga ciŋ byak ɓe, amma tǝcoŋ ɓii we ga yaŋ. 11 Hǝǝra ɗǝr dah korro ɓǝǝ ge sǝŋ gwari. Zune daŋ wǝǝ zah dah ahe. 12 Wakiili kal ne mgbai ahe. Tǝŋ gin tǝ welii ŋhaa ge vǝr tǝ kahkǝrri, ge lwaara tahsah ah pǝ dah Benyaamin. 13 Ɓǝ ah nǝǝ zahzyil ɓǝǝ pǝlli, so ŋgǝ̃ǝra mbǝro ɓǝǝra, zune daŋ ɓaŋ dah ge tǝ korro ahe, pii soora ge tǝgǝǝ yaŋ.
14 Yuda ne wee pah ah danra ge yaŋ Yuseɓ, ka Yuseɓ no yaŋ ba. Keara ge sǝŋ pel ahe. 15 Yuseɓ fii ra: Yeɓ fẽe we joŋ ɓii ko ne? We tǝ sõone dǝɓ ma na me a tan fan mai mo ga joŋ pel a ne? 16 Yuda zyii faa: Ru so faa ɓǝ fẽe nyi dǝɓlii ɓuu ne? Ru ga faa ɗǝne? Ru so ga cuu suu ɓuu na za tǝ njaŋ ne fẽene? Masǝŋ joo faɓe' ɓuu ɓe. Aru daŋ ru ciŋ byak dǝɓlii ɓuu ɓe, aru tǝkine dǝɓ mai mo lwaara tahsah jol ah daŋ. 17 Yuseɓ zyii faa: Masǝŋ mo cak me ne joŋ ah naiko. Dǝɓ mai mo lwaara tahsah jol ah ye ga ciŋ byak ɓe. Amma tǝcoŋ ɓii we pii soo ge wo pa ɓii jam.
Yuda pǝǝ Yuseɓ mor Benyaamin
18 So Yuda tǝɓ ge wo Yuseɓ, faa: Oseni dǝɓlii, mo soɓ me faa ɓǝ nyi mo vaŋno ɗao, mo ɓaŋ kpãh tǝ ɓe ka, mor amo tǝgbana Farao. 19 Dǝɓlii ɓe, mo fii ru mo faa: Pa ɓii no ne? Wala naa pa ɓii maki ah no ne? 20 Ru zyii zah dǝɓlii ɓuu faa: Ru no ne pa ɓuuru, tam ɓe, we maki ah no pǝlaŋne, ako byaŋ tǝ tamme. Naa mah wel ah wǝ ɓe. Ako coŋ ɓo mor mah ah syak ahe. Pa ɓuu laŋ a 'yah ko pǝlli. 21 So mo faa nyi ru: We gee me ne ka me ẽe ne nahnǝn ɓe ɗǝ. 22 Ru zyii zah ɓo ru faa: We nyẽe ka gak soɓ pam ya, amma mo soɓ pam ɓe, pah ah ga wuu. 23 So mo faa nyi ru: Naa pa ɓii malaŋ mo ge ne we ya ɓe, we ka fǝ̃ǝ ge pel ɓe yao. 24 Ne cok ru ge wo pa ɓuuru, ru kee ɓǝ zah ɓo nyi ko. 25 Pa ɓuu so faa: We pii soo ge lee farel mor man biŋ ɗǝ. 26 Amma ru zyii faa: Ru ka gak gan a. Naa pa ɓuu malaŋ moo ga ne ru ɓe, ru ganne. Amma mo geko ne ru ya ɓe, ru ka gak ga pel dǝɓ ah ya. 27 So pa ɓuu faa nyi ru: We tǝ, mawin ɓe bem wee wǝǝ ne me gwa. 28 Maki ah pǝ̃ǝ gin wo ɓe kalle, me faa 'manna fafyãh gbǝ ko ɓe. Mor me so kwo nahnǝn ah taa yao ŋhaa tǝ'nahko. 29 We ɓaŋ mai jol ɓe faɗa ɓe, so ɓǝɓe' mo ge lwaa ko ɓe, ɓǝ ah ga joŋ me wǝ gwari. 30 Zǝzǝ̃ǝko ru pii soo ge wo pa ɓe, so we nyẽe cee ɓǝǝ mo ge ɓo tǝki mo ka ne ru ya ɓe, 31 a ga wuu. Ka aru laŋ ru ga joŋ pa ɓuu wǝ gwari 'manna. 32 Mor ame zyii zah pa ɓe tǝ ɓǝ we nyẽe faa: Me pii soo ge mo ne ya ɓe, ka me yea wo ɓo na pa joŋ ɓǝɓe' zah'nan Masǝŋ daŋ. 33 Amma zǝzǝ̃ǝko pǝram mo soɓ byak ɓo kaa pǝ cok wee ko, ka mǝ ah mo piiko soo ge yaŋ ne wee pah ah o. 34 We nyẽe mo ka ne me ya ɓe, me pii soo ga wo pa ɓe suu ɗǝne? Me 'yah me kwo ɓǝ gaɓ mai mo ga ge tǝ pa ɓe ya.
© Bible Moundang © Alliance Biblique du Tchad, 1996.
