1 Ɓǝ lai Yahuduen byaŋ fan ah matǝ goŋga ye ka sǝ ya, amma a na cee fan sãh mai mo tǝ ginni. Ɓǝ lai ka gak joŋ za mai moo ginra pel Masǝŋ njaŋ ya. Syiŋ mai moo joŋra a joŋ zan ah njaŋ ɗii ko a so joŋra syii daŋ bai in zah ne? 2 Kǝnah za mai moo ginra pel Masǝŋ ne syiŋ ah faɓe' ɓǝǝ mo nǝǝ ge ɓo lal ɓe, ka so foora ɓǝ faɓe' ɓǝǝ vaŋno laŋ yao, a soɓra kǝnah fahlii joŋ syiŋ daŋ o. 3 Amma syiŋ ah moo joŋra syii daŋ, a foora ɓǝ faɓe' ɓǝǝ ne ko. 4 Mor syim wǝǝ dǝǝ ne syim kǝdai ka gak ɓaŋ faɓe' ga lal a.
5 Mor ahe, ne cok mai Kristu mo tǝ ga ge wo sǝrri, faa nyi Masǝŋ:
Nyi fan tǝkine ŋgom fan joŋ syiŋ ne ko mo 'yah ya,
Amma amo zyeɓ suu nyi me.
6 Mo ka ne 'yah ka mo joŋra syiŋ suŋwii wo ɓo ne faɓal tǝkine joŋ syiŋ ma ɓaŋ faɓe' ga lal ya.
7 So me faa: Masǝŋ ame nyẽeno, me ge ɓo ka joŋ fan mai mo 'yahe,
Tǝgbana mai ɓǝ ah mo ŋwǝǝ ɓo tǝ ɓe pǝ ɗerewol ɓǝ lai.
8 Kǝpel ah faa: Mo 'yah joŋ syiŋrĩ, ne fan nyi tǝkine ŋgom faɓal tǝǝ syiŋ suŋwii ne tǝ cok joŋ syiŋ tǝkine syiŋ ma ɓaŋ faɓe' ga lal ya. Koo mo tǝ joŋra tǝgbana mai ɓǝ lai ye mo cuu fahlii ah ɓo laŋ, mo ka tǝ laa pǝ'nyah ne ya. 9 So faa: Masǝŋ, ame nyẽeno, me ge ɓo ka joŋ fan mai mo 'yah me joŋ. Masǝŋ ɓaŋ ɓǝ joŋ syiŋ ma kǝpel daŋ ge lalle, so kan syiŋ mǝ Kristu ge pǝ cok ahe. 10 Mor Yesu Kristu ge joŋ fan mai Masǝŋ mo 'yah mo joŋko, faɓe' man vãh ge ɓo lal mor syiŋ mai mo joŋ ne suu ah ɓal vaŋno sǝ mor ga lii.
11 Pa joŋzahsyiŋ Yahuduen daŋ a ur ga uu pǝ yeɓ ah a joŋ zah'nan daŋ, a joŋ syiŋ matǝ vaŋno ko cẽecẽe. Amma so syiŋ ah ka gak ɓaŋ faɓe' ga lal a syaŋsyaŋ. 12 Amma Kristu ge joŋ syiŋ mor faɓe' ɓal vaŋno sǝ, syiŋ ah mo joŋ kii ɓo mor ga lii. So pii soo ge kaa ɓo jokǝsãh Masǝŋ. 13 Zǝzǝ̃ǝko tǝ byak ka Masǝŋ mo sor za ma syiŋ ah ge mor ɓal ah sǝŋ. 14 Syiŋ ah mo joŋ ɓal vaŋno, joŋ za mai mo vãh faɓe' ɓǝǝ ge ɓo lal njaŋ ŋhaa ga lii.
15 Mor Tǝ'yak Matǝdaŋdaŋ joŋ syedowal ah nyi na nai ta. 16 Kǝpel ah faa:
Dǝɓlii faa: Gbanzah mai me ga gbǝ ne ra fahfal zah'nan ah a naiko:
Me ga maa ɓǝ lai ɓe pǝ zahzyil ɓǝǝra,
Me ga ŋwǝǝ ɓǝ ah pǝ ɓǝ foo ɓǝǝra.
17 So faa faɗa: Me ka ga foo ɓǝ faɓe' ɓǝǝ tǝkine ɓǝ ber ɓǝǝ yao. 18 Ne cok faɓe' mo rwah ge lal ɓe, ka ɓǝ so joŋ syiŋ ma ɓaŋ faɓe' ah ga lal kǝkao ta.
Na tǝɓ ge wo Masǝŋ gwari
19 Naiko wee pa ɓe, mor wul Yesu na no ne fahlii ka dan pǝ cok matǝdaŋdaŋ tǝɗe'. 20 Yesu gbǝr fahlii mafuu ma ne cee ɓo mor man ka dan pǝ cok ma cee ahe, tǝgba faa: suu ahe. 21 Na no ne pa joŋzahsyiŋ malii mai ɓǝ yaŋ Masǝŋ daŋ mo jol ahe. 22 Mor maiko, na tǝɓ ge wo Masǝŋ gwari ne zahzyil vaŋno, ne iŋ matǝ goŋga, ne zahzyil mai mo vãh ɓo daga fatan zahzyil ma joŋ faɓe' tǝkine suu ma vãh ne bii masãhe. 23 Na gbǝ byak fan mai na tǝ faa ɓǝ ah uu ne pǝswahe, mor na gak tǝ njaŋ, Masǝŋ ga joŋ ɓǝ faa ahe. 24 Na ɓaŋ syiŋ ki, ka na gbah jol ki mor ka na 'yah ki tǝkine joŋ yeɓ sãhe. 25 Na soɓ ga cok tai man ka, na joŋ tǝgbana za ki mo ciira ɓo ne mo ka gara gŋ ya ka, amma sai na swaa ki, mor na kwo ɓe, zah'nan gin Dǝɓlii ge gwari ɓe.
26 Ne cok na tǝ goŋga, fahfal ah na so tǝ joŋ faɓe' ga pel ne 'yah zahzyil ɓe, syiŋ ma joŋ ka ɓaŋ faɓe' ah ga lal kǝkao, 27 sai coŋ ɗuu galle, tǝkine byak ɓǝ mai mo tǝ ga joŋ. Mor kiita ne wii ma'man ah tǝ ga muŋ za ma syiŋ Masǝŋ. 28 Dǝɓ mai mo zǝǝ tǝ ɓǝ lai Mosus ɓe daŋ, za gwa koo sai mo joŋra syedowal ah goŋga yo ɓe, a inra ko pǝ wul bai kwan syak tǝl ahe. 29 Dǝɓ mai mo syẽa We Masǝŋ mo kwo syim gbanzah mai Masǝŋ mo vãh ko ɓo ne na fan ma dah ne ɓalle, so tǝǝ Tǝ'yak mai mo tǝ joŋ gboŋgboŋ wol ahe, we lǝŋ dǝɓ ah ka ga lwaa kiita magaɓ ah kal mai Mosus mo ŋgoŋ ya ne? 30 Mor na tǝ Dǝɓ mai mo faa azye ye ga faŋ valle, azye ye ga soo dǝɓɓi ɓe, so faa: Dǝɓlii ga ŋgoŋ kiita tǝ za mǝ ahe. 31 Ka dǝɓ mo lee ge jol Masǝŋ ma ne cee a pǝgaɓ no cam.
32 We foo ɓǝ zah'nan mai mo pǝ̃ǝ kal ɓo fahfalle. Ne zah'nan ah fahfal Masǝŋ mo sǝǝ cokfãi tǝ ɓiiri, awe laa bone pǝlli, ne daŋ laŋ we uu pǝzyil bone ah pǝsãhe. 33 Comki a tǝǝra we tǝkine cuu syak nyi we pel za pãare, comki laŋ awe gbah jol za mai moo cuura syak nyi ra na we ta. 34 Awe laa bone ne za ma pǝ daŋgai tǝgbana awe gŋ ne ra. Ne cok mo woora fan ɓiiri, we laa pǝ'nyahre, mor we tǝ ɓe, we no ne fan masãh ah ma kal maiko, mai moo ga lii. 35 We soɓ swah zahzyil ɓii ɓoo ka, mor reba ah a no pǝlli. 36 We yea ne 'yah rõm fanne, mor ka we joŋ fan mai Masǝŋ mo tǝ 'yahe, ka we ge lwaa fan mai mo faako ɓǝ ah ɓo. 37 Tǝgbana Ɗerewol mo faa:
Cok coŋ ɓo no biŋ ba faɗa,
Dǝɓ mai mo tǝ ginni, a ga ge, ka nǝn a.
38 Dǝɓ mai mo njaŋ pel ɓe a ga yea ne cee mor iŋ ahe.
Amma mo kal jinko ge fahfal ɓe,
Me ka laa pǝ'nyah ne ki ya.
39 Ana ye ka za ma jin ga fahfal ka muŋ ya, amma ana ye za ma ne iŋni, na no tǝ fahlii ǝ̃ǝre.
© Bible Moundang © Alliance Biblique du Tchad, 1996.
