Masǝŋ Pa mana
1 Ana laŋ, na no ne za syedowal mai mo ryaŋra na ɓo pǝpãare. Mor ahe, sai na soɓ fan mai mo tǝ cak na ne syel tǝkine faɓe' mai mo mgbãa ɓo wo man daŋ ge lal gwari. Sai na yea ne lii zah maɗul mai ɓǝ ah mo kan ɓo pel man ne rõmme. 2 Na kan nahnǝn man tǝ Yesu, ako ye Dǝɓ mai mo tǝŋ iŋ pǝ zahzyil mana, ako ye ga zaŋ na ŋhaa vǝr ahe. Rõm bone mai mo ɓaara ko tǝ kpuuceere, kwo swãa ah na ɓǝ kolle, mor ɓǝ 'nyah mai mo kan ɓo mor ah pelle. Zǝzǝ̃ǝko ge kaa ɓo jokǝsãh fakal Masǝŋ.
3 We foo ɓǝ Dǝɓ mai mo rõm ɓǝ mai za faɓe' mo joŋra wol ahe. Nai ta, we laa gaɓ ka zahzyil mo nǝǝ we ka. 4 Mor pǝ sal ɓii we tǝ ruu ne faɓe', we ɓah ruu ŋhaa ka wul mo wǝ gŋ ya ba. 5 Awe yaŋ ɓǝ ma swaa zahzyil mai Masǝŋ mo tǝ faa nyi we tǝgbana wee ah ɓe ne? Faa:
We ɓe, mo syẽa lai mai Dǝɓlii mo tǝ lai mo ne ka.
Ne cok mo tǝ lai mo ɓe,
Ɓǝ ah mo nǝǝ zahzyil ɓo ka.
6 Mor Dǝɓlii a lai dǝɓ mai mo tǝ 'yahe,
A loɓ dǝɓ mai mo tǝ ko ɓo na wel ahe.
7 We rõm lai ah tǝgbana mai pam moo lai dǝɓɓi, mor bone ɓii cuu ɓo Masǝŋ tǝ byak we na wee ahe. Wel mai pam mo ka lai ya a no ne? 8 Mo ka tǝ lai we tǝgbana wee ah daŋ ya ɓe, ka we ka wee matǝ goŋga ya, amma ka awe ye wee ɓil lalle. 9 Na foo ɗao, pa man ma wo sǝr nyee a laira na, so na ɗuu ra ta, na ka laa zah Pa man ma coksǝŋ kal mai ka na yea ne cee ya ne? 10 Pa man ma wo sǝr nyee a laira na mor zah'nan nje tǝgbana zahzyil ɓǝǝ mo 'yahe. Amma Masǝŋ tǝ lai na mor ka zyeɓ na ne ko, ka na yea daŋdaŋ ne ki. 11 Ne cok mo laira na ɓe, na swaa ɓǝ ahe, ka 'nyah suu man a. Fahfal ah za mai lai ah mo lai ra ɓo a zyeɓ ra mor kal matǝ goŋga tǝkine jam.
Lai camcam
12 Mor ahe, we swaa jol ɓii mai mo gǝvak gǝvak tǝkine zahciŋɓal ɓii mo pǝtǝtǝ̃ǝre! 13 We syee tǝ fahlii masãh ah mai mo dǝǝ ɓo sǝraŋ, mor ka ɓal mai mo tǝ syee lem mo lem lii ka, amma ka mo so jin yea pǝswahe.
14 We kyeɓ ka we yea jam ne za daŋ, we kyeɓ ka we yea daŋdaŋ, mor mo ka nai ya ɓe, koo dǝɓ vaŋno ka ga kwo Dǝɓlii ya. 15 We joŋ yella mor ka koo zune mo soɓko gboŋgboŋ Masǝŋ mo joŋ ɓo ɓoo ka. We joŋ yella ka koo zune mo yeako tǝgbana kpuu mazwak mai moo ciŋ ka, mor zwak ah a ga zǝǝ za ne ɓeɓ ra pǝlli. 16 We joŋ yella ka koo zune mo yea pa tǝkoi wala pa syẽa fan matǝ goŋga ah tǝgbana mai Esau mo joŋ mo ɓaŋ tǝɗii welii ah lee farel ma zah ŋhǝǝ tǝ vaŋno ne ka. 17 We tǝ ɓe, fahfal ah so tǝ 'yah ka pah ah mo ẽe ko kpǝ, amma so lwaa yao, mor lwaa fahlii ka so gak fer ɓǝ fan mai mo joŋko yao, koo ne mai mo kyeɓ fahlii ah ne yeyee ne mĩi syẽ daŋ laŋ lwaa ya.
18 Awe, we ge ɓo ka tǝgbana za Israel mo gera wo fan mai moo gak juura ne jol tǝgbana waa Sinai ne wii mo tǝ syen gŋ, ne mabǝmmi, cokfuu ne swãh bamme, 19 ne cii kokõorĩi tǝkine cii kyaŋ mai mo tǝ cii gŋ ya. Mor ne cok za Israel mo laara kyaŋ ahe, so fiira fahlii ka mo faara ɓǝ wo ɓǝǝ kao. 20 Mor ka gak rõmra ɓǝ lai ah mai mo faa ɓo: dǝɓ mai moo ga juu waa ah daŋ koo mo nǝǝ cok yo, mo ɓaara ne tǝsal pǝ wulli, ka rõmra ya. 21 Fakwan ah pǝgaɓ no cam, ŋhaa Mosus faa: Suu coo me coo, gal re me pǝlli.
22 Amma awe ge ɓo wo waa Sion, wo yaŋ Masǝŋ ma ne cee, Jerusalem ma coksǝŋ, wo angeloi mai pãa ah mo ka gak kee ya, 23 tǝkine eklesia ma bem kǝpelle, mai tǝɗii ɓǝǝ mo ŋwǝǝ ɓo coksǝŋ. Awe ge ɓo wo Masǝŋ mai ako ye mo pa kiita za daŋ, ne wo tǝ'yak za matǝ njaŋ mai Masǝŋ mo joŋ ra ɓo daŋdaŋ tǝɗe'. 24 We ge ɓo wo Yesu mai mo zyeɓ ɓǝ gbanzah mafuu ɓo, ne syim mai mo ɗuu ɓo mo tǝ faa ɓǝ fan masãh ah kal syim Abel.
25 We joŋ yella! Ka we syẽa ɓǝ Dǝɓ mai mo tǝ faa ɓǝ nyi we ka. Za mai mo zyii laara ɓǝ faa dǝɓ ma faa ɓǝ Masǝŋ nyi ra wo sǝr nyee ya lwaara kiita ta. Nai ta, na soɓ Dǝɓ mai mo tǝ faa ɓǝ coksǝŋ nyi na ɓoo ɓe, na ga ǝ̃ǝ ɗǝne? 26 Ne cok ah moo, kyaŋ ah laŋ sǝrri, amma zǝzǝ̃ǝko faa nyi na: Me ka tǝ ga laŋ sǝr syak ah faɗa yao, amma me ga laŋ ne coksǝŋ daŋ. 27 Ɓǝ mai mo faa, faɗa, tǝ cuu fan mai mo joŋ ɓo daŋ a ga laŋ, a ga vǝrri, mor ka fan mai mo ka laŋ ya mo yea ga lii.
28 Sai na yea ne joŋ osoko, mor na lwaa Goŋ mai mo ka laŋ ya ɓo. Na cuu joŋ osoko ah ge lal ne joŋ mor Masǝŋ ne fahlii mai moo 'nyah suu ahe, ne wonsuu tǝkine ɗuu galle. 29 Mor Masǝŋ man wii ma syen fan o.
© Bible Moundang © Alliance Biblique du Tchad, 1996.
