Yesu kal Mosus ɓe
1 Mor maiko wee pa ɓe ma iŋ ahe, we za mai Masǝŋ mo ɗii we ɓo, we foo ɓǝ Yesu mai Masǝŋ mo pee ge ka yea pa joŋzahsyiŋ malii tǝ ɓǝ iŋ mai na tǝ cuu ɓǝ ahe. 2 Mor joŋ fan njaŋ wo Masǝŋ mai mo nǝǝ ko mor yeɓ ahe, tǝgbana Mosus mo joŋ fan njaŋ pǝ yeɓ yaŋ Masǝŋ daŋ. 3 Dǝɓ mai moo vuu yaŋ a pǝyǝk kal yaŋ ah ɓe. Nai ta, Yesu kii nǝn pǝkoŋ yii kal Mosus ɓe. 4 Yaŋ daŋ dǝɓ yee vuuni, amma Masǝŋ ako ye pa ma vuu fan daŋ. 5 Mosus joŋ fan njaŋ pǝ yaŋ Masǝŋ daŋ, ako ye dǝɓ yeɓ ma faa ɓǝ fan mai Masǝŋ mo tǝ ga faa pelle. 6 Amma Kristu ako ye We matǝ goŋga. Mor ahe, Masǝŋ kan ko ɓo tǝtǝl yaŋ ahe. Ana ye yaŋ ahe, na byak swah zahzyil man ɓo tǝkine soɓ suu man tǝ ɓǝ fan mai na tǝ byak ɓe ko.
Cok 'yak no mor za Masǝŋ
7 Mor ahe, tǝgbana Tǝ'yak Matǝdaŋdaŋ mo faa:
We laa kyaŋ Masǝŋ tǝ'nah ɓe,
8 We yer zahzyil ɓii tǝgbana ma ne cok mai pa ɓii lii mo ŋwoora kyaŋ ne ki ka,
Tǝgbana mai pa ɓii lii ra mo joŋra ne cok ah kǝsyicok mo liira ko gŋ.
9 Masǝŋ faa: Pa ɓii lii kǝǝra me gŋ, liira me ne cok mo kwora yeɓ mai daŋ me joŋ syii jemma nai.
10 Mor ah me ɓaŋ kpãh tǝ ɓǝǝra,
Me faa a joŋra faɓe' pǝ ɓǝ foo ɓǝǝ cẽecẽe.
Zyiira laa zah ɓe ya syaŋsyaŋ!
11 Me ɓaŋ kpãh me haa zah faa:
Ka ga danra pǝ cok mai moo ga 'yakra gŋ ne me ya syaŋsyaŋ!
12 Wee pa ɓe, we joŋ yella, mor ka koo dǝɓ vaŋno kǝsyil ɓii mo yea ne zahzyil maɓe' tǝkine bai iŋ ka soɓ Masǝŋ ma ne cee ka. 13 Amma we gbah jol ki zah'nan Masǝŋ daŋ, tǝgbana Ɗerewol mo tǝ faa ɓǝ nyi na tǝ'nahko, mor ka koo dǝɓ vaŋno kǝsyil ɓii mo soɓ faɓe' kǝǝ ko tǝkine yer zahzyil ah ka. 14 Mor na tai ki ɓo ne Kristu, sai na gbǝ ɓǝ mai na laa ɓo daga tǝtǝŋ ah uu ne pǝswah ŋhaa vǝr ahe.
15 Ɗerewol faa:
We laa kyaŋ Masǝŋ tǝ'nah ɓe,
We yer zahzyil ɓii tǝgbana ma ne cok mai pa ɓii lii mo joŋra mo ŋwoora kyaŋ ne Masǝŋ ka.
16 Za kẽe ye laa kyaŋ Masǝŋ so ŋwoora kyaŋ ne ki sye ne? Za mai Mosus mo zaŋ ra pǝ̃ǝ gin sǝr Egiɓ ne yo. 17 Masǝŋ ɓaŋ kpãh tǝ zu syii jemma nai sye ne? Ɓaŋ tǝ za mai mo joŋra faɓe', zan ah wukra kǝsyicokki. 18 Ne cok mai Masǝŋ mo haa zah faa: Ka ga danra pǝ cok mai moo ga 'yakra gŋ ne me ya syaŋsyaŋ, faa ɓǝ ah tǝ zu sye ne? Faa tǝ za mai mo ŋwoora kyaŋ. 19 Na kwo gak danra pǝ cok ah ya, mor zyii nyiŋra ɓǝ faa ah ya.
© Bible Moundang © Alliance Biblique du Tchad, 1996.
