1 Pa joŋzahsyiŋ malii daŋ a nǝǝra ko tǝgǝǝ zana, a kanra ko ka joŋ yeɓ pel Masǝŋ mor zana. A nyi fan tǝkine ŋgoŋ fan joŋ syiŋ ne ka soo tǝ faɓe'. 2 Pa joŋzahsyiŋ ah ne suu ah a yea pǝtǝtǝ̃ǝ tǝ fahlii camcam ta, a gak yee syak tǝ za mai mo tǝra fan ki ya, moo so zyakra ɓǝ. 3 Mor ako ne suu ah laŋ a pǝtǝtǝ̃ǝre, a gak joŋ syiŋ mor faɓe' suu ah tǝkine mǝ za pãa daŋ. 4 Koo dǝɓ vaŋno ka gak ɓaŋ yǝk ka ciŋ pa joŋzahsyiŋ malii ne suu ah ya, sai Masǝŋ yee ɗii ko tǝgbana mo ɗii Aron.
5 Nai ta, Kristu ɓaŋ yǝk ka ciŋ pa joŋzahsyiŋ malii ne suu ah ya, amma Masǝŋ ye faa nyi ko:
Amo ye We ɓe,
Tǝ'nah me faa ame ye Pa ɓo.
6 So Masǝŋ faa ɓǝ ah pǝ cok maki ah ta:
Mo ga yea pa joŋzahsyiŋ ga lii tǝgbana Melkisedek.
7 Ne cok Yesu mo yea wo sǝr nyee ne zah'nan cee ahe, juupelle, pǝǝ Masǝŋ ne kyaŋ lii tǝkine mĩi yee ka mo ǝ̃ǝ zah wulli. Amma Masǝŋ laa pǝǝ ahe, mor soɓ suu ah ɓo jol ahe. 8 Koo ako ye mo We Masǝŋ mgbaŋ laŋ, fee laa zah jol bone mai daŋ mo laako. 9 Ne cok bone camcam mai Yesu mo rõm gŋ joŋ ko vǝr yeɓ ah tǝɗe', so ciŋ pa ǝ̃ǝ ma ga lii ah ɓo mor za mai moo laara zah ah daŋ. 10 Masǝŋ ɓaŋ ko kan pa joŋzahsyiŋ malii ne ko tǝgbana Melkisedek.
Lai tǝ ɓǝ soɓ iŋ ɓooni
11 Me no ne ɓǝ ka faa tǝ ɓǝ fan mai pǝlli, amma a pǝgaɓ ka dǝɓ mo cuu mor ɓǝ ah nyi we, mor awe tǝ laa mor ɓǝ ah pǝgaɓɓe. 12 Cok ah ge nǝn mai ka awe ne suu ɓii we ciŋ za cuu fan ɓe. So awe tǝ 'yah ka mo so cuura mor tǝtǝŋ ɓǝ Masǝŋ nyi we pǝki kpǝ. Awe 'yah farel maswah ya, we so tǝ 'yah wonni. 13 Dǝɓ mai moo zwan won ka wepǝ̃ǝ ye ko ba, ka ne ɓǝ foo fan mai a pǝsãhe wala a pǝɓe' ya. 14 Farel maswah ah a mor za maluu mai moo gak joŋra yeɓ ɓǝǝ ne ka tan woŋ kǝsyil ɓǝɓe' ne ɓǝ sãhe.
© Bible Moundang © Alliance Biblique du Tchad, 1996.
