1 Na ge pel ne ɓǝ ma cuu nyi zaluuri, na soɓ ɓǝ mor tǝtǝŋ cuu ɓǝ eklesia ma kǝpel mo tǝŋra ɓoo nǝfalle. Na ka tǝ ga tǝŋ kpii mor ɓǝ fer ɓǝ zahzyil ne soɓ yeɓ makol ah tǝkine nyiŋ ɓǝ Masǝŋ, 2 ne ɓǝ cuu tǝ ɓǝ baptisma ne ɓǝ kan jol tǝ za ma iŋ ahe, ɓǝ cuu ɓǝ ur pǝ wulli tǝkine kiita ga lii pǝki yao. 3 Fan mai Masǝŋ mo zyii ɓe naa ga joŋ ako ye mai ka na ge pelle!
4 Mor za mai mo soɓra ɓǝ Kristu ɓoo ɓe a gak pii soora ka fer ɓǝ zahzyil ɓǝǝ ɗǝne? Mor lwaara cokfãi Masǝŋ ɓe, laara 'nyah fan ɗǝǝ ma coksǝŋ, so lwaara Tǝ'yak Matǝdaŋdaŋ. 5 Tǝra pǝ zahzyil ɓǝǝ ɓǝ Masǝŋ a pǝsãhe, so tǝra ɓǝ swah sǝr ma pel mo tǝ ginni , 6 amma so soɓra ɓǝ Kristu ɓoo. A pǝgaɓ ka zaŋ ra ka mo ge ferra ɓǝ zahzyil ɓǝǝ pǝfuu faɗa, mor so tǝ ɓaara We Masǝŋ ga tǝ kpuu pǝki kpǝ, joŋra ko ɓo pel za na fan tǝǝre.
7 Ne cok sǝr moo zwan bii bam mai moo tan gin tǝl ah cẽecẽe, sǝr ah a joŋ fan nyi za ma pǝǝ ah pǝsãhe, mor Masǝŋ ẽe sǝr ahe. 8 Amma sǝr ah mo so tǝ ciŋ waa ne sãhm tǝkine tǝlwaalwaa ɓe, ka ka ne yeɓ yao, Masǝŋ ga soɓ sǝr ah ne tǝkẽawãkke, a ga vǝr ne syen wii.
9 Amma koo ru faa ɓǝ nai laŋ za 'yah ɓe, ru tǝ ɓǝ ɓii ɓo belbelle, ru tǝ ɓe, awe tǝ fahlii ǝ̃ǝ masãhe. 10 Masǝŋ ka pǝ vǝrvǝr a, ka yaŋ ɓǝ yeɓ ɓii we joŋ ya, ka yaŋ 'yah ɓii mai we joŋ mor ah pǝ yeɓ ah tǝkine mai we tǝ gbah jol wee pa ɓii manyeeki ah ya ta. 11 Amma ru 'yah ka koo zune kǝsyil ɓii mo joŋko ge pel ne tǝwon mai ŋhaa mo vǝr ne sõo, mor ka fan mai we tǝ byakke mo ge joŋ goŋga. 12 Ru 'yah we yea pǝ vǝǝkoi ya, amma we yea tǝgbana za ma iŋni, mai mo tǝ kyaŋra ka ga ren fan mai Masǝŋ mo faa ɓǝ ah ɓo.
Swaa ɓǝ gbanzah Masǝŋ
13 Ne cok Masǝŋ mo gbǝ zah ne Abraham, so swaa ɓǝ ah ne haazahe. Haa zah ne suu syak ahe, mor dǝɓ ma kal ko ne 'man kǝka. 14 Faa: Me tǝ faa nyi mo, me ga ẽe mo, me ga joŋ morsǝ̃ǝ nyi mo pǝpãare. 15 Abraham byak ɓǝ ah bai zokki, so lwaa fan mai
Masǝŋ mo faa ɓǝ ah nyi ko. 16 Ne cok za mo tǝ haara zah kǝsyil ki ɓe, a haara ne tǝɗii dǝɓ mai mo pǝ'man kal ra ɓe, haazah ah a yea na fan ma in zah ɓǝ faa ma kǝsyil ɓǝǝra. 17 Masǝŋ 'yah ka cuu ɓǝ ah caŋryaŋ nyi za mai mo tǝ ga rera fan sãh mai mo faako ɓǝ ah ɓo nyi ra, ka gak fer ɓǝ faa ah ya syaŋsyaŋ. Mor ah so haazah tai ɓǝ faa ah mo faa ɓo ne ko. 18 Ɓǝ matǝ gwa mai ka gak fer a, mor Masǝŋ ka gwah ber a. So ana za mai na lwaa ǝ̃ǝ man ɓo jol ahe, na lwaa swah zahzyil malii ah ɓo ka na uu pǝswah ne ɓǝ byak fan mai mo pel mana. 19 Byak fan mai a pǝswahe, mor gbǝ zahzyil man ɓo tǝgbana vãm mai moo gaara dah ne ko. Ɓǝ ah a njaŋ, a pǝswahe, dan kal ge ɓo pǝ yaŋ Masǝŋ ma coksǝŋ nǝn godel ma cee ɓǝr cok matǝdaŋdaŋ. 20 Yesu dan kal ge ɓo gŋ pel man ŋhaa mor mana. Ciŋ pa joŋzahsyiŋ malii ɓo ga lii tǝgbana Melkisedek. Pa joŋzahsyiŋ malii ma morsǝ̃ǝ Lewi
© Bible Moundang © Alliance Biblique du Tchad, 1996.
