Yesu pa joŋzahsyiŋ man malii
1 Ɓǝ malii ah na tǝ faa nyeeno: na no ne pa joŋzahsyiŋ malii ma morãiko, mai mo kaa ɓo jokǝsãh fakal yǝk Masǝŋ coksǝŋ. 2 A joŋ yeɓ pa joŋzahsyiŋ malii pǝ cok matǝdaŋdaŋ tǝɗe', tǝgba faa: pǝ tal mbǝro matǝ goŋga mai Dǝɓlii ye mo zyeɓ ne suu ah dǝfuu ye mo ka zyeɓ ɓo ya.
3 Pa joŋzahsyiŋ malii daŋ a kanra ko mor ka nyi fan mor joŋ syiŋ tǝkine ŋgoŋ fan joŋ syiŋ ne ko. Mor ahe, sai pa joŋzahsyiŋ man malii mo yea ne fan ka nyi mor joŋ syiŋ ta. 4 Koo kǝnah mo no wo sǝr nyee laŋ, ako ye ka yea pa joŋzahsyiŋ ya, mor za joŋzahsyiŋ mai moo joŋra syiŋ ne nyi fan tǝgbana ɓǝ lai Yahuduen a no. 5 Yeɓ mai za joŋzahsyiŋ ah moo joŋra a tǝgbana foto wala cee fan mai mo no coksǝŋ. Nai ne mai Mosus mo joŋ ta. Ne cok mo tǝ ga zyeɓ tal mbǝro, Masǝŋ faa nyi ko: Mo joŋ fan daŋ ne fahlii ah tǝgbana mai me cuu nyi mo tǝ waare. 6 Amma Yesu lwaa yeɓ zahsyiŋ ɓo pǝ'man kal ma ɓǝǝra, tǝgbana ɓǝ gbanzah mai mo zyeɓko ɓǝ ah ɓo kǝsyil Masǝŋ ne dǝfuu a pǝsãh kal maki ah ɓe, mor gbanzah ah uu ɓo tǝ ɓǝ fan masãh ah ma kal ma ɓǝǝra.
7 Kǝnah gbanzah ma kǝpel ah mo ka ne ɓǝɓe' biŋ ya ɓe, ka so gera ne patǝ gwa ah ka kun ne ya. 8 Amma Masǝŋ lwaa ɓǝɓe' wo zan ahe, faa nyi ra:
Dǝɓlii faa: Zah'nan ah no ginni,
Me ga gbǝ zah mafuu ah ne za Israel tǝkine morsǝ̃ǝ Yuda.
9 Ka ga yea tǝgbana gbanzah mai me gbǝ ne pa ɓǝǝ lii ne zah'nan mai me ɓaŋ ra ne jol ka mo pǝ̃ǝra gin sǝr Egiɓ ya.
Ɓaŋra syiŋ ɓǝ gbanzah mai me gbǝ ne ra pǝsãh ya, me so kan lǝŋ ɓǝǝ laŋ yao.
10 So Dǝɓlii faa: Gbanzah mai me ga gbǝ ne za
Israel fahfal zah'nan ah a naiko:
Me ga maa ɓǝ lai ɓe pǝ ɓǝ foo ɓǝǝra,
Me ga ŋwǝǝ ɓǝ ah pǝ zahzyil ɓǝǝra.
Me ga yea Masǝŋ ɓǝǝra, a ga yeara za ɓe.
11 Koo dǝɓ vaŋno kǝsyil ɓǝǝ ka ga cuu nyi za sǝr ah we tǝ Dǝɓlii ya,
Dǝɓ ka ga faa nyi zum ah mo tǝ Dǝɓlii ya ta,
Mor a ga tǝra me daga wee nyee ɓǝǝ ŋhaa ne zaluu ɓǝǝ daŋ.
12 Me ga rwah ɓǝɓe' ɓǝǝ ga lalle,
Me ka ga foo ɓǝ faɓe' ɓǝǝ yao.
13 Ne cok Masǝŋ mo faa ɓǝ gbanzah mafuu ahe, joŋ ma kǝpel ɓo na matãa o, mor fan mai mo nǝn ɓo mo tãa ɓe, ka tǝ ga vǝr gwari o.
© Bible Moundang © Alliance Biblique du Tchad, 1996.
