Masǝŋ ne 'yah zan ah ma ŋwookyaŋ ko
1 So Dǝɓlii faa: Ne cok Israel mo yea pǝlaŋne, me 'yah ko, ame ɗii ko pǝ̃ǝ gin sǝr Egiɓ mor ako ye we ɓe. 2 Me gbǝ ko mor ako ye we ɓe, amma so soɓ me ɓoo. Za ɓe ŋgomra fan joŋ syiŋ wo Ba'al ne ko, tǝǝra ɓǝrdi wo masǝŋ ki ra. 3 Ame ye cuu ɓaŋ ɓal syel nyi Israel, me ɓaŋ za ɓe tǝ jolle. Amma ne daŋ laŋ tǝra sõone me ye pa byak ɓǝǝra, tǝra ya. 4 Ame zaŋ ra ge wo ɓe ne ɓǝ faa ma'nyah ah tǝkine 'yahe, me woo ra, me koo ra ge fahfalle, me ɗǝŋ suu ɓe gee ra sǝŋ ka mo zwahra won ɓe kǝ̃ǝre.
5 So zyiira ka pii soo gin wo ɓe ya, mor maiko, sai a jinra ga sǝr Egiɓ katãako. Asiria ye ga kaa swah tǝ ɓǝǝra. 6 Sal ga ɗaŋ yaŋ ɓǝǝ maluu vaŋno vaŋno daŋ, a ga 'walra zah ɓaale yaŋ ah ra ga sǝŋ, me ga vǝr za ɓe, mor a joŋra fan mai ara ne suu ɓǝǝ moo foora a pǝsãh to. 7 Soɓra me ɓoo, amma ka gak peera bai ren reba ah ya, a ga yera yee mor faswaa mayǝk mai mo kan ɓo tǝtǝl ɓǝǝra, so dǝɓ ma ga ɓaŋ gin tǝtǝl ɓǝǝ ga lal ka yea ya.
8 Israel, me ga joŋ we joŋ ɗǝne? Me ga soɓ we ɓoo ne? Me ga muŋ we tǝgbana me muŋ yaŋ Adma ne? Wala me ga joŋ wo ɓii na me joŋ ne yaŋ Zeboim ne? Zahzyil ɓe laŋ ka ga soɓ mee joŋ wo ɓii nai ya ta, mor me tǝ 'yah we pǝlli. 9 Me ka ga ɓaŋ kpãh ŋgoŋ kiita tǝ ɓii ne ya, me ka ga ɓeɓ Israel faɗa yao, mor ame ye Masǝŋ, me ye ka dǝfuu ya. Ame ye Dǝɓ Matǝdaŋdaŋ, me no ne we, me ka ga ge wo ɓii ne kpãh yao.
10 Me ga ɓyaŋ ɓǝ tǝ za syiŋ Israel tǝgbana ɓolle, so za ɓe ga syeera mor ɓe. A ga hǝǝra gin fah kǝmorcomlil ge wo ɓe hǝǝre. 11 A ga zwǝǝra gin sǝr Egiɓ ge na juu, a zwǝǝra sǝr Asiria ge na matǝvaare. Me ga woo ra rǝk pǝ yaŋ ɓǝǝ faɗa. Ame Dǝɓlii me ye faa ɓo.
Masǝŋ lai za Israel tǝkine za Yuda
12 So Dǝɓlii faa: Za Israel ryaŋra me ɓo ne ber tǝkine vǝrvǝr. Za Yuda ŋwoora kyaŋ ɓo ne me Masǝŋ matǝ goŋga matǝdaŋdaŋ ga 'wa ba.
© Bible Moundang © Alliance Biblique du Tchad, 1996.
