Hosea pǝǝ za Israel
1 Ame Hosea me faa: Za Israel, we pii soo ge wo Dǝɓlii Masǝŋ ɓiiri. We joŋ faɓe', we ɓee tǝ ɓal lee ge ɓo sǝŋ ne ko. 2 We pii soo ge wo Dǝɓlii, we juupel wol ah we faa: Oseni mo rwah faɓe' ɓuu ru joŋ daŋ ge lalle, mo laa juupel ɓuuru, ru ga joŋ osoko nyi mo na mai ru faa ɓǝ ah ɓo. 3 Sǝr Asiria ka gak ǝ̃ǝ ru ya, muŋta sal ka gak byak ru laŋ ya ta. Ru ka ga fǝ̃ǝ ɗii masǝŋ ki ra gŋ ga zah ka faa amo ye Masǝŋ ɓuuru yao syaŋsyaŋ. Ru toobii Dǝɓlii, mo kwo syak tǝ za mai ara mo ka ne dǝɓ ki ka so ga wol ah ya ko.
Dǝɓlii faa zye ga joŋ Israel soo fuu
4 Me ga zaŋ za ɓe jin ge wo ɓe ne katãako, me ga 'yah ra ne zahzyil vaŋno, me ka ga ɓaŋ kpãh ne ra yao. 5 Me ga yea wo za Israel na bam mai moo tan tǝ sǝr mayak ahe. A ga zyeera goo tǝgbana kpuu. A ga jwǝǝra sǝ̃ǝ pǝswah tǝgbana kpuu ma Liban. 6 A ga zyeera goo mafuu ahe, a ga yeara pǝsãh tǝgbana kpuu maŋgo. A ga fuŋra na kpuu gbẽmme. 7 So ame ye ga byak ra, a ga yeara pǝsãh tǝgbana 'wah elle, a ga ɓoora ga pel tǝgbana kpuu vin moo leeni, a ga yeara ne tǝɗii kǝsyil zan tǝgbana lee kpuu vin ma Liban. 8 Za Israel ka ga ɓaŋra syiŋ ɓǝ masǝŋ ki ra yao. Me ga laa juupel ɓǝǝra, me ga byak ra. Me ga gbǝ cee tǝ ɓǝǝ tǝgbana kpuu mai moo yea ne goo cẽecẽe. Ame ye pa ma gbah jol ɓǝǝ ne fan daŋ.
Vǝr ahe
9 Dǝɓ mai mo ne tǝtǝlli mo laako mor ɓǝ mai mo ŋwǝǝ ɓo nyeeno, so mo gbǝko ɓǝ ah pǝ zahzyilli, mor fahlii Dǝɓlii daŋ uu ɓo ɓǝrak. Za matǝ goŋga ah a ɓaŋra ganne, amma za faɓe' a ɓeara tǝ ɓal gŋ a leera ga sǝŋ, mor ka tǝ joŋra yella gŋ ya.
© Bible Moundang © Alliance Biblique du Tchad, 1996.
