1 Ɓǝ pǝgaɓ tǝ ɓiiri! Mor we zyeɓ ɓǝ lai maɓe' ah rǝk ɓo ka cuu bone nyi za ɓe ne ko. 2 Mor we cak za syak ka mo lwaara fan mor suu ɓǝǝ ka, we ɓeɓ ɓǝ kiita ɓǝǝ ta. So we gbah ŋwǝǝ wul ne wee syel nyiŋ fanne. 3 Ne cok Masǝŋ mo tǝ ŋgoŋ kiita tǝ ɓii ɓe, we ga joŋ ɗǝne? Ne cok mo soɓ gaɓ gin sǝr maɗǝk ge tǝ ɓii ɓe, we ga joŋ ɗǝne? We ga ɗuu ka fii zu ka gbah jol ɓii ne? We ga mok joŋ ɓii ra kẽne? 4 A ga ikra we zah sal pǝ wulli, wala a ga gbahra we kal pǝ byak ne ko. Ne daŋ laŋ, kpãh mai Dǝɓlii mo ɓaŋ ɓo ka ga i zah ya ba, amma kaa ge ɓo ka sǝŋ ne ŋgoŋ kiita tǝ zan a ba.
Masǝŋ joŋ yeɓ ne goŋ Asiria
5 Dǝɓlii faa: Asiria, me joŋ Asirien ɓo na bǝrǝǝ ka loɓ za mai me ɓaŋ kpãh ɓo tǝ ɓǝǝra. 6 Ame pee Asirien ɓo ka ruu sal ne za faɓe' raiko, ara ye joŋ me ɓaŋ kpãh ɓo. Me pee ra ka mo woora fan ɓii ne ruu salle, ka mo kiŋra fanne, ka mo dahra za ne ɓal tǝgbana vuuri.
7 Amma goŋ Asirien foo ɓǝɓe' mǝ ah zyeɓ suu kaa ɓo ne ko ka ɗaŋ za sǝr camcam. 8 Yii suu ah faa: Zaluu pel ɓe ra daŋ ara ye goŋe! 9 Ame re yaŋ Kalne ne Karkemis. Me re yaŋ Hamat ne yaŋ Arfat. Me so re yaŋ Samaria ne yaŋ Damaskus. 10 Me ɓaŋ jol ɓe ge ɓo sǝŋ ka ŋgoŋ kiita tǝ sǝr za goŋ mai masǝŋ ki ɓǝǝ ra mo pǝpãa kal ma yaŋ Jerusalem ne yaŋ Samaria ɓe. 11 Ame ɓeɓ yaŋ Samaria tǝkine masǝŋ ki ah ra daŋ, me ga joŋ ne yaŋ Jerusalem ne foto ah ra moo juura pel wol ah gŋ nai ta.
12 Amma Dǝɓlii faa: Ne cok me vǝr fan mai me tǝ joŋ wo waa Sion ne yaŋ Jerusalem daŋ ɓe, me ga ŋgoŋ kiita tǝ goŋ Asiria mor ɓǝɓe' ah tǝkine yii suu ah moo yiini.
13 Goŋ Asiria yii suu ah faa: Ame ye joŋ fan mai daŋ ne suu ɓe, ame pǝswahe, me ne tǝtǝlli, ame pǝ yella. Ame fer zahsyee sǝr kǝsyil za sǝr camcam, ame woo fan mai mo taira ɓo daŋ. Mor me pǝswahe, me nǝǝ za goŋ tǝ goŋ ge lalle. 14 Ame tai joŋ za sǝr ge mor jol tǝgbana dǝɓ moo tai pãare, we gaɓ tǝ biŋ ka gŋ ya, dǝɓ ma laŋ suu pel ɓe kǝka, ma gbǝr zah faa ɓǝ mgbǝɓ kǝka ta.
15 Dǝɓlii faa: Kǝlaɓ gak yii suu ah tǝ pa mai mo ɓaŋ ɓo tǝ joŋ yeɓ ne no ne? Syii ma ŋgoŋ kpuu gak yii suu ah tǝ dǝɓ mai mo ɓaŋ ɓo tǝ sǝǝ kpuu ne no ne? Kǝndaŋ ye ka ɓaŋ dǝɓ ya, amma dǝɓ yee ɓaŋ kǝndaŋne.
16 Mor ahe, Dǝɓlii Masǝŋ ma ne swah daŋ ga pee syem ma zǝǝ za ge ka cuu bone nyi za mai mo ŋwaara ɓo. Pǝ suu ɓǝǝ fan ki ga yea gŋ na wii, a cwah ra. 17 Masǝŋ mai mo ye cokfãi Israel a ga ciŋ wii. Masǝŋ Israel Matǝdaŋdaŋ mǝ za Israel a ga yea tǝgbana mabǝlaowii mai pǝ zah'nan tǝ vaŋno moo ga sye fan daŋ, a ga sye waa tǝkine sãhmme. 18 Gǝ̃ǝ masãh ah tǝkine sǝr pǝǝ 'wah masãh ah daŋ a ga ɓeɓ belbel tǝgbana syem ma ik za pǝ wul moo ɓeɓ dǝɓɓi. 19 Tǝcoŋ kpuu mai moo ga coŋ gŋ, welaŋ laŋ a gak kee pãa ahe.
Tǝcoŋ za Israel ga jinni
20 Zah'nan ah no ginni, ne cok ah za Israel mai mo coŋra ɓo sǝŋ no, ka ga gbǝra yǝk za mai mo yea tǝ ik ra yao, a ga soɓra suu ɓǝǝ wo Dǝɓlii Masǝŋ Matǝdaŋdaŋ mǝ za Israel. 21 Tǝcoŋ za kǝsyil za Israel ga piira soo ge wo Masǝŋ ɓǝǝ ma swahe. 22 Koo za Israel ara mo pǝpãa tǝgbana tǝkuu zahbii ko laŋ, sai za biŋ ye ga pii soora to. Ɓǝ ɓeɓ ɓǝǝ zyeɓ kan ɓe, ɓǝ ah ga joŋ baa ga cok ahe. 23 Oho, Dǝɓlii ma ne swah daŋ ga ɓeɓ sǝr daŋ tǝgbana mo faako ɓo ka joŋni.
Dǝɓlii ga ŋgoŋ kiita tǝ sǝr Asiria
24 Masǝŋ Dǝɓlii ma ne swah daŋ faa nyi zan ah mai mo haira ɓo Sion: Koo Asirien moo cuura bone nyi we tǝgbana Egiɓien mo joŋra laŋ, we ɗuu gal ɓǝǝ kao. 25 Coŋ ɓo ka pǝlli yao, me ga vǝr ɓǝ kiita mai me tǝ ŋgoŋ tǝ ɓiiri, so me ga muŋ ra. 26 Ame Dǝɓlii ma ne swah daŋ, me ga loɓ ra ne bǝrǝǝ ɓe tǝgbana me loɓ za sǝr Midian kah pǝɗakka Oreb. Me ga joŋ sǝr Asiria laa bone tǝgbana me joŋ sǝr Egiɓ laa bone ta. 27 Ne cok zah'nan ah mo ge ɓe, me ga wǝǝ we jol swah Asirien, faswaa ɓǝǝ ka ga yea tǝtǝl ɓii yao.
Za syiŋ Israel ge ryaŋra sǝr ɓǝǝra
28 Za syiŋ man gera ɓo Aijat o. Pǝ̃ǝra Migron ɓe, soɓra faswaa ɓǝǝ rǝk ɓo Mikmas. 29 Ɓaŋra fahlii ma pǝ̃ǝ tǝgǝǝ waa ɓo, ge swǝra ɓo Geba. Za yaŋ Rama daŋ tǝ ɗuura galle, za yaŋ Gibea Saul ɗuura kal ɓe. 30 Awe za Gallim, we ɓyaŋ ɓǝ! Awe za yaŋ Lais, we laa! Awe za Anatot, we zyii ɓǝ! 31 Za yaŋ Madameena ne za yaŋ Gebim tǝ ɗuura mor ka ǝ̃ǝ suu ɓǝǝra.
32 Tǝ'nah za syiŋ man ara yaŋ Noɓ o, tǝ daɓra jol ɓǝǝ gŋ ŋhaa tǝwaa Sion mai yaŋ Jerusalem mo gŋ.
33 Dǝɓlii ma ne swah daŋ ga cee ra myah ga sǝŋ, tǝgbana dǝɓ moo cee jol kpuu. Yii suu ɓǝǝ tǝkine yǝk ɓǝǝ daŋ ga vǝrri, a ga wuura syellele. 34 Dǝɓlii ga cee ra myah ga sǝŋ tǝgbana dǝɓ moo cee kpuu pǝ̃ǝ ne kǝlaɓ ɓaa ga sǝŋ, a yeara tǝgbana kpuu Liban masãh ah moo lea ga sǝŋ.
© Bible Moundang © Alliance Biblique du Tchad, 1996.
