Ɓeɓ ga ge tǝ sǝr Moab
1 Ɓǝ ma faa tǝ sǝr Moab a naiko: A ga ɓeɓra yaŋ Ar ne Kir pǝ suŋ vaŋno, zah ga yea sǝr Moab tǝɗum tǝɗum. 2 Za yaŋ Dibon ga yeera gin tǝgee ka yeyee yaŋ juupel ɓǝǝra. Za Moab ga yera yee tǝ yaŋ Nebo ne Medeba, a ga swãara tǝtǝl ne pyaŋ daŋ ga lalle. 3 Za ga ɓaara mbǝro dahsuu syee tǝ fahlii tǝgǝǝ yaŋ ne ko, ga yeera zahdǝǝ sǝŋ tǝkine cok cwǝ̃ǝ za tǝgǝǝ yaŋ, a ga yera yee gŋ ne mĩirĩ. 4 Za yaŋ Hesbon ne Eleal ga ŋwaara yee pǝ'manne, ŋhaa za gak laa cii yee ɓǝǝ ga yaŋ Jahaza. Koo sooje Moab laŋ, suu ga coora kpakkpak, swah ɓǝǝ ga vǝr tǝɗe'. 5 Zahzyil ɓe tǝ yeyee tǝ Moab! Zan ah ɗuura ka ga yaŋ Zoar. Za ki yeera ɓaŋ fahlii ma ga Lukit. Ne cok mo tǝ gara, a ɗah yera yee ga ne tǝ syelle. Za ki ɗuura ka kal ga Horonaim, a ɗah 'meera ga ne tǝ syel nooko. 6 Bii Nimrim daŋ yakke, fãa pǝ̃ǝ ma kah ah daŋ yak curcur, fan mapǝ̃ǝ ah coŋ gŋ ya. 7 Za yeera el Goozyeebii, a kyeɓra ka ɗuu ǝ̃ǝ ne fan ɓǝǝ daŋ. 8 Pǝ sǝr Moab ah ne lii ah daŋ mo laa cii yee cii gŋ, ŋhaa yee ah cii ga dai yaŋ Eglaim ne Beer-Elim. 9 Bii ma pǝ el yaŋ Dibon syiŋ ne syim pǝsyẽ kyee, Masǝŋ kan fan magaɓ ah ɓo no mor ɓǝǝra. Oho, za mai tǝtǝl ɓǝǝ mo coŋ ɓo no sǝŋ sǝr Moab daŋ syim ɓǝǝ ga ɗuu.
© Bible Moundang © Alliance Biblique du Tchad, 1996.
