Jam ma ga lii
(Mi 4:1-3)1 Ɓǝ mai Masǝŋ mo cuu nyi Esaia we Amoz tǝ sǝr Yuda ne yaŋ Jerusalem. 2 Faa: Zah'nan ah no ginni, waa mai yaŋ Masǝŋ mo uu ɓo gŋ, a ga yea pǝwah kal waa daŋ. Za sǝr camcam a ga gera wo waa ahe. 3 A ga faara: Na yee ge tǝ waa Dǝɓlii, pǝ yaŋ Masǝŋ Israel, a ga cuu ɓǝ fan mai ka na joŋ nyi na, so na ga syee tǝ fahlii mai ako ye mo nǝǝ ɓo. Fan cuu Dǝɓlii mo tǝ cuu ur gin Jerusalem ge. Faa ɓǝ daga Sion ge nyi zan ahe.
4 A ga wahl bal kǝsyil za sǝr camcam daŋ. A ga woora fan sal ɓǝǝ coo kpãh ne ko, a ga woora zǝǝ ɓǝǝ coo fan yii fãa ne ko. Za ka ga ruu sal faɗa yao, ka ga zyeɓra suu ka ruu sal ao.
5 Zǝzǝ̃ǝko morsǝ̃ǝ Yakuɓ, na syee pǝ cokfãi mai Dǝɓlii mo sǝǝ ɓo nyi na.
Dǝɓlii Masǝŋ tǝ ginni
6 Masǝŋ, mo soɓ za ɓo morsǝ̃ǝ Yakuɓ ɓe! Ɓǝ ẽe ciŋ baa ɓo sǝr ɓǝǝ tǝgbana mǝ za sǝr fah morcomzah'nan ne sǝr Filistien, za syeera mor ɓǝ zah fan joŋ za gwǝǝre. 7 Vãm solai ne vãm kaŋnyeeri no pǝ sǝr ɓǝǝ pǝlli. Joŋ ɓǝǝ ka ne zahsyee ya. Pǝr pǝ sǝr ɓǝǝ pǝlli, pãa muŋta sal ɓǝǝ ka gak kee ya. 8 Masǝŋ ki a sǝr ɓǝǝ pǝlli, a juura pel wo fan mai mo zyeɓra ne jol ɓǝǝra.
9 Koo zune daŋ swah ah ga tǝrri, swãa ga re ko. Dǝɓlii, mo rõm ra ka!
10 A ga mokra pǝ yii tǝkine tǝgǝǝ waare, a ga kyeɓra ka cii sǝr dan ga gŋ ka ɗuu gal kpãh Dǝɓlii mok gŋ, wala ka ɗuu gal swah ah ne yǝk ah muŋni. 11 Zah'nan ah no ginni, ne cok ah fan mai dǝfuu moo yiira suu ɓǝǝ ne daŋ a ga i zahe, yii suu mai dǝfuu moo yii daŋ a ga vǝrri. Sai Dǝɓlii syak ah yee ga yea pǝyǝk to. 12 Ne zah'nan ah Dǝɓlii ma ne swah daŋ a ga tǝr swah za ma ne swahe, ne za ma yiira suu tǝkine syee mor 'yah suu ɓǝǝra. 13 A ga vǝr kpuu bah mawah ah ra ma Liban, ne kpuu maluu ma sǝr Basan daŋ. 14 A ga rǝǝ waa mawah ah ra ciŋ geere, 15 ne yaŋ mawah ah ra tǝkine yaŋ maswah ah ra ma ne fan sal gŋ daŋ. 16 A ga joŋ dah maluu masãh ah ra dan ga mor bii. 17 Fan mai dǝfuu moo yiira suu ɓǝǝ ne daŋ a ga i zahe, yii suu mai dǝfuu moo yii daŋ a ga vǝrri. Ne cok zah'nan ah mo ge dai ɓe, Dǝɓlii syak ah yee ga yea pǝyǝk to. 18 Masǝŋ ki ra daŋ a ga vǝr belbelle.
19 Za ga mokra suu ɓǝǝ pǝ yii tǝkine tǝgǝǝ waare, wala a ga kyeɓra ka cii sǝr dan ga gŋ ka ɗuu gal kpãh Dǝɓlii mok gŋ, wala ka ɗuu gal swah ah ne yǝk ahe, ne cok mai moo ga geko ka laŋ sǝrri. 20 Zah'nan ah mo ge dai ɓe, a ga woora masǝŋ ma vãm kaŋnyeeri ne ma vãm solai mai mo zyeɓra ɓo myah ga lalle, a ga soɓra nyi gee ne kǝcwakdahɗǝ. 21 Ne cok Dǝɓlii mo ge ka laŋ sǝr ɓe, za ga ɗuura gal kpãh ah ne swah ah tǝkine yǝk ah mok mor sǝr ne pǝ yii tǝkine tǝgǝǝ waare. 22 Mo soɓ suu ɓo wo dǝfuu mai moo wun ka. Dǝfuu kiira nǝn fẽe ɓo ne?
© Bible Moundang © Alliance Biblique du Tchad, 1996.
