Esaia syee ne suu kol ne ɓal kol daŋ
1-2 Comki Dǝɓlii faa nyi Esaia we Amoz, mo wǝǝko mbǝro dahsuu mai mo ɓooko ɓo wo suu ah ge lalle, ka mo nǝǝko sǝɓal ɓal ah ge lal ta. So Esaia laa zah ahe, syee ne suu kol tǝkine ɓal kol kǝsyil syii sai. Fahfal ah Sargon goŋ Asiria pee swah sooje ah ne sooje ge ruu sal ne yaŋ Filistien ma ɗii ne Asdod. 3 So ne cok mo rera yaŋ Asdod, Dǝɓlii faa: Dǝɓ yeɓ ɓe Esaia syee ne suu kol tǝkine ɓal kol syii sai. Ɓǝ ah a no na fan ma cuu ɓǝ fan mai mo tǝ ga joŋ wo sǝr Egiɓ ne sǝr Etiopia. 4 Goŋ Asiria ga gbah za sǝr matǝ gwa raiko, a ga wǝǝ fan wo suu ɓǝǝ ga lalle. Wee tǝbanna ɓǝǝ ne zaluu ɓǝǝ daŋ a ga syeera ne suu kol tǝkine ɓal kolle. Ɓǝ syee ne zahmorkol ɓǝǝ a ga re swãa za sǝr Egiɓ. 5 Za mai mo gbǝra yǝk ɓǝ sǝr Etiopia ɓo ne za mai moo yiira suu ɓǝǝ ne ɓǝ sǝr Egiɓ, tǝtǝl ga jin ra pǝryak, ɓǝ foo ɓǝǝ mo yea uu ɓo tǝ sǝr marai ka ga yea yao. 6 Ne cok zah'nan ah mo ge ɓe, za mai mo kaara ɓo kah mabii sǝr Filistien daŋ a ga faara: Na ẽe fan mai mo joŋ ɓo wo za mai na foo a ga ǝ̃ǝra na jol goŋ Asiria kŋ ɗǝ! Zǝzǝ̃ǝ na ga ǝ̃ǝ ɗǝne?
© Bible Moundang © Alliance Biblique du Tchad, 1996.
