Ɓǝ ma faa tǝ yaŋ Jerusalem
1 Ɓǝ ma faa tǝ cok tǝforoŋ Fakwanne a naiko:
A fẽe ye joŋ ɓo ne? Mor fẽe za yaŋ daŋ yeera ɓo zahdǝǝ sǝŋ tǝ joŋ fĩi gŋ ne? 2 Yaŋ mai ne lii ah daŋ cii fan joŋ ɓǝǝ ciini, a laara pǝ'nyahre. Za yaŋ mai mo wukra ɓo zah sal maiko, sal ye ka ik ra ɓo ya. 3 Zaluu ah ra daŋ ɗuura, so za gbah ra bai mai mo lwaa 'nǝǝra koo guu vaŋno. 4 Zǝzǝ̃ǝko, we soɓ me yeyee. Mor za ɓe ra wuk ɓo pǝpãare, we tao me ka. 5 Mor zah'nan mai zah'nan gaɓ ye ne zah'nan ɓǝ swaa tǝkine ma ɗuu gal Masǝŋ Dǝɓlii ma ne swah daŋ mo soɓ ge ɓo tǝtǝl man pǝ cok tǝforoŋ Fakwanne. Ɓaale yaŋ man malii hah ge sǝŋ ɓe, yee mai na tǝ yee fii gbah jol ne ko, pee jol man tǝgǝǝ waa ɓe ta.
6 Sooje ma sǝr Elam gera ɓe, yeera pǝr ge ne ko, bamra saŋ ne guu ge ne daŋ. Sooje ma sǝr Kir laŋ zyeɓra bal sal ɓǝǝ ge ne ta. 7 Sǝr masãh ah ra ma pǝ sǝr Yuda daŋ muŋta sal baa gŋ kǝrkǝr, sooje ma yee pǝr ge uura zah ɓaale yaŋ Jerusalem. 8 Swah sǝr Yuda vǝr tǝɗe' tǝɗe'.
Ne cok fan ah mo joŋ, we woo fan sal gin pǝ cok zyeɓ ahe. 9-10 We lwaa cok mai ɓaale yaŋ Jerusalem mo ɓeɓ ɓo gŋ so mo 'yah zyeɓɓe. We kee yaŋ mai mo ɓǝr Jerusalem, we 'wal manyeeki ah kǝsyil ah ge sǝŋ mor ka woo tǝsal ah zyeɓ ɓaale ne ko. 11 We vuu cok rǝk bii tǝgǝǝ yaŋ mor ka ɓaŋ bii pǝ lak matãa gin gŋ. Amma we zyii ka ɓaŋ syiŋ ɓǝ Masǝŋ mai ako ye mo zyeɓ fan ah rǝk ɓo daga ɓaaɓe mo so nyi fahlii joŋ ah ɓo ya.
12 Masǝŋ Dǝɓlii ma ne swah daŋ tǝ faa nyi we ka we yeyee, we 'meere, we kpyãh tǝtǝl ge lalle, we ɓaa mbǝro gban yelle. 13 Amma ma ɓii we so syesyakke we joŋ fĩi, we ŋgom dǝǝ ne pǝsǝ̃ǝ ka renne, we zwah yimmi, we faa: Na re fanne, na zwah fanne, mor tǝ'nan na ga wukki.
14 Masǝŋ Dǝɓlii ma ne swah daŋ faa ɓǝ nyi me ne suu ah faa: Pǝ zah'nan mai ara mo no wo sǝr daŋ, faɓe' mai mo joŋra ɓo wo ɓe daŋ, me ka ga rõm ya. Ame Dǝɓlii ma ne swah daŋ, me faa naiko.
Masǝŋ lai dǝɓ ma ɗii ne Sebna
15 Masǝŋ Dǝɓlii ma ne swah daŋ faa nyi me: Mo ge wo Sebna, dǝɓ ma byak fan goŋe, mo faa nyi ko: 16 Amo foo mo ye zune? Amo ye zu ka mo waa zyeɓ pal masãh mai mor suu ɓo tǝ pǝɗakka ne? 17 Amo mo lǝŋ mo ye dǝɓ mabǝ̃ǝ ahe, amma Dǝɓlii ga ɓaŋ mo 'nǝǝ ga lalle. 18 A ga joŋ ne mo tǝgbana dǝɓ moo gǝr vuuri, a ga ɓaŋ mo 'nǝǝ ga pǝ sǝr ma'man ahe, mo ga wǝ gŋ kah muŋta sal mai moo yii suu ne ɓǝ ahe. Mor amo ye ge ɓo ne ɓǝ swãa tǝ yaŋ dǝɓlii ɓo. 19 Dǝɓlii ga nǝǝ mo pǝ cok yeɓ ɓo ga lalle, a ga wǝǝ yǝk gin tǝ ɓo.
20 So Dǝɓlii faa nyi Sebna: Ne cok fan ah mo joŋ ɓe, me ga pepee ɗii dǝɓ yeɓ ɓe Eliakim we Hilkiija. 21 Me ga ɓoo mbǝro yeɓ ɓo nyi ko, me ga baŋ haŋ nyi ne ganda baŋ suu, me ga nyi swah mai amo mo yea ne daŋ nyi ko. A ga yea wo za yaŋ Jerusalem ne za sǝr Yuda daŋ tǝgbana pamme. 22 Me ga nyi swah ma morsǝ̃ǝ goŋ David nyi ko tǝ za ɓe daŋ. Me ga nyi lakǝle ma gbǝr zah yaŋ daŋ nyi ko. Ne cok mo gbǝr ɓe, dǝɓ ma gak coo ah ka yea ya, ne cok mo coo ge gŋ ɓe, dǝɓ ma gak gbǝr ah ka yea ya ta. 23 Me ga joŋ ko uu pǝswah tǝgbana taabǝl mai mo kan ɓo mor rǝk fan tǝl ahe. Za yaŋ ah ra daŋ a ga yeara pǝyǝk mor ahe.
24 Amma zan ah ra daŋ a ga yeara wol ah tǝgbana faswaare. A ga yeara tǝl ah sǝŋ tǝgbana cii ne tahsah ne kǝɗaa rai moo rǝk ma tǝ fanne. 25 Ne cok ɓǝ ah mo joŋ nai ɓe, ɓal taabǝl mai fan mo rǝk ɓo tǝl ah a ga hao, so fan mai mo no tǝl ah a myah ga sǝŋ. Ame Dǝɓlii me ye faa ɓo.
© Bible Moundang © Alliance Biblique du Tchad, 1996.
