1 So ne zah'nan ah Dǝɓlii ga ɓaŋ kafahe ah mayak malii maswahe, a ga ŋgoŋ kiita ne tǝ Leviatan soo ma ɗul lii mai ako ye mo dragoŋ matǝ rwãirwãi, so a ga i fan malii ma mor bii pǝ wulli.
2 Ne zah'nan ah Dǝɓlii ga faa ɓǝ tǝ 'wah kpuu vin ah masãhe: 3 Ame ye tǝ byak 'wah ɓe, me nyi bii nyi cẽecẽe, me byak com ne suŋ daŋ, ka dǝɓ mo ge ɓeɓ ka. 4 Me ka ɓaŋ kpãh tǝ 'wah kpuu vin yao. Me lwaa waa ne sãhm mo ciŋ ɓo gŋ ɓe, me ga cee ra ga lal me ɓaa wii nyi ra belbelle. 5 Amma za ma syiŋ za ɓe mo 'yahra me byak ra ɓe, sai mo zyeɓra ɓǝ ne me ka kaa jam, ɓǝ ah naiko, sai mo zyeɓra ɓǝ ne me.
6 Ne zah'nan ah za Israel morsǝ̃ǝ Yakuɓ a ga rǝkra sǝ̃ǝ tǝgbana kpuu, a ga zyeera goo a jiira, so a ga fãira. Mo leera syẽm ɓe, lee syẽm ɓǝǝ ga baa sǝr kǝrkǝr.
7 Dǝɓlii ŋgoŋ kiita tǝ za Israel ne ik ra ga lal tǝgbana mo ŋgoŋ tǝ za syiŋ ɓǝǝ ya. 8 Dǝɓlii ŋgoŋ kiita tǝ zan ah ne pee ra ga zah sǝr za ki, woo ra ne zyak morcomzah'nan maɓe' ah kal ne ko. 9 Faɓe' za Israel ka rõm ya, ŋhaa sai ka tǝsal ma pǝ cok joŋ syiŋ 'wal myah ge sǝŋ ɓe, so sai ka masǝŋ ki ma ɗii ne Astarte ne foto com daŋ kǝkao.
10 Yaŋ ma ne ɓaale ga hah ga sǝŋ ciŋ gboŋni, a ga yea tǝgbana kǝsyicokki. Dǝǝ ga pii gŋ, a swahra gŋ, a so urra re wommi. 11 Ne cok jol kpuu mo yak ɓe, a hah ga sǝŋ, ŋwǝǝ gin sǝǝ zahwii ahe. Mor za ka ne tǝtǝl a, Masǝŋ pa ma joŋ ɓǝǝ ka ga kwo syak tǝ ɓǝǝ wala joŋ gboŋgboŋ wo ɓǝǝ ya.
12 Ne zah'nan ah Dǝɓlii ne suu ah a ga ŋgoŋ kiita tǝ zan ah zahtǝmgboo sǝr daŋ, daga kah el Efrat ŋhaa dai sǝr Egiɓ. A ga syen fan masãh ah gin pǝzyil maɓe' ahe.
13 Ne cok zah'nan ah mo ge ɓe, kokõorĩi malii ga ul ka ɗii za Israel mai ara mo zah sǝr za ki tǝgbana sǝr Asiria ne Egiɓ daŋ gin yaŋ. Mo gera ɓe, a ga juura pel wo Dǝɓlii yaŋ Jerusalem tǝ waa Sion matǝdaŋdaŋ.
© Bible Moundang © Alliance Biblique du Tchad, 1996.
