Masǝŋ ga ŋgoŋ kiita tǝ za syiŋ ahe
1 Awe zahban daŋ we ge, we laa ɓǝ! Awe za mai we kaa ɓo wo sǝr ne lii ah daŋ, we tai ge nyee we laa. 2 Dǝɓlii ɓaŋ kpãh ɓo tǝ za sǝr tǝkine za sal ɓǝǝ daŋ. Ŋgoŋ kiita ɓo tǝtǝl ɓǝǝ ka ik ra ga lalle. 3 Wul ɓǝǝ ka ga cii ya, amma a ga soɓ ra myah tǝ sǝr a ga sõora gŋ, fuŋ ah ga dah cok daŋ, waa camcam a ga syiŋra ne syim pǝsyẽ kee. 4 Com ne fĩi ne ŋwǝǝmǝŋgai daŋ a ga leara gin sǝŋ laŋ bilbil. Coksǝŋ ga cẽe tǝgbana dǝɓ moo cẽe daagol, ŋwǝǝmǝŋgai ga leara gin sǝŋ tǝgbana goo kpuu vin wala goo wuu mayak ah moo 'mǝr tǝ kpuu ah gin sǝŋ.
5 Dǝɓlii zyeɓ kafahe ah coksǝŋ, zǝzǝ̃ǝ mai tǝ ga ɗǝr gin ka ce za sǝr Edom mai mo ŋgoŋ kiita ɓo tǝ ɓǝǝ ka vǝr ra. 6 Kafahe ah syim ne nǝm ga gbǝ wol ah dǝɓok, syim ne nǝm ah a ga yea tǝgbana syim pǝsǝ̃ǝ ne sǝgwii mai moo ŋgomra joŋ syiŋ ne ko. Dǝɓlii ga joŋ syiŋ mai yaŋ Bosra, a ga ik wul malii mai pǝ sǝr Edom. 7 Za ga leara ga sǝŋ tǝgbana nǝǝ cok tǝkine wǝǝ dǝǝ za moo ikra. Sǝr ga syiŋ ne syim pǝsyẽ kee, nǝm ga rǝŋ sǝr ŋgiɓŋgiɓɓi. 8 Ne cok ah zah'nan mai Dǝɓlii moo ga ǝ̃ǝ Sion, so moo ga faŋ val tǝ za syiŋ ah ne yo.
9 El Edom daŋ a ga hǝǝ na mǝŋgǝ̃ǝ. Sǝr ah a ga ciŋ sulfer. Sǝr ah ne lii ah daŋ a ga sye wii tǝgbana mǝŋgǝ̃ǝ. 10 A ga sye wii com ne suŋ daŋ, suŋwii ah ga zoo ga sǝŋ pǝ sǝr ah ga lii ga lii. Sǝr ah ga yea tǝkol syii pǝpãare, koo dǝɓ vaŋno ka ga pǝ̃ǝ gŋ faɗa yao. 11 Woŋguu ne kǝcwakdahɗǝ yee ga yeara pǝ sǝr ahe. So Dǝɓlii ga joŋ sǝr ah na cok kol faɗa, a ga yea tǝgbana mai mo yea kǝpel ka sǝr ɓah joŋ ya ba. 12 Goŋ ka ga yea gŋ ka kaa swah tǝ sǝr ah ya, zaluu ah ra daŋ a ga vǝrri. 13 Waa ne sãhm ga ciŋ pǝ yaŋ goŋ ah ra ne yaŋ ma ne ɓaale ah ra. Sǝgoi ne woŋguu yee ga yeara ɓǝr yaŋ ah ra. 14 Nǝǝ cok ga yera yee gŋ ɗii ki. Mǝǝzuwuŋbii ga ge gŋ mor ka kyeɓ cok 'yakke. 15 Woŋguu ga syii kol ɓǝǝ gŋ, a ga ɓaara pãare, a syerra wee so gom ra gŋ. Mavakmǝr ga taira ki gŋ pǝri pǝri.
16 We kyeɓ pǝ ɗerewol Dǝɓlii ka we kee ɓǝ mai mo faa ɓo gŋ. Koo fan vaŋno kǝsyil fan ma ne cee rai ka ga muŋ ya, koo vaŋno kǝsyil ɓǝǝ ka ga pee bai yea ne mawin ne wor a. Dǝɓlii faa ɓǝ ah ɓo ka mo joŋ naiko. Ako ne suu ah a ga tai ra. 17 Dǝɓlii yee ga woŋ sǝr kǝsyil ɓǝǝra, a ga nyi sǝr ah nyi ra ka mo rera, a ga kaara pǝ sǝr ahe, a ciŋ ma ɓǝǝ ga lii ga lii.
© Bible Moundang © Alliance Biblique du Tchad, 1996.
