Syem gbǝ goŋ Ezekias
(2 ZaG 20:1-112 KeeƁ 32:24-26)1 Ne cok ah syem joŋ Ezekias, ŋhaa ge gwari ne wulli. Profeto Esaia we Amoz ge wol ah faa nyi ko: Dǝɓlii faa sye: Mo kee zah wul nyi za yaŋ ɓo, mor mo tǝ ga wuu, mo ka laɓ ya. 2 Ezekias jin nahnǝn ɓoo ge wo yaŋ so juupel wo Dǝɓlii faa: 3 Dǝɓlii, oseni mo foo ɓǝ mai me syee mor ɓo ne goŋga ne zahzyil vaŋno, ne mai me joŋ fan ma 'nyah suu ɓo. So Ezekias yeyee pǝlli.
4 So Dǝɓlii faa nyi Esaia: 5 Mo pii soo ge wo Ezekias mo faa nyi ko: Ame Dǝɓlii Masǝŋ pa ɓo lii David me laa pǝǝ ɓo ɓe, me kwo mĩi yee ɓo ɓe ta, me ga ɓoo syii ɓo ga pel jemma tǝtǝl dappe. 6 Me ga ǝ̃ǝ mo ne yaŋ Jerusalem gin mor jol goŋ Asiria, me ga byak yaŋ nyẽeko.
7 Esaia faa nyi Ezekias: Dǝɓlii ga joŋ fan ma cuu fan mai mo cuu a ga joŋ ɓǝ mai mo faa ko ɓo baa ga cok ahe. 8 Dǝɓlii ga joŋ cee pii soo ge fahfal nǝn ɓal syel jemma tǝgbana fan lii cok com mǝ goŋ Akas. So cee pii soo ge fahfal nǝn ɓal syel jemma.
9 Fahfal Ezekias mo laɓ syem ahe, ɗǝǝ lǝŋ joŋ osoko ne faa:
10 Me foo, ne cok me pǝswah 'wa ba,
Me ga pǝ cok mai za wul mo gŋ,
Me ka yea sǝŋ ne cee ɓe yao.
11 Ame foo, pǝ sǝr mai za ma ne cee mo gŋ,
Me ka fǝ̃ǝ kwo Dǝɓlii faɗa yao,
Me ka kwo dǝfuu yao ta.
12 Ɓǝ kal ɓe ma wo sǝr ɓeɓ ɓe,
Nǝǝra gin tǝ ɓe kal ne tǝgbana suu gǝrǝǝji mai moo ɗǝǝ ɓǝr dah kaŋ mbǝro.
Me foo, Masǝŋ vǝr zah'nan ɓe gin wo sǝr ɓe.
13 Ame yeyee ne fasyen nǝn suŋ ne cii, ŋhaa zah'nan cee ne ko.
Me laa suu ɓe tǝgbana ɓol gbǝ me hah woiŋ ɓe ɓo.
Me foo Masǝŋ vǝr zah'nan ɓe gin wo sǝr ɓe.
14 Kyaŋ ɓe cii pǝnyiŋ syik,
Me yeyee tǝgbana matǝvaare,
Nahnǝn fee me fǝŋgǝr ne ẽe cok ga coksǝŋ.
Dǝɓlii, mo ge ǝ̃ǝ me zah gaɓ maiko.
15 Dǝɓlii ye joŋ ɓo, me gak faa ɗah ɓǝ fẽe gŋ ne?
Zahzyil ɓe swaa ɓǝ pǝlli, me ka gak nanǝm ya.
16 Dǝɓlii, mo laɓ me,
Mo soɓ me yea sǝŋ ne cee ka me yea mor ɓo syak ɓo.
17 Ɓǝ swaa lii ɓe a ga fer ciŋ jam.
Amo ǝ̃ǝ me gin zah gaɓ ɓe,
Mo rwah faɓe' ɓe daŋ ge lal ɓe.
18 Koo dǝɓ ma pǝ pal vaŋno ka gak yii mo ya,
Wul ka gak laa ɓǝ goŋga ɓo ka so nyiŋ ɓǝ ah ya.
19 Za mai mo sǝŋ yee yiira mo tǝgbana me tǝ yii mo tǝ'nahko.
Pah wee ga faara ɓǝ goŋga ɓo nyi wee ɓǝǝra.
20 Dǝɓlii, mo laɓ me ɓe!
Pǝ zah'nan cee ɓuu daŋ ru ga woŋ tǝnjuŋ ɗǝǝ lǝŋ yii mo ne pǝ yaŋ ɓo.
21 Fan ah joŋ nai fahfal Esaia mo faa nyi goŋ Ezekias ka mo ge rẽeko wuu mayak ge zah fabaa ah ka mo laɓɓe. 22 Ezekias so fii ko faa: Fan ma cuu nyi me Dǝɓlii ga laɓ me, so me ga yaŋ Masǝŋ kpǝ ko ye fẽe ne ?
© Bible Moundang © Alliance Biblique du Tchad, 1996.
