1 Ne cok zah'nan ah mo ge dai ɓe, ŋwǝǝ rǝŋ a ga gbǝra dǝwor matǝ vaŋno, a ga faara nyi ko: Ru ga kyeɓ farel ɓuu ne fan wo suu ɓuu daŋ ne suu ɓuuru, amma ru pǝǝ mo, mo soɓ ru ɗii mo ne wor ɓuu ka wǝǝ ɓǝ ren swãa tǝtǝl ɓuu ga lal cõmsa!
Yaŋ Jerusalem ga ciŋ fan mafuu ahe
2 Zah'nan ah no ginni, ne cok ah Dǝɓlii ga joŋ fakpãhpǝǝ ne kpuu ma pǝ sǝr ah a giŋ, a yea pǝsãh pǝlli. Za Israel mai tǝtǝl ɓǝǝ mo coŋ ɓo no sǝŋ daŋ a ga yiira suu tǝkine laa pǝ'nyah ne ɓǝ fakpãhpǝǝ mai sǝr ɓǝǝ mo joŋ ɓo. 3 Koo zune mai mo coŋ ɓo yaŋ Jerusalem Masǝŋ mo soɓ ko ɓo no, a ga ɗiira ko ne dǝɓ matǝdaŋdaŋ. 4 Dǝɓlii ga ŋgoŋ kiita tǝ za ne swah ahe, a ga joŋ za Israel nǝǝ pǝfãi, a ga vãh ɓǝɓe' mai Jerusalem mo joŋ tǝkine syim mai mo ɗuu gŋ daŋ ga lalle. 5 Dǝɓlii ga pee swãh ge tǝwaa Sion tǝkine tǝtǝl za mai mo taira ge ɓo gŋ daŋ ne comme. Ne suŋ ɓe, a ga pee suŋwii ne mabǝlaowii ge gŋ. Yǝk Masǝŋ ga rii yaŋ ahe, a ga byak yaŋ ah ne lii ah daŋ. 6 Yǝk Masǝŋ ga gbǝ cee tǝ yaŋ ah ka com mo cwah dǝɓ ka. A ga joŋ yaŋ ah ka jam mo yea gŋ, zyak tǝkine bam ka lwaa gaɓ dǝɓ mai mo kaa ɓo gŋ ya.
© Bible Moundang © Alliance Biblique du Tchad, 1996.
