Dǝɓlii nǝǝ Kirus kanne
1 Dǝɓlii nǝǝ Kirus kan goŋ ne ko! Dǝɓlii kan ko ka mo ɗaŋko za sǝrri, pee ko ka mo gbahko za goŋe, Dǝɓlii ga gbǝr zahfah yaŋ maluu pel ahe. Dǝɓlii faa nyi Kirus: 2 Ame ne suu ɓe me ga zyeɓ fahlii pel ɓo, me ga rǝǝ waa tǝkine gee daŋ zahki, me ga hah zahfah ma vãm ah ra, me ga hah vãm gban ah ra kǝsyil gwa. 3 Me ga nyi joŋ ma pǝ cokfuu ah nyi mo tǝkine mai mo muŋ ɓo syeɓ, ka mo tǝ, ame ye Dǝɓlii Masǝŋ Israel me ye nǝǝ mo ɓo. 4 Me kan mo ɓo ka mo gbah jol za yeɓ ɓe Israel mai me nǝǝ ra ɓo. Amo tǝ me ya, ne daŋ laŋ, me yii mo pǝ'manne, me ɗii mo ne ɗii mayǝk ahe.
5 Ame ye Dǝɓlii, Masǝŋ maki ah kǝka. Amo tǝ me ya, ne daŋ laŋ me ga nyi swah nyi mo na mai mo tǝ 'yahe. 6 Me ga joŋ nai ka dǝfuu ma nyah sǝr nai daŋ mo tǝra, ame ye Dǝɓlii, Masǝŋ maki ah kǝka sai a me to. 7 Ame ye joŋ cokfãi ne cokfuu gwa daŋ, me ye joŋ ɓǝ sãh tǝkine ɓeɓ gwa daŋ ta. Ame Dǝɓlii, me ye joŋ fan marai daŋ. 8 Me ga pee swah daga coksǝŋ tǝ gin sǝŋ na bamme, so sǝr ga nyiŋ swah ahe, a ga lee lee syẽm goŋga tǝkine njaŋ. Ame Dǝɓlii me ye ga joŋ fan ahe.
Masǝŋ ye pa joŋ fan ne pa ma ne ɓǝ daŋ jol ahe
9 Cii mai mo zahki ne manyeeki ah daŋ a syesyel ne pa vuu ah no ne? Vuu a faa nyi pa vuu cii mo joŋ fẽe mai ne no ne? Yeɓ faa nyi pa ma joŋ ah mo joŋ me pǝsãh ya no ne? 10 Wel gak faa nyi zan ah we byaŋ me nai mor fẽene no ne? 11 Dǝɓlii Masǝŋ matǝdaŋdaŋ mǝ za Israel, pa ma zyeɓ fan ma ga joŋ pel faa: We ka ne fahlii ka fii me ne ɓǝ wee ɓe ya, wala ka cuu yeɓ mai ka me joŋ nyi me ya ta! 12 Ame ye Dǝɓ mai me joŋ sǝrri, me so joŋ dǝfuu ka mo kaara gŋ, ame ye joŋ coksǝŋ ɓo ne swah ɓe, me ye ne swah tǝ com ne fĩi tǝkine ŋwǝǝmǝŋgai. 13 Ame ye ur Kirus ka mo joŋko fan mai daŋ me faa ɓǝ ah ɓo ka joŋ baa ga cok ah ne fahlii ahe. Me ga zyeɓ fahlii mai moo ga syeeko gŋ daŋ pel ahe. A ga vuu yaŋ ɓe Jerusalem, a ga wǝǝ za ɓe ma pǝ byak ma zah sǝr za ki myahe. Dǝɓ ka ga soo ko ne lak wala nyi fan nyi ko ɗao ka mo joŋko ɓǝ ah ya. Dǝɓlii ma ne swah daŋ faa naiko.
14 Dǝɓlii faa nyi za Israel: Joŋ sǝr Egiɓ ne ma sǝr Etiopia daŋ a ga ciŋ ma ɓiiri, za sǝr Seba mawah ga ciŋra byak ɓiiri, we ga ɓaa celeelu gai ra jol a ga syeera mor ɓii ne ko, a ga keara sǝŋ pel ɓii a faara: Masǝŋ no ne we, ako ye Masǝŋ syak ah to. 15 Masǝŋ Israel mai mo ǝ̃ǝ zan ahe, ako ye Masǝŋ mai mo muŋ suu ah ɓo zoŋ.
16 Za mai moo zyeɓra masǝŋ ki daŋ swãa ga re ra tǝtǝl ga jin ra pǝryak. 17 Amma Dǝɓlii ye ǝ̃ǝ za Israel, ako ye nyi swah ɓo nyi ra ga lii ga lii, zan ah ka ga cuura swãar a syaŋsyaŋ.
18 Dǝɓlii ye joŋ coksǝŋ, ako ye Masǝŋ to. Ako ye joŋ sǝr kanne, joŋ pǝswah ka mo nǝnni. Joŋ ka mo yea tǝkol a, amma joŋ ka dǝfuu mo kaara gŋ. Ako ye Dǝɓ mai mo faa: Ame ye Dǝɓlii, Masǝŋ maki ah kǝka. 19 Ame faa ɓǝ ah ɓo ka pǝ muŋ ya, wala me muŋ ɓǝ foo ɓe muŋ ɗǝ ya, me faa nyi za Israel sõone mo kyeɓra me haihai ya. Ame ye Dǝɓlii, ame faa goŋga, me faa ɓǝ mai mo ne fahlii ka za daŋ mo laa.
Dǝɓlii tǝkine masǝŋ ki ra ma sǝr Babilon
20 Dǝɓlii faa: Awe za sǝr daŋ, we tai ge. Awe za mai we coŋ ɓo sǝŋ ne cee, we ge faa ɓǝ suu ɓiiri. Za mai mo woora masǝŋ ki ɓǝǝ mai mo zyeɓra ɓo ne kpuu a juura pel wo masǝŋ mai mo ka gak ǝ̃ǝra ya, za mai tǝra fan ki ya. 21 We ge ne ɓǝ ɓii cok kiita, we fii ki ɗao, azu ye faa ɓǝ fan mai mo joŋ ɓo daga kǝpel ɓaa ne? Ame Dǝɓlii mai me ǝ̃ǝ za ɓe ɓo me ye ka faa ya ne? Masǝŋ maki ah na me kǝka.
22 Awe za sǝr daŋ, we pii soo ge wo ɓe zǝzǝ̃ǝko, ame ye Masǝŋ vaŋno to, maki ah kǝka. 23 Ɓǝ mai me faa daŋ goŋga yo, ɓǝ ah ka fer a, ame haa zah ne tǝɗii suu ɓe, zune daŋ a ga kea sǝŋ pel ɓe, a ga haa zah pel ɓe ka joŋ fan matǝ goŋga ah pel ɓe.
24 Za ga faara, dǝɓ gak kaa kacella tǝkine lwaa swah ne me to. Amma za mai mo syiŋra me ɓo daŋ a ga laara bone pǝ'manne. 25 Ame Dǝɓlii me ga ǝ̃ǝ morsǝ̃ǝ Yakuɓ daŋ, so a ga yiira me.
© Bible Moundang © Alliance Biblique du Tchad, 1996.
