1 Ɓǝ in zah masǝŋ ki ra ma sǝr Babilon ge ɓe! Bel ne Nebo mai za mo yea tǝ juura pel wo ɓǝǝra, amma zǝzǝ̃ǝko woora rǝk ɓo tǝ korro, ciŋra faswaa ma ɓaŋ tǝ cel faɓal ɓo o! 2 In zah masǝŋ ki rai yo. Masǝŋ marai ka gak ǝ̃ǝ suu ɓǝǝr a, za nyiŋ ra, so woora kal ne ko.
3 Awe, morsǝ̃ǝ Yakuɓ, za ɓe mai we coŋ ɓo sǝŋ ne cee daŋ, we laa ɓǝ faa ɓe, ame tǝ byak we daga cok byaŋ ɓiiri. 4 Ame ye Masǝŋ ɓiiri, me ga byak we ŋhaa we joŋ zaluu vǝm fãi pǝ̃ǝ tǝtǝl ɓiiri. Ame ye joŋ we, so me foo ɓǝ ɓii me ga gbah jol ɓiiri, me ga ǝ̃ǝ we. 5 Dǝɓlii faa: We ga lii me ne zune? Dǝɓ ma na me no ne? 6 Za gbǝr zah dah ɓǝǝ a dǝǝra vãm kaŋnyeeri gin lalle, a liira vãm solai tǝ kilo so a woora nyi pa cwak ka mo cooko masǝŋ ki ne ko, a so keara ga sǝŋ juupel wol ahe! 7 A ɓaŋra kan tǝbǝǝsah kal ne ko, a ga syiira pǝ cok tǝ vaŋno, a uu gŋ nooko, ka gak tǝɓ gin pǝ cok mai mo syiira ɓo gŋ ga cok ki ya. Dǝɓ mo juupel wol ah ɓe laŋ, ka gak zyii ɓǝ zah ah ya, wala ka gak ǝ̃ǝ ko wo ɓeɓ ya.
8 Awe za faɓe' we foo ɓǝ maiko, we ɓaŋ syiŋ ɓǝ fan mai me joŋ ɓo. 9 We foo ɓǝ fan mai mo joŋ pǝ̃ǝ kal ɓo daga ɓaaɓe, ka we tǝ, ame ye Masǝŋ vaŋno to, maki ah na me kǝka. 10 Daga tǝtǝŋ fan sǝ, me faa ɓǝ fan mai mo tǝ ga ge, me faa ɓǝ fan mai mo tǝ ga joŋ daga kǝpel ɓaa sǝ. Ame faa, ɓǝ ɓe me zyeɓ ɓo ka ga pee bai joŋ ya, ame ga joŋ fan mai daŋ me foo ɓo ka joŋni. 11 Ame ɗii dǝɓ ɓo daga fah morcomzah'nan ka mo geko , a ga tǝ gin tǝgbana matǝrri, a ga joŋ ɓǝ mai me zyeɓ kan ɓo baa ga cok ahe, ame ye faa ɓǝ ah ɓo, so me ga joŋ ɓǝ ahe.
12 Awe za zahzyil yak rai wee foo ǝ̃ǝ a pǝɗǝkki, we laa ɓǝ faa ɓe. 13 Me ga joŋ zah'nan ǝ̃ǝ yea gwari, ka yea pǝɗǝk ya, ɓǝ wǝǝ ɓii mai me faa ɓǝ ah ɓo ka nǝn a. Me ga ǝ̃ǝ yaŋ Jerusalem, me ga yii za Israel gŋ.
© Bible Moundang © Alliance Biblique du Tchad, 1996.
