1 Dǝɓlii faa: We lǝŋ me nĩi za ɓe ɓoo ɓo tǝgbana dǝɓ moo nĩi mawin ah ɓoo syel ko ne? Ko mo nai ɓe, ɗerewol ma syel ah me ŋwǝǝ ɓo a kẽne? We lǝŋ me lee we ge ɓo jol za ki tǝgbana dǝɓ mai moo lea fan ne wee ah ka mo ciŋra byak ne? Ka nai ya. Awe ge ɓo jol za ki mor faɓe' ɓiiri, we ge ɓo gŋ mor ɓǝɓe' ɓii wee joŋni.
2 Ne cok me ge wo za ɓe ka ǝ̃ǝ ra, me lwaa ra ya mor fẽene? Ne cok me ɗii ra, zyiira ɗii zah ɓe ya mor fẽene? Ame ka pǝswah nǝn gak ǝ̃ǝ ra ya ye ne? Me faa ɓǝ nyi mabii ka mo yak ɓe, a yakke, el laŋ, a fer ciŋ cok makol ahe, syiŋ mai mo gŋ daŋ a wukra mor bii kǝka. 3 Me gak fer coksǝŋ joŋ pǝfuu piɓpiɓɓa tǝgbana dǝɓ ma ɓoo mbǝro gban yelle.
Dǝɓ yeɓ Dǝɓlii (Patǝ sai ɓǝ ahe)
4 Dǝɓlii a cuu ɓǝ nyi me ka me faa ɓǝ, ka me gak swaa za mai mo ka pǝswah ya ne ko. Zah'nan Masǝŋ vaŋno vaŋno daŋ a joŋ me ka me yea ne koŋ laa ɓǝ mai mo tǝ ga cuuko nyi me. 5 Dǝɓlii nyi yella nyi me, ame ŋwookyaŋ ne ki wala jiŋ fahfal ɓoo nyi ko ya. 6 Ame jiŋ fahfal kan nyi za mai moo loɓra me, me ɓaŋ mǝmbaŋ kan nyi za mai moo lwǝǝra pyaŋ ɓe. Ne cok mo tǝ tǝǝra me mo tǝ tǝɓra tǝsǝ̃ǝ gai me nahnǝn laŋ, me ka cak ra ya.
7 Amma tǝǝ ɓǝǝ ka syen suu nyi me ya, mor Dǝɓlii tǝ gbah jol ɓe, ame gban suu ɓe ka me rõmme, mor me tǝ ɓe, me ka ga cuu swãar a. 8 Mor Dǝɓlii ne me gwari, a ga cuu ame bai ɓǝ ki. Azu yee gak kyeɓ ɓǝ ne me ne? Ka ru ge pǝ kiita ne ɓǝ ah o. 9 Dǝɓlii ne suu ah a cam tǝ ɓe - azu yee so gak gbǝ me ne ɓǝ ne? Za ma cen me daŋ a ga muŋra, a ga ɓeɓra tǝgbana mbǝro mai tǝsyin moo ceere.
10 Awe za mai daŋ wee ɗuu Dǝɓlii tǝkine syee mor ɓǝ faa dǝɓ yeɓ ahe, koo we tǝ syee pǝ cokfuu laŋ, amma we soɓ suu ɓii wo Dǝɓlii, we gbǝ yǝk ɓǝ Masǝŋ ɓiiri. 11 Awe za mai we zyeɓ ɓǝ ɓo ka muŋ tǝtǝl za ki, ɓǝ foo ɓii ga jin muŋ we. Dǝɓlii ne suu ah ye ga joŋ ɓǝ ahe, in zah ɓii ga yea pǝgaɓ no cam.
© Bible Moundang © Alliance Biblique du Tchad, 1996.
