1 Za zyiira faa: Azu ye gak nyiŋ ɓǝ mai ru tǝ faa ne? Azu ye kwo swah jol Dǝɓlii ɓo pǝzyil yeɓ marai ne? 2 Mor Dǝɓlii a kwan dǝɓ yeɓ ah giŋ tǝgbana kpuu moo jwǝǝ sǝ̃ǝ ga sǝŋ pǝ sǝr mayak ahe, amma wo man dǝfuu na ka kwan yǝk ah wala sãh ah ne nahnǝn man a, kee suu ah laŋ ka ga mor nǝn man a ta. 3 Na syẽa ko, na ɓoo ko ge lalle, rõm bone man ne fasyen mana. Koo dǝɓ vaŋno ma ɓaŋ nahnǝn ẽe ko kǝka, na kwan ko tǝgbana fan kolle.
4 Amma ɓaŋ bone mai mo bone man o, laa fasyen pǝ suu ah pǝ cok mana. Amma ana, na kwan ko tǝgbana Masǝŋ ŋgoŋ kiita ɓo tǝl ahe, tǝ loɓ ko tǝkine cuu bone nyi ko. 5 Lwaa nwãh mor faɓe' mana, loɓra ko mor ɓǝɓe' mai na joŋni. Bone mai mo laako ye wǝǝ na, ana laɓ ɓo mor nwãh mai mo lwaako. 6 Ana daŋ na yea zyak ɓo tǝgbana pǝsǝ̃ǝ moo zyakke, zune daŋ a joŋ fan na ɓǝ foo ah mo foo ɓo. So Dǝɓlii ɓaŋ kiita ɓǝɓe' man daŋ kan ge tǝtǝl ahe.
7 Joŋra ko pǝɓe', amma wonsuu ahe, faa ɓǝ ki ge zah ya, a tǝgbana we pǝsãhm mai mo tǝ ga ŋgoŋra, a tǝgbana pǝsãhm mai mo tǝ saŋra syiŋ ahe, faa ɓǝ ki ge zah ya. 8 Gbǝra ko, ŋgoŋra kiita wul ah tǝl ahe, zaŋra ko kal ne ka ga in ko pǝ wulli, koo dǝɓ vaŋno ɓaŋ syiŋ ah ya. Ira ko pǝ wul mor faɓe' mana. 9 Pal ah kǝsyil za faɓe', ciira ko ne za joŋne, joŋko faɓe' wala gwah ber taa ya.
10 Dǝɓlii faa: Ame ye 'yah ka mo laako bone, soɓ cee suu ah ge pǝ wul joŋ syiŋ ne ka rwah faɓe' ga lalle. So a ga kwoko morsǝ̃ǝ ah ra, zah'nan cee ah ga nǝn wo sǝrri, ɓǝ faa ɓe ga joŋ baa ga cok ah ne fahlii yeɓ ahe. 11 Fahfal bone mai mo laako, a so ga laa pǝ'nyahre, a ga tǝ, bone mai mo laako ɓo ka tǝkol a. Ako ye dǝɓ yeɓ ɓe matǝ njaŋ, a ga ɓaŋ faɓe' za pǝlli, a ga joŋ ra ka mo ciŋra za ɓe masãhe. 12 So me ga nyi cok mayǝk ah nyi ko kǝsyil zaluu ne za maswah ah ra. Mor ako ye soɓ cee suu ah ge pǝ wul ne 'yah zahzyil ahe. Soɓ suu ah keera ko ge kǝsyil za ɓeare. Ɓaŋ cok za faɓe', laa bone zahwaa ɓǝǝra.
© Bible Moundang © Alliance Biblique du Tchad, 1996.
