Gboŋgboŋ Masǝŋ a mor za daŋ
1 Dǝɓlii faa: Koo zune mo ne koŋ bii daŋ, mo ge wo ɓe, bii nyẽeno. Awe za mai we ka ne lakr a, we ge lee sor ka we re, we ge lee bii kpuu vin tǝkine won tǝkolle. 2 Awe ɓeɓ lak tǝ fan mai mo farel ye ka mor fẽene? Awe ɓeɓ lak soo ɓii tǝkol we so yea ne koŋ 'wa mor fẽene? We laa ɓǝ faa ɓe, ka we joŋ fan mai me faa ɓo, we ga re farel masãh ah we laa pǝ'nyah ne ko.
3 Za ɓe, we laa ɓǝ faa ɓe, we ge wo ɓe. We ge wo ɓe ɓe, we ga yea ne cee, me ga gbǝ zah ma ga lii ah ne we, me ga ẽe we ne ẽe mai me faa ɓǝ ah ɓo nyi David. 4 Ame kan dǝɓlii ne ki pel zana, ka mo kwora yǝk ɓe gin wol ahe. 5 Zǝzǝ̃ǝko we ga ɗii za gwǝǝre, ɓaaɓe yea tǝra we ya, amma zǝzǝ̃ǝ mai a ga ɗuura gin wo ɓii ne ɗulli, ame Dǝɓlii Masǝŋ ɓiiri, Masǝŋ Matǝdaŋdaŋ mǝ za Israel, me ye ga joŋ ka fan mai daŋ mo joŋ, me ga joŋ we pǝyǝk tǝkine yii we.
6 We pii soo ge wo Dǝɓlii, we juupel wol ahe, mor zǝzǝ̃ǝko a gwari. 7 Za faɓe' mo soɓra fahlii kal ɓǝǝ mo ferra ɓǝ foo ɓǝǝra, mo gera wo Dǝɓlii Masǝŋ mana, a kwan syak pǝlli, a rõm dǝɓ gwari ta. 8 Dǝɓlii faa: Ɓǝ foo ɓe ka na ɓǝ foo ɓiir a, fahlii ɓe woŋ ki ɓo ne ma ɓii pǝɗǝkki. 9 Tǝgbana coksǝŋ mo sǝŋ pǝɗǝk ne sǝrri, nai ta, fahlii ɓe ne ɓǝ foo ɓe daŋ a pǝɗǝk kal ma ɓii ɓe.
10 Ɓǝ faa ɓe a tǝgbana syaŋ ne bam moo tan coksǝŋ gin sǝŋ, ka sǝr mo lwaa bii, a tan gin ka joŋ fakpãhpǝǝ, a joŋ nah fan ciŋ ka dǝɓ mo lwaa farel ka renne. 11 Ɓǝ faa ɓe me faa ɓo, a ga yea nai ta, ka ga pee bai joŋ fan mai me pee ɓo ka mo joŋko ya, a ga joŋ fan mai daŋ me pee ɓo ka joŋni.
12 We ga zol gin Babilon ne laa pǝ'nyahre, a ga zaŋra we gin yaŋ ah pǝ̃ǝ ne jam. Waa tǝkine gee daŋ a ga 'nyahra suu pel ɓiiri, kpuu ga ɓyaŋra ɓǝ ne laa pǝ'nyahre. 13 Pǝ cok mai kpuu waa mo gŋ mǝŋgiŋ ga joŋ gŋ, pǝ cok mai daŋgǝǝ mo yea gŋ, kǝ̃ǝ ye ga joŋ pǝ cok ahe. Fan mai a ga yea na fan ma cuu fan ga lii, ka za mo foora ɓǝ fan mai ame Dǝɓlii me joŋ ɓo.
© Bible Moundang © Alliance Biblique du Tchad, 1996.
