Za gwǝǝ ga yea kǝsyil za Masǝŋ
1 Dǝɓlii faa nyi zan ahe: Me ga ǝ̃ǝ we gwari, we joŋ fan matǝ njaŋ ah ne matǝ goŋga. 2 Me ga ẽe za mai moo gbanra ɓǝ zah'nan com 'yak mo ka ɓeɓra zah'nan ah ya. Me ga ẽe za mai mo ka joŋra fan maɓea ah ya.
3 Dǝɓ gwǝǝ mai mo ge tai ki ɓo ne za Dǝɓlii mo faako sõone Dǝɓlii ka ga soɓ zye juupel ne zan ah ya ka.
Dǝɓ mai mo syẽe yo, mo faako sõone me ka yea kǝsyil za Masǝŋ ya ka. 4 Dǝɓlii faa nyi za mai mo syẽe yo: We tǝ yii me ne gban zah'nan com 'yak ne joŋ fan ma 'nyah suu ɓe ɓe, so we tǝ joŋ ɓǝ gbanzah ɓe ne goŋga ɓe, 5 a ga foora ɓǝ tǝɗii ɓii pǝ yaŋ juupel ɓe, kǝsyil za ɓe, kal mai wee yea ne wee mawǝǝ ne maŋwǝǝre. Ka ga yaŋra tǝɗii ɓii ya syaŋsyaŋ.
6 Dǝɓlii tǝ faa nyi za gwǝǝ mai mo 'yah ciŋra zan ahe, dǝɓ mo tǝ 'yah ko moo joŋ mor ahe, tǝkine gban ɓǝ zah'nan com 'yak ne syee mor ɓǝ gbanzah ah ne goŋga ɓe, faa sye: 7 Me ga zaŋ we ge Sion tǝ waa ɓe matǝdaŋdaŋ ne ko. Me ga joŋ we laa pǝ'nyah pǝ yaŋ juupel ɓe, me ga nyiŋ syiŋ mai wee joŋ tǝ cok joŋ syiŋ ɓe. Yaŋ ɓe a ga ɗii ne yaŋ juupel mor za sǝr daŋ.
8 Dǝɓlii Masǝŋ mai mo zaŋ zan ah Israel mai mo yeara zah sǝr za ki ge yaŋ ne ko, ako ye so faa zye ga zaŋ za ki ge ne ka taira ne ko.
Dǝɓlii ŋgoŋ kiita tǝ zaluu Israel
9 Dǝɓlii faa nyi za gwǝǝ ka mo gera tǝgbana fan cokki, mo rera nǝǝ zan ahe. 10 So faa: Zaluu mai mo lǝŋra rǝ ye za lai za ɓe daŋ rǝ̃ǝra ɓo rǝ̃ǝ, tǝra fan ki ya. Ara tǝgbana goo ma byak cok mai mo ka ruruu ya, a swanra cẽe ga tǝki nanǝmmi, a yeara ma ne lolomme, a 'yahra nǝm pǝlli. 11 Ara tǝgbana goo mai koŋ moo in pǝlli, mo ka gak kǝ̃ǝ fan a, ara ye zaluu mai mo ka ne tǝtǝl a. Zune kǝsyil ɓǝǝ daŋ a joŋ fan mai zahzyil ah mo 'yah tǝkine kyeɓ fan mor suu ahe. 12 A faara: Na ge kyeɓ yim ka na zwah tǝgbana zahzyil man mo 'yahe! Tǝ'nan laŋ fazwan ga kal ma tǝ'nahko!
© Bible Moundang © Alliance Biblique du Tchad, 1996.
