1 Me ga faa ɓǝ ka swaa Jerusalem ne ko, me ka yea zah ɓe ya, sai ka ǝ̃ǝko ɓe, kacella ah mo ne ko a sǝǝ tǝgbana wii moo sǝǝ ne suŋni. 2 Jerusalem, za sǝr ga kwora mo kaa kacella ɓo! Za goŋ ɓǝǝ daŋ a ga ẽera yǝk ɓo, a ga ɗiira mo ne tǝɗii mafuu mai Dǝɓlii ne suu ah mo ɗii mo ɓo ne ko. 3 Mo ga yea wo Dǝɓlii tǝgbana njok masãh ahe. 4 Ka ga ɗiira mo ne Yaŋra-Ɓe faɗa yao, wala ka ga ɗiira sǝr ɓo ne Mawin-Ma-Bai-Wor faɗa yao, tǝɗii ɓo mafuu a ga ɗii ne Masǝŋ-Laa-Pǝ'nyah-Ne-Ki. A ga ɗiira sǝr ɓo ne Mawin-Ma-Kan-Worre, mor Dǝɓlii tǝ laa pǝ'nyah ne mo, a ga yea wo sǝr ɓo tǝgbana wor ahe. 5 Dǝɓlii ga ɓaŋ mo tǝgbana tǝbanna moo ɓaŋ winni, we ga laa pǝ'nyah wo ki tǝgbana woi moo laara ki pǝ'nyah ne wor ahe.
6 Jerusalem, me rǝk za byak cok ɓo tǝ ɓaale ɓo sǝŋ. Com ne suŋ daŋ ka yeara zah ya. A ga joŋra Dǝɓlii foo ɓǝ faa ah mo faa ɓo, ka soɓra ko yaŋ ya syaŋsyaŋ. 7 Ka ga soɓra ko 'yak ya, sai ka zyeɓ Jerusalem uu pǝsãh joŋ yaŋ ah na yaŋ mayǝk ah wo dunia daŋ ɓe.
8 Dǝɓlii haa zah ne suu ahe, so swah ah ye ga joŋ ɓǝ faa ahe: Za syiŋ ɓo ka ga rera sor ɓo ya, za gwǝǝ ka ga zwahra bii lee kpuu vin ɓo ya ta. 9 Amma awe za ma pǝǝ sor ah we so ga tai fagwahl ahe, we ye ga re fan ahe, we ga joŋ osoko nyi Dǝɓlii. Awe za mai we ŋhǝǝ lee kpuu vin ahe, we ye ga zwah bii ah zah yaŋ ɓe.
10 Za yaŋ Jerusalem, we pǝ̃ǝ ge lalle, we zyeɓ fahlii mor za ɓii mai mo tǝ piira soo gin yaŋ. We zyeɓ fahlii malii ahe, we nǝǝ tǝsal gŋ ge lalle. We ɓaŋ tutowal ge sǝŋ ka za sǝr mo tǝra, 11 Dǝɓlii tǝ faa ɓǝ nyi za sǝr daŋ: We faa nyi za yaŋ Jerusalem, Dǝɓlii pa ǝ̃ǝ ɓii tǝ ginni, woo zan ah mai mo wǝǝra ɓo mor jol tǝ gin ne ko. 12 A ga ɗiira we ne Za-Masǝŋ-Matǝdaŋdaŋ, za mai Dǝɓlii mo ǝ̃ǝ ra ɓo. A ga ɗiira Jerusalem ne Yaŋ-Mai-Masǝŋ-Mo-Tǝ-'Yahe, yaŋ mai Masǝŋ mo ka yaŋ ya.
© Bible Moundang © Alliance Biblique du Tchad, 1996.
