Kiita Masǝŋ tǝtǝl za ma ŋwookyaŋ
1 Dǝɓlii faa: Me kaa ɓo ne ɓal ka laa juupel za ɓe, amma ka juura pel a. Me kaa ɓo ne ɓal mai ka me cuu suu ɓe nyi ra, amma ka kyeɓra me ya. Me kaa ɓo ne ɓal ka laa juupel ɓǝǝ ka faa: Ame nyẽeno, me ga gbah jol ɓiiri, so za ka juura pel wo ɓe ya. 2 Me kaa ɓo ne ɓal mai ka me nyiŋ za ma ŋwookyaŋ rai moo joŋra faɓe', mo ɓaŋra fahlii suu ɓǝǝ ɓo. 3 A ɓeɓra zahzyil nyi me, kǝǝ me ɓaŋ kpãhe. A joŋra syiŋ pǝ 'wahe, a tǝǝra ɓǝrdi tǝ cok joŋ syiŋ za gwǝǝre. 4 Ne suŋ daŋ a gara pǝ yii tǝkine cok mai pal mo gŋ ka fii mǝǝzuwuŋ wulli. A renra nǝǝ billi, a renra farel mai mo joŋra ɓo ne nǝǝ mai za bai iŋ moo joŋ syiŋ ne ko. 5 So a faara nyi za ki mo gera wo ɓǝǝ gwari ka, mor ara daŋdaŋ pǝlli, ka nǝn mai za mo juu ra ya. Me ka gak rõm kaa ne za ma morãi ya. Me ɓaŋ kpãh ɓo tǝ ɓǝǝ pǝcwak tǝgbana wii mai mo ka rum ya.
6 Ame zyeɓ ɓǝ kiita ɓǝǝ kan ɓo, ɓǝ ah ŋwǝǝ ɓo ŋwǝǝre. Me ka gak kaa ẽe fan mai moo joŋra ne nahnǝn a, amma me ga soo ra 7 mor faɓe' ɓǝǝ tǝkine mǝ pa ɓǝǝ lii ra daŋ, mor tǝǝra ɓǝrdi tǝ waare, so faara ɓǝɓe' tǝ ɓe. Me ga ŋgoŋ kiita tǝ ɓǝǝ tǝgbana fan joŋ ɓǝǝ moo joŋra.
8 Dǝɓlii faa: Koo dǝɓ vaŋno ka ɓeɓ lee kpuu vin masãh ah ya, amma a ŋhǝǝ bii ahe. Nai ta, me ka ga muŋ za ɓe daŋ ya, amma me ga ǝ̃ǝ za mai mo tǝ joŋra mor ɓe. 9 Me ga ẽe za Israel mai ara mo mor ban Yuda, wee ɓǝr ɓǝǝ a ga rera sǝr ɓe mai mo ne waare. Za ɓe mai me nǝǝ ra ɓo mo tǝ joŋra mor ɓe, a ga kaara gŋ. 10 A ga juura pel wo ɓe, a ga nĩira pǝsǝ̃ǝ ɓǝǝ ne dǝǝ ɓǝǝ ga pǝ cok pii fan matǝ gbai ah ne Saron nǝfah kǝmorcomlilli, tǝkine pǝ el Akor nǝfah kǝmorcomzah'nanne.
11 Amma awe za mai we yaŋ me, we ka gban yǝk Sion waa ɓe matǝdaŋdaŋ ya, wee juupel wo masǝŋ Gad mai moo kan pejii nyi dǝɓɓi ne sǝǝ syiŋ wo masǝŋ Meeni mai moo zyeɓ fahlii pel dǝɓɓi, ɓǝ ma ɓii ka ga yea nai ya. 12 Amma me ga soɓ we, ka we wǝ wul magaɓ ahe, mor ne cok me ɗii we ɓe, we ka zyii ɗii zah ɓe ya, me faa ɓǝ nyi we ɓe, we ka zyii laa ɓǝ faa ɓe ya ta. We nǝǝ fahlii mai ka we laa zah ɓe ka ɓo, we joŋ faɓe' ɓo wo ɓe. 13 Ame faa nyi we, za mai moo juura pel wo ɓe tǝkine laa zah ɓe a ga lwaara farel tǝkine fazwan pǝlli, amma ma ɓii koŋ farel tǝkine koŋ fazwan ga i we. A ga laara pǝ'nyahre, amma ma ɓii swãa ga re we. 14 A ga ɗǝǝra lǝŋ ne laa pǝ'nyahre, amma we ga yeyee, zahzyil ga nǝǝ we. 15 Za ɓe mai me nǝǝ ra ɓo a tǝǝra tǝɗii ɓii tǝǝre. Ame Dǝɓlii Masǝŋ me ga ik we pǝ wulli. Amma me ga ɗii za mai moo laara zah ɓe ne ɗii mafuu ahe. 16 Koo zune mo tǝ fii ẽe daŋ a ga fii ka Masǝŋ matǝ goŋga ye mo ẽe ko. Koo zune mo tǝ haa zahe, a ga haa pǝ tǝɗii Masǝŋ matǝ goŋga. Gaɓ ma kǝpel mo yea daŋ a ga kal we yaŋ ɓǝ ahe.
Coksǝŋ mafuu ne sǝr mafuu ahe
17 Dǝɓlii faa: Ame joŋ coksǝŋ mafuu ne sǝr mafuu ahe. Fan matãa mo yea daŋ za ga yaŋ ɓǝ ah belbelle. 18 We 'nyah suu, we laa pǝ'nyah ne fan mai me joŋ ɓo ga lii. Jerusalem mafuu mai mee ga joŋ, a ga yea pǝ'nyah pǝlli, zan ah ga laara pǝ'nyahre. 19 Ame ne suu ɓe me ga laa pǝ'nyah ne yaŋ Jerusalem ne zan ah daŋ pǝlli. Yee ka ga yee gŋ ya, za ka ga fifii gŋ ka dǝɓ mo gbah jol ɓǝǝr a ta. 20 Welaŋ mai mo joŋ syii pǝlli ya ba ka ga wǝ gŋ ya, koo dǝɓ tam mai syii ah mo baa ɓo o laŋ ka ga wǝ ya. Dǝɓ mai mo kaa ɓo gŋ koo mo joŋ syii temere mo wǝ ne ɓe laŋ, a ga yea pǝlaŋ 'wa. Dǝɓ mo wǝ mo dai syii temere ya ɓe, ka ɓǝ ah a no na fan ma cuu Dǝɓlii ŋgoŋ kiita ɓo tǝl ahe. 21-22 Za ga vuura yaŋ ka kaa gŋ, amma ka mor ka za ki ye mo ge kaara gŋ ya, a ga peara kpuu vin, a ga zwahra bii lee kpuu vin ahe, za ki ye ka zwah ya. Za ɓe ga nǝnra wo sǝr liilii tǝgbana kpuu, a ga laara pǝ'nyah ne fan mai mo joŋra yeɓ mor ahe. 23 Yeɓ mai mo joŋra daŋ ka ga gaɓ ra gŋ tǝkol a, wee ɓǝǝ ka ga zyaŋra ne ɓeɓ ya. Me ga ẽe ra tǝkine wee ɓǝr ɓǝǝ ma fahfal ɓǝǝ daŋ. 24 Koo mo tǝ juura pel wo ɓe mo ɓah inra zah ah ya ba laŋ, me ga hǝǝ laa juupel ɓǝǝra. 25 Goobam ne wee pǝsǝ̃ǝ a ga rera wom cok vaŋno. Ɓol ga rera wom tǝgbana dǝǝ, soo ka ga loŋ za yao. Ɓǝɓe' wala fan maɓea ah ka ga yea tǝwaa Sion ɓe matǝdaŋdaŋ ya.
© Bible Moundang © Alliance Biblique du Tchad, 1996.
