Dǝɓlii ŋgoŋ kiita tǝ za sǝrri
1 Dǝɓlii faa: Coksǝŋ cok kal ɓe yo, sǝr cok rǝk ɓal ɓe yo, we ga vuu yaŋ ne cok kal mafẽe ah ka me kaa gŋ sye ne? 2 Fan mai daŋ ame ye joŋni! Ame laa pǝ'nyah ne dǝɓ ma wonsuu ahe, mai moo toobii moo ɗuu gal ɓe tǝkine laa zah ɓe.
3 Za joŋra fan tǝgbana mai zahzyil ɓǝǝ mo 'yahe, a ŋgoŋra fan joŋ syiŋ ne ko, a joŋra ne pǝsãhmme, wala a haora sol nyi goo ko a joŋra ne ko, a joŋra ne sorre, wala ne syim billi, a tǝǝra ɓǝrdi wala a juura pel wo masǝŋ ki. Laara pǝ'nyah ne fan joŋ ma bai swãa ah moo joŋra. 4 Me ga pee ɓeɓ mai za moo ɗuu gal ah gin tǝ ɓǝǝra, mor ne cok me ɗiɗii, koo dǝɓ vaŋno zyii zah ɓe wala laa ɓǝ faa ɓe ya. Nǝǝra fahlii bai laa zah ɓe tǝkine joŋ ɓǝɓe'.
5 Awe za mai wee ɗuu Dǝɓlii tǝkine laa zah ahe, we laa, Dǝɓlii faa sye: Awe ye za tǝ goŋga wo ɓe, mor ah za ɓii syiŋra we, ka 'yahra ɓǝ ɓiir a. A tǝǝra we, a faara: Ru 'yah ka ru kwo we tǝ laa pǝ'nyahre, Dǝɓlii mo cuuko yǝk ah ka mo ǝ̃ǝko we. Amma swãa ga re ra. 6 We laa cii kyaŋ mai mo tǝ cii tǝgǝǝ yaŋ ɗǝ, cii ah tǝ cii yaŋ Masǝŋ cii kyaŋ Dǝɓlii mo tǝ ŋgoŋ kiita tǝ za syiŋ ah yo.
7 Yaŋ ɓe matǝdaŋdaŋ a tǝgbana mawin mai moo byaŋ wel gwari nai sǝ, ɓǝr mo ka syen a. 8 Azu ye kwo wala laa ɓǝ fan ma morãi taa ne? Sǝr gak ciŋ na sǝr com vaŋno no ne? Sion ka ga laa bone liilii kǝpel mai zahban ma kaa gŋ moo byaŋ ya. 9 We lǝŋ me ga joŋ za ɓe ka mo byaŋra, me ka so soɓ ra byaŋ ya ne? Ame Dǝɓlii me faa naiko.
10 We laa pǝ'nyah ne yaŋ Jerusalem, we 'nyah suu ne ɓǝ ahe, awe za mai we tǝ 'yah yaŋ nyẽeko, za mai we tǝ yeyee tǝl ah daŋ, we laa pǝ'nyah ne ki zǝzǝ̃ǝko. 11 We ga laa pǝ'nyah ne ɓǝ jam mai mo gŋ, tǝgbana we mai moo laa pǝ'nyah ne won mamme.
12 Dǝɓlii faa: Me ga nyi jam ma fahfal tǝ lii ah nyi we, joŋ za sǝr daŋ a ga ɗuu ga wo ɓii tǝgbana bii mai moo ɗuu pǝ el mo ka yak ya. We ga yea tǝgbana we mai mam moo wolle, moo ɓaŋ gban tǝ jol moo 'yah ko. 13 Me ga kǝǝ we ɓǝr yaŋ Jerusalem tǝgbana ma wel moo kǝǝ wel ahe. 14 Ne cok we kwo fan ah mo tǝ joŋ ɓe, we ga laa pǝ'nyahre, ɓǝ ah ga nyi swah nyi we, we ga yea jam. So we ga tǝ, ame Dǝɓlii me gbah jol za mai moo laara zah ɓe, me ɓaŋ kpãh tǝ za syiŋ ɓe.
15 Dǝɓlii ga ge ne wii, a ga yee tǝ zyak mǝǝzuwuŋ ge ne ka ŋgoŋ kiita tǝ za mai mo tǝ joŋ kpãh ne ra. 16 Dǝɓlii ga ŋgoŋ kiita tǝ za sǝr mai daŋ mo lwaa ra ɓo pǝ faɓe' ne wii tǝkine kafahe, a ga wukra.
17 Dǝɓlii faa: In zah za mai moo joŋra suu ɓǝǝ ka syeera ga pǝ 'wah pǝ cok juupel za bai iŋni, mai moo renra billi, ne gee, tǝkine farel maɓea ah daŋ, zah'nan ah gwari. 18 Me tǝ ɓǝ foo ɓǝǝ ne yeɓ ɓǝǝ ɓe.
Me ga ge ka tai za sǝr daŋ. Ne cok mo taira daŋ ɓe, a ga kwora fan mai me ga joŋ ne swah ɓe. 19 So a ga tǝra, ame ye Dǝɓ ma ŋgoŋ kiita tǝ ɓǝǝra. Amma me ga pee za manyeeki ah mai mo ǝ̃ǝra ɓo kǝsyil ɓǝǝ ga wo za sǝr maɗǝk ah mai mo laara tǝɗii ɓe ya, wala mo kwora yǝk ɓe ne swah ɓe ya. Me pee ra ga sǝr Espania ne Libia tǝkine Lud mai moo 'nǝǝra saŋne, ne Tubal tǝkine sǝr Grek. A ga cuura yǝk ɓe kǝsyil za sǝr maraiko. 20 A ga woora wee pa ɓii mai mo kǝsyil za sǝr manyeeki ah pii soo gee me ne tǝgbana fan ɗǝǝ cok kolle. A ga woora ra ge tǝ waa ɓe matǝdaŋdaŋ yaŋ Jerusalem ne ko tǝ pǝrri, tǝ pǝr ma ɗii ne facwǝ̃ǝre, tǝ njoŋnjoŋ, tǝ muŋta dǝǝ tǝkine tǝ ɗeere, tǝgbana za Israel moo woora fakpãhpǝǝ pǝ tahsah masãh ah ga pǝ yaŋ Masǝŋ ne ko. 21 Me ga joŋ za ki kǝsyil ɓǝǝ ciŋ za joŋzahsyiŋ ne Lewitien.
22 Tǝgbana coksǝŋ mafuu ne sǝr mafuu moo ga yea pel ɓe, wee ɓǝr ɓii tǝkine ɗii ɓii ga yea pel ɓe nai ta. 23 Dǝɓlii faa: Ne cok joŋ fĩi ma ciŋ fuu daŋ, ne zah'nan com 'yak daŋ, za sǝr daŋ a ga gera yaŋ Jerusalem nyee ka juupel wo ɓe. 24 Ne cok mo tǝ jinra gao ɓe, a ga kwora wul za mai mo ŋwoora kyaŋ ne me, cwǝ̃ǝ mai mo tǝ ren ra ka wuk ya syaŋsyaŋ, wii mai mo tǝ syen ra laŋ ka ga rum ya ta. Ɓǝ ah ga syii suu nyi za daŋ.
© Bible Moundang © Alliance Biblique du Tchad, 1996.
