Ɓǝ tǝ goŋ Akas
1 Ne cok goŋ Akas we Yutam we Osias mo kaa goŋ Yuda, sal ur ne ko. Rezin goŋ sǝr Siria ne Peka we Remalia goŋ Israel, ge ruura sal ne yaŋ Jerusalem , amma gak ka renra ya. 2 Ɓǝ ah cii ge dai goŋ Yuda faa: Sooje sǝr Siria gera ɓo pǝ sǝr Israel, gal re goŋ ne zan ah daŋ pǝlli, ŋhaa a coora makmak ne galle, tǝgbana kpuu mai zyak moo laŋni.
3 Dǝɓlii faa nyi Esaia: Amo ne we ɓo Sear-Jasuɓ , we ge zyaŋ ne Akas pǝ cok mai fahlii bii mo ge i zah ɓo gŋ ka yee ga sǝŋ ah tǝ fahlii 'wah pǝ cok mai za kaŋ zyim moo joŋra yeɓ gŋ. 4 Mo faa nyi ko: Mo kaa 'wa, mo ɗuu gal ka. Zahzyil mo nǝǝ mo tǝ kpãh mai goŋ Rezin ne Sirien ah ne mǝ goŋ Peka mo ɓaŋra ɓo ka. Mor kpãh ɓǝǝ ka ne yeɓ yao, a tǝgbana suŋwii kpuu mai wii ah mo sye vǝr ɓe. 5 Za sǝr Siria ne Israel tǝkine goŋ ɓǝǝ zyeɓra kǝnah ɓǝ ɓo, 6 ka rǝ ɗaŋ sǝr Yuda, ka joŋ zan ah ka gal mo re ra, mo so nyira jolle, ka so ɓaŋ we Tabeal kan goŋ ne ko.
7 Amma ame Dǝɓlii me ye tǝ faani, fan mai ka joŋ ya syaŋsyaŋ. 8 Mor fẽene? Mor swah sǝr Siria kal swah yaŋ Damaskus ya, swah mǝ Damaskus laŋ kal swah goŋ Rezin ya. Mǝ Israel sye, syii jemma yea tǝtǝl dappe ka kal a, sǝr ah ga ɓeɓɓe, ka ga yeara ne sǝr ao. 9 Mor sǝr Israel kal swah yaŋ Samaria ya, swah mǝ Samaria laŋ kal goŋ Peka ya.
We gbǝ ɓǝ faa ɓe ya ɓe, we ka ga yea ya.
Fan ma cuu ɓǝ Imanuel
10 Dǝɓlii pee Esaia wo Akas ne ɓǝ maki ah faɗa, faa: 11 Mo fii Dǝɓlii Masǝŋ ɓo ka mo cuuko fan ma cuu fan nyi mo, koo fan ah moo gak yea mor sǝr pǝɗǝk pǝ cok mai za wul mo gŋ, wala moo gak yea coksǝŋ daŋ. 12 Akas zyii faa: Me ka fii ya, me ka lii Dǝɓlii lii ya ta.
13 Esaia so faa: Mo laa ɗao morsǝ̃ǝ goŋ David, gaɓ mai mo tǝ gaɓ za ne kii ya, mo so kyeɓ ka gaɓ Masǝŋ ta ne? 14 Zǝzǝ̃ǝko, Dǝɓlii ne suu ah a ga cuu fan ma cuu fan nyi mo. Mǝlaŋ pǝwoi ga gbǝ ɓilli, a ga byaŋ we worre, a ga ɗiira ko ne Imanuel, tǝgba faa: Masǝŋ no ne na. 15 Ne cok mo ge joŋko dǝɓlii kii nǝn pǝkoŋ woŋ kǝsyil ɓǝ ɓe, farel ah ye ga yea won ne manǝm tǝnjwǝǝre. 16 Kǝpel ka cok ah ge ya ba, za goŋ matǝ gwa mai moo joŋra wee ɗuu galle, sǝr ɓǝǝ ga ciŋ cok kolle.
17 Dǝɓlii ga soɓ gaɓ ge tǝ ɓo ne za sǝr ɓo ne za yaŋ ɓo, daga cok goŋ Israel mo woŋra ki ne goŋ Yuda, - gaɓ ma na mai ge taa ya - a ga pee goŋ Asiria ge!
18 Ne cok zah'nan ah mo ge ɓe, Dǝɓlii ga soɓ Egiɓien ge tǝ ɓii tǝgbana kŋ mai mo jol el Nil maɗǝk ah ge, a ga soɓ Asirien pǝ̃ǝ pǝ sǝr ɓǝǝ ge tǝ ɓii tǝgbana kŋ tǝnjwǝǝre. 19 A ga gǝrra ki pǝ elle, ne pǝ yii ma tǝgǝǝ tǝsalle. A ga koora waa tǝkine cok pii fan daŋ kǝrikki.
20 Ne cok zah'nan ah mo ge ɓe, Dǝɓlii ga pee nyahswãh sõo tǝtǝl daga kah el Efrat nǝzakǝŋhaa ge, ako ye goŋ Asiria. A ga sõo pyaŋ ɓii ne rĩi tǝtǝl tǝkine syiŋ ma wo suu daŋ ga lalle.
21 Ne cok zah'nan ah mo ge ɓe, koo dǝɓ mo ne dǝǝ matam vaŋno ne pǝsǝ̃ǝ gŋ gwa to laŋ, 22 a ga wuu won nyi pǝlli, ŋhaa a kii ko. Oho, tǝcoŋ dǝfuu mai mo pǝ sǝr ah daŋ, a ga lwaara won tǝkine manǝm tǝnjwǝǝ ka renne.
23 Zah'nan ah mo ge ɓe, 'wah kpuu vin mai moo yea ne kpuu ah gŋ ujenere, 'wah ah moo joŋ lak vãm solai ujenere vaŋno, 'wah ah a ga ciŋ sãhm tǝki ne waa. 24 Koo dǝɓ vaŋno ka gak ga gŋ ya, sai ka ɓaŋ guu ɓo tǝkine saŋne. Oho, sǝr ah ne lii ah daŋ a ga ciŋ sãhm tǝkine waa. 25 Gee mai mo yea tǝ pǝǝra fakpãhpǝǝ gŋ daŋ a ga ciŋ sãhm tǝkine waa, koo dǝɓ vaŋno ka ga gŋ ya. A ga ciŋ cok pii dǝǝ tǝkine pǝsǝ̃ǝre.
© Bible Moundang © Alliance Biblique du Tchad, 1996.
