Haozah woli
1 Ame Yakuɓ dǝɓ yeɓ Masǝŋ ne Dǝɓlii Yesu Kristu, me ŋwǝǝ leetǝr mai wo zahban matǝ jemma tǝ gwa mo myahra ɓo wo sǝrri. Me haozah wo ɓii daŋ.
Iŋni ne fatanne
2 Wee pa ɓe, koo we tǝ laa bone camcam laŋ, we laa pǝ'nyahre. 3 Mor we tǝ ɓe, bone mo lii iŋ ɓii ɓe, ɓǝ ah joŋ ɓo ka we rõmme. 4 Amma we joŋ yella ka rõm ah mo yea ne lee syẽm masãhe, ka we yea za tǝ goŋga bai ɓǝɓe' tǝɗe', fan ki mo pee ɓo wo ɓii ka.
5 Amma dǝɓki kǝsyil ɓii mo ka ne fatan a ɓe, mo fiiko jol Masǝŋ, a ga nyi nyi ko. Mor ako yee nyi fan nyi za daŋ ne zahzyil vaŋno bai fãh dǝɓɓi. 6 Amma mo fiiko ne iŋni, bai syesyelle. Mor dǝɓ moo syesyel a tǝgbana bii mabii mai zyak moo ɓaŋ ga kǝino, ɓaŋ ga kǝino. 7 Ka dǝɓ ah mo lǝŋ sõone zye ga ɗǝǝ fan ki jol Dǝɓlii no ka. 8 Mor dǝɓ ah zahzyil ah a fer cẽecẽe, ka tan in zah fan mai mo tǝ joŋko ne suu ah laŋ ya.
Pa syak ne pa joŋne
9 We pam mai mo pǝsyakke, mo laako pǝ'nyah ne cok Masǝŋ mo ɓaŋ ko yii ge ɓo sǝŋ. 10 Amma we pam mai mo pa joŋ yo, mo laako pǝ'nyah ne cok Masǝŋ mo tǝr ko ɓo. Mor pa joŋ a ga vǝr tǝgbana fãi fanne. 11 Mor com mo coo pǝ'man ɓe, a roɓ kpuu ah a yakke, fãi ah a 'mǝr ga sǝŋ, sãh ah a vǝrri. Pa joŋ laŋ yeɓ ah ra nai ta.
Lii tǝkine kǝǝre
12 A pǝ'nyah wo dǝɓ mai mo rõm uu pǝswah ne cok bone mo tǝ lii ko. Amma mo leeko gŋ ya ɓe, a ga lwaa cee ma ga lii mai Dǝɓlii mo faa ɓǝ ah ɓo ka nyi nyi za ma 'yahra ko. 13 Ne cok faɓe' mo kǝǝ dǝɓ ɓe, dǝɓ ah mo faa sõone Masǝŋ ye kǝǝ zye ɓo ne ka. Mor ɓǝɓe' ka kǝǝ Masǝŋ ya, Masǝŋ laŋ ka kǝǝ dǝɓ joŋ faɓe' ya ta. 14 Amma koo zune daŋ fan cwaa suu ah yee kǝǝ ko, a 'nahm ko ne waa ko. 15 Ne cok cwaa fan mo gbǝ ɓil ɓe, a byaŋ faɓe', so faɓe' ah mo swaa pǝ'man ɓe, a byaŋ wulli.
16 Wee pa ɓe mai me 'yah we, we zyak suu ɓii ka. 17 Fan ɗǝǝ malii ah ne masãh ah daŋ a gee coksǝŋ wo Masǝŋ pa joŋ cokfãi ma coksǝŋ ginni, ka ne zahzyil gwa ya, cee fan ka fer wol ah ya ta . 18 Ako ye bem na ne 'yah zahzyil ah ne ɓǝ goŋga, mor ka na yea na lee syẽm fan ma kǝpel kǝsyil fan joŋ ahe.
Laa ɓǝ Masǝŋ tǝkine joŋ ɓǝ ahe
19 Wee pa ɓe mai me 'yah we, we yaŋ ɓǝ mai ka: koo zune mo laako sok gwari, amma mo faako ɓǝ gwari ka, mo ɓaŋko kpãh gwari ka ta. 20 Mor dǝɓ mo ɓaŋ kpãh ɓo ɓe, ka joŋ fan matǝ njaŋ mai Masǝŋ mo 'yah ɓo ne ya. 21 Mor ahe, we ɓaa ɓǝ 'nahm tǝkine ɓǝɓe' mai mo wo ɓii daŋ ge lalle, ka we nyiŋ ɓǝ mai Masǝŋ mo faa ɓo nyi we ne wonsuu, a gak ka ǝ̃ǝ mazwãhsuu ɓiiri.
22 We zyak suu ɓii ne laa ɓǝ Masǝŋ ne sok to ka, amma we joŋ ɓǝ ah ta. 23 Mor dǝɓ mo laa ɓǝ faa Masǝŋ mo nyiŋ ɓǝ ah ya ɓe, ka a tǝgbana dǝɓ ma ẽe suu ah pǝ fakwancee. 24 A ẽe suu ahe, so a kalle, ne pel sǝ a yaŋni, zye jur zu ɓo ne, ka tan ao. 25 Amma dǝɓ mai moo yea ne ẽe pǝ ɓǝ lai matǝ goŋga mai moo wǝǝ dǝɓɓi, mo so tǝ syee mor ah bai yaŋ ɓǝ ah moo joŋ ɓǝ ah taa ɓe, dǝɓ ah Masǝŋ ga ẽe ko pǝ fan joŋ ahe.
26 Dǝɓ mo lǝŋ zye tǝ syee mor ɓǝ iŋni, so mo byakko tǝrĩi ah ya ɓe, ka ako ye tǝ zyak suu ahe, syel ah mo tǝ syee mor ɓǝ iŋ ka a tǝkolle. 27 Syee mor ɓǝ iŋ masãh ma bai 'nahm ah mai Masǝŋ Pa man mo tǝ 'yahe, ako ye mai ka dǝɓ mo gbah jol wee syel ne ŋwǝǝ wul pǝ bone ɓǝǝra, amma dǝɓ ah mo byakko suu ah wo ɓǝɓe' ma wo sǝr ta.
© Bible Moundang © Alliance Biblique du Tchad, 1996.
