Tola ne Jair kaara ne yeɓ zaluu za Israel
1 Fahfal Abimelek, Tola we Puwa we Dodo dǝɓ ban Isakar ur ka ǝ̃ǝ za Israel. Kaa tǝ waa Efraim pǝ yaŋ Samir. 2 Kaa ne yeɓ dǝɓlii za Israel syii jemma gwa tǝ sai. Fahfal ah wuu, ciira ko Samir.
3 Fahfal ah Jair ma Giliat urri, kaa ne yeɓ dǝɓlii za Israel syii jemma gwa tǝ gwa. 4 A ne wee wǝǝ jemma sai, a yeera ma tǝ korro daŋ, ara ne yaŋ jemma sai ta, a ɗiira yaŋ ah ra ne yaŋ Jair ŋhaa tǝ'nahko. Yaŋ ah ra a pǝ sǝr Giliat. 5 So Jair wuu, ciira ko Kamon.
Ammonien gaɓra za Israel
6 Za Israel so tǝŋ joŋra faɓe' wo Dǝɓlii faɗa. Syeera mor Ba'al ne Astarte, ne masǝŋ za Siria, ne mǝ za Sidon ne mǝ za Moab ne mǝ Ammonien tǝkine mǝ Filistien. Soɓra Dǝɓlii ɓoo, syeera mor ah ya. 7 So Dǝɓlii ɓaŋ kpãh tǝ za Israel pǝ'manne. Soɓ ra ge jol Filistien ne Ammonien. 8 Gaɓra za Israel tǝkine cuura syak nyi ra syii ah ra pǝlli. Gaɓra za Israel mai mo no kah el Yordan nǝfah kǝmorcomzah'nan pǝ sǝr Amorien mai mo Giliat syii jemma tǝ nama. 9 Ammonien a yeera el Yordan mor ka gin ruu sal ne za Yuda ne Benyaamin tǝkine Efraim daŋ. Za Israel laara bone pǝlli.
10 So za Israel yera yee wo Dǝɓlii faara: Ru joŋ faɓe' ɓe, mor ru soɓ Masǝŋ ɓuu ru so kal tǝ syee mor Ba'al ra.
11 Dǝɓlii faa nyi za Israel: Ne cok Egiɓien ne Amorien, Ammonien, Filistien, 12 Sidonien ne Amalekien tǝkine Maonien mo tǝ cuura syak nyi we, so we yeyee wo ɓe, me ǝ̃ǝ we jol ɓǝǝr a ne? 13 Amma awe, we soɓ me ɓoo, we so kal tǝ syee mor masǝŋ ki ra. Mor ahe, me ka so fǝ̃ǝ ǝ̃ǝ we yao. 14 We gyo, we ge yeyee wo masǝŋ mai we syen ra ɓo, ka mo ǝ̃ǝra we ne cok bone ɓii we gŋ o.
15 Za Israel faara nyi Dǝɓlii: Ru joŋ faɓe' ɓe, mo joŋ wo ɓuu tǝgbana mai mo 'yahe, amma fan vaŋno mo ǝ̃ǝ ru tǝ'nahko. 16 Woora masǝŋ ki mai mo jol ɓǝǝ myahra ge lalle, so kal ne syeera mor Dǝɓlii. So Dǝɓlii gak rõm ka ẽe bone za Israel ne nahnǝn ga lii nai yao.
17 Ammonien taira ge gbahra jul sal ɓǝǝ Giliat. Za Israel laŋ taira ta, ge gbahra jul sal ma ɓǝǝ Mispa ma Giliat. 18 Zaluu za Israel faara nyi ki: Azu ye dǝɓ mai mo ga kal pel ka ruu sal ne Ammonien ne? Ka dǝɓ ah ako ye ga yea dǝɓlii tǝ za Giliat daŋ.
© Bible Moundang © Alliance Biblique du Tchad, 1996.
