1 Fahfal ah nje ne cok saŋ alkamaari, Samson gbǝ we tǝparswak kal ge ka ẽe mawin ah ne ko, faa: Me dan ga wo mawin ɓe ɓǝr yaŋ ahe. Amma bǝǝ ah zyii soɓ fahlii nyi ka mo danko ge wol ah ya. 2 Pah mawin faa: Me lǝŋ mo 'yah ko yao, mor ah me ɓaŋ nyi nyi bai ɓo. Naa mam malaŋ ka pǝsãh kal ko ya ne? Mo ɓaŋ ko zahwaa ah o.
3 Samson faa nyi ra: Zǝzǝ̃ǝ koo me joŋ ɓǝ maɓe' ah wo Filistien laŋ, ka ɓǝɓe' ah ka tǝ ɓe ya. 4 Samson kal ge gbah gyaori temere sai, bam sǝ̃ǝ ɓǝǝ ge wo ki gwa gwa, so bam paŋwii ge tǝgǝǝ sǝ̃ǝ ɓǝǝra. 5 Kan wii nyi daŋ, soɓ gyaori myah ge pǝ 'wah alkamaari Filistien ne ko. Wii sye alkamaari mai mo ɓaa ɓo tǝki ɗulɗul, ne mai mo uu ɓo sǝŋ tǝkine tǝbaakãm daŋ. 6 Filistien faara: Azu ye joŋ fan mai ne? Za ki zyiira faa: Samson bǝǝ dǝɓ Timna ye joŋni, mor bǝǝ ah ɓaŋ mawin ah nyi bai ah kanne. Filistien daŋ taira kal ge ɓaa wii tǝ yaŋ mawin ne pah ah daŋ.
7 Samson faa nyi ra: We joŋ fan mai ɓo naiko, 'manna me ka soɓ we ya, sai ka me faŋ val ah tǝ ɓii ɓe. 8 Ik ra pǝ wul ne tǝkẽawãkke. So ur kal ge kaa pǝ yii tǝsal Etam.
Samson ik Filistien yaŋ Leki
9 So Filistien pǝ̃ǝra ge gbahra jul sal ɓǝǝ pǝ sǝr Yuda, ŋhaa pǝ̃ǝra ge dai Leki. 10 Za Yuda fii ra: We pǝ̃ǝ ge ɓo zah ɓuu mor fẽene? Zyiira faa: Ru pǝ̃ǝ ge ɓo ka ruu sal ne Samson, mor ka ru joŋ zah yeɓ ki wol ah na mai mo joŋko ɓo wo ɓuu ta. 11 Za Yuda ujenere sai urra kal ge pǝ yii tǝsal Etam. Faara nyi Samson: Mo tǝ sõone Filistien ye lwaara na ɓo mo tǝ ya ne? Mo joŋ wo ɓuu nai mor fẽene? Zyii faa nyi ra: Me joŋ ɓǝ ɓo wo ɓǝǝ tǝgbana mai mo joŋra ɓo wo ɓe ta. 12 Faara nyi ko: Ru ge ɓo ka baŋ mo, mor ka ru nyi mo ge nyi Filistien. Samson faa nyi ra: We ka tǝ ga i me ne suu ɓii ya ɓe, we haa zah nyi me ɗao. 13 Zyiira faa nyi ko: Ka nai ya, ru tǝ 'yah ka baŋ mo ka ga nyi gai ra jol to, amma ru 'yah ka in mo pǝ wul a. So baŋra ko ne sal mafuu ah gwa. So nǝǝra ko gin pǝ yii ge lalle.
14 Ne cok mo ge dai Leki, Filistien ŋwaara gor mor ka zyaŋra tǝl ahe. Tǝ'yak Dǝɓlii ge tǝ Samson, so ɗǝǝ sal mai mo jol ah ge lal tǝgbana suu gǝrǝǝji mai wii moo ŋgommi, fan mai mo baŋ jol ah ɓo wǝǝre. 15 Lwaa woiŋ momgbee korro mapǝ̃ǝ ahe, nyen jol ɓaŋ ik za ne ujenere. 16 Samson so faa: Ne woiŋ momgbee korro za lea ge sǝŋ gǝdǝɓ gǝdǝɓ, ne woiŋ momgbee korro me ik za ne ujenere. 17 Ne cok mo vǝr ɓǝ faa ahe, so ɓoo woiŋ momgbee korro mo jol ah ge lalle, ɗii cok ah ne Ramat-Leki.
18 Koŋ bii i ko pǝlli, mor ah juupel wo Dǝɓlii faa: Mo joŋ yeɓ swah malii mai ne jol dǝɓ yeɓ ɓo, amma zǝzǝ̃ǝko me tǝ ga wǝ koŋ bii o, mo ga soɓ me lee ga mor jol gãhnyah rai ne? 19 So Masǝŋ ŋgǝ̃ǝ pǝɗakka ma kah Leki, bii pǝ̃ǝ gŋ ge lalle. Ne cok mo zwǝ bii o, swah pii soo ge wol ahe. Mor ah a ɗiira lak bii ah ne lak bii Pa juupelle, lak bii ah a no Leki ŋhaa tǝ'nahko.
20 Samson kaa dǝɓlii za Israel ne zah'nan Filistien syii jemma gwa.
© Bible Moundang © Alliance Biblique du Tchad, 1996.
