Samson yaŋ Gaza
1 Samson kal ge yaŋ Gaza, ge kwo mawin tǝkoi gŋ, dan kal ge yaŋ ahe. 2 Za Gaza laara Samson ge ɓo no nyeeko. Ge ryaŋra ko, lalra mok byak ko ne suŋ moo zahfah yaŋ Gaza, zokra suŋ moo wõi faara: Na soɓ zah'nan mo cee ɗao, ka na i ko ba. 3 Samson swǝ ŋhaa kǝsyisuŋ joŋni, so ur nyen jol gbǝ zahfah yaŋ ah ne kpuu ɓaa ah gwa daŋ. Nǝǝ zahfah tǝkine cok gban jol ah daŋ ɓaŋ kan ge tǝbǝǝsahe, so fahfal ah yee kal ge tǝ waa mai mo ɓyaŋ ki ɓo ne Hebron ne ko, ge syii gŋ.
Samson ne Dalila
4 Fahfal ah a 'yah mawin ki no pǝ cok tǝforoŋ Sorek, a ɗii mawin ah ne Dalila. 5 Za goŋ Filistien gera wo mawin ahe, faara nyi ko: Mo kǝǝ Samson ne yella, ka mo lwaa tǝ mor ɓǝ swah ah malii mai mo ne ko zah ahe, so mo fii tǝ ɓǝ mai ka ru gak lwaa kaa swah tǝl ah ne fahlii mai ka ru lwaa baŋ ko. Zune kǝsyil ɓuu daŋ a ga nyi solai vãm nyi mo 1.100.
6 Dalila faa nyi Samson: Oseni, mo cuu mor ɓǝ swah ɓo malii mai mo ne ko nyi me ɗao. A baŋra mo ne fẽe ka mo lwaa kaara swah tǝ ɓo ne? 7 Samson faa nyi ko: Mo baŋra me ne suu sǝkoo mapǝ̃ǝ mai mo yak ya ba rǝŋ ɓe, me ka yea pǝswah yao, me ga yea tǝgbana za daŋ o.
8 Za goŋ Filistien woora suu pǝ̃ǝ mai mo ɓah yak ya ba rǝŋ ge nyi Dalila. So baŋ Samson ne ko. 9 Amma ka za ma kaara fuu ge lal mokra ɓo no yaŋ Dalila. So faa nyi ko: Filistien gera ɓo tǝtǝl ɓo Samson! Ne pel nai sǝ, suu sǝkoo ɗǝǝ tǝgbana suu gǝrǝǝji kol mai dǝɓ mo kan wii nyi ɓe moo ŋgom kpǝtkpǝt. Lwaara tǝ mor swah ah ya.
10 So Dalila faa nyi Samson: Mo ẽe, mo joŋ kyẽm ne me, mo gwah ber nyi me. Amma zǝzǝ̃ǝ mo faa goŋga ah nyi me ɗao. A baŋra mo ne fẽene? 11 Zyii faa nyi ko: Mo baŋra me ne sal mafuu ah mai mo joŋ yeɓ taa ya ɓe, me ka yea pǝswah yao, me ga yea tǝgbana za daŋ o. 12 Dalila woo sal mafuu ah baŋ ko ne ko, so faa nyi ko: Filistien gera ɓo tǝtǝl ɓo Samson! Amma ka za ma kaafuu no haira ɓo ɓǝr yaŋ ahe, amma ɗǝǝ sal mai mo jol ah tǝgbana suu gǝrǝǝji yo.
13 Dalila so faa nyi Samson: Ŋhaa zǝzǝ̃ǝko mo tǝ joŋ kyẽm ne me, mo gwah ber ɓo nyi me, mo faa nyi me ɗao, a baŋra mo sye ne fẽene? Samson so faa nyi ko: Mo jer rĩi tǝtǝl ɓe ge wo ki camcam rǝŋ ne vãm kaŋ fan mo so 'nahm ge lal ne ɓe, me ka yea pǝswah yao, me yea tǝgbana za daŋ o. 14 Dalila jer ge wo ki ne vãmme, so gaa ge sǝŋ ne vãm ah daŋ faa: Filistien gera ɓo tǝtǝl ɓo Samson! So kpiŋ gin tǝ nǝm ah nǝǝ vãm ne fan kaŋ ah daŋ.
15 Dalila faa nyi ko: Mo gak faa ɗah ɗii mo tǝ 'yah me, so zahzyil ɓo laŋ ka ne me ya ko ne? Mo joŋ kyẽm ɓo ne me ɓal sai ah ye nyẽeko, mo cuu mor swah ɓo malii mai mo ne nyi me ya. 16 A gaɓ Samson ne ɓǝ faa ah zah'nan daŋ, so ɓǝ ah joŋ Samson ŋhaa a 'yah zye wuu. 17 So Samson cuu ɓǝ zahzyil ah daŋ nyi, faa: Nyahswãh kan ge tǝtǝl ɓe taa ya, mor ame ye Nasiriyo daga ɓǝr ma ɓe sǝ. Me kal sõo tǝtǝl ɓe, swah ɓe laŋ a ga soɓ me ta, me ga yea na za daŋ o.
18 Ne cok Dalila mo kwo Samson cuu ɓǝ zahzyil ah daŋ nyi ko ɓe, pepee kal ge ɗii za goŋ Filistien faa: We ge zǝzǝ̃ǝko, mor cuu ɓǝ zahzyil ah daŋ nyi me ɓe. Za goŋ Filistien gera wol ahe, gera ne lak kŋ mor jol daŋ. 19 Dalila joŋ Samson nǝnǝm tǝ ɓal ahe. So ɗii dǝɓ ki ge saŋ rĩi ah mo jer ɓo tǝtǝl rǝŋ ge lalle. So tǝŋ waa ko ka swah ah vǝr ɓe. 20 So ɓyaŋ ɓǝ faa: Filistien gera ɓo tǝtǝl ɓo Samson! Samson kpiŋ gin tǝ nǝm ahe, lǝŋ zye ga ǝ̃ǝ suu 'min na matãa kŋ faɗa. Amma tǝ sõone Dǝɓlii soɓ ko ɓe ya. 21 Filistien gbǝra ko, nǝǝra nahnǝn ah ge lalle. So kalra ge yaŋ Gaza ne ki, baŋra ko ne sal vãm masyẽ, a joŋra ko ne doole laŋ sum daŋgai. 22 Amma rĩi tǝtǝl ah mo saŋ ge lal kŋ so giŋni.
Wul Samson
23 Za goŋ Filistien taira ka ŋgom fan joŋ syiŋ malii ah ne wo masǝŋ ɓǝǝ Daagon, mor ka joŋ fĩi ne ka laa pǝ'nyahre. Mor faara: Masǝŋ man nyi pa syiŋ man Samson gee na mor jol ɓe. 24-25 So ne cok zahzyil ɓǝǝ mo tǝ laa pǝ'nyah pǝlli, faara: We ge ɗii Samson ge ne ko ka mo ge joŋko kyẽm nyi na. Ge ɗiira pǝ daŋgai ge ne ko, so joŋ kyẽm pel ɓǝǝra, so ɓaŋra ko uu ge kǝsyil wǝǝdǝǝ. Ne cok mo kwora Samson naiko, so yiira masǝŋ ɓǝǝ faara: Masǝŋ man nyi pa syiŋ man Samson gee na mor jol ɓe, pa ɓeɓ sǝr man ye ko, ik za man pǝ wul pǝlli. 26 Samson faa nyi we tǝbanna mai mo gbǝ jol ah ɓo: Mo soɓ me laɓ wǝǝdǝǝ mai yǝk yaŋ daŋ mo ge ɓo tǝ ɓǝǝ ka me gǝr sa. 27 Amma ɓǝr yaŋ ah za wǝǝ ne ŋwǝǝ daŋ baara ɓo gŋ kǝrkǝr, za goŋ Filistien matǝ dappe daŋ ara gŋ. Tǝtǝl yaŋ ah sǝŋ za wǝǝ ne ŋwǝǝ daŋ ujenere sai uura ɓo gŋ tǝ ẽera kyẽm Samson.
28 Samson juupel wo Dǝɓlii faa: Dǝɓlii Masǝŋ, mo foo ɓǝ ɓe, mo nyi swah mai nyi me zǝzǝ̃ǝ to ɗao Masǝŋ, mor ka me faŋ val tǝ Filistien tǝ ɓǝ nahnǝn tǝ gwa ɓe nyẽe vaŋno ɗao. 29 So Samson gbǝ wǝǝdǝǝ ma kǝsyil mo gbǝ yaŋ uu ɓo ne ko, mai mo gǝr ra ɓo maki ah jokǝsãhe, maki ah ne jokǝlǝɓai ahe. 30 Samson ɓyaŋ ɓǝ faa: Me wǝ ne Filistien o! So ɗǝŋ pee suu ne swah mbaŋ. Yaŋ lee ge tǝ za goŋ Filistien tǝkine za mai mo no ɓǝr yaŋ ah daŋ. Za mai Samson mo ik ra com wul ah kal mai mo ik ra ne zah'nan cee ah daŋ ne pãa ɓe.
31 Wee pam tǝkine za yaŋ pah ah daŋ gera, ɓaŋra wul ah kal ge ciira ko kǝsyil Zora ne Estaol pǝ pal pah ah Manoa. Amma Samson kaa dǝɓlii za Israel syii jemma gwa.
© Bible Moundang © Alliance Biblique du Tchad, 1996.
