Lǝŋ Debora ne Barak
1 Com ah Debora ne Barak we Abinoam ɗǝǝra lǝŋ faara:
2 Zaluu kalra pel za Israel, za pǝ̃ǝra ne pel gwari ka ruu salle.
Na joŋ osoko nyi Dǝɓlii mor ahe!
3 Awe goŋe, we laa. Za goŋe, we syii sokki.
Me ga ɗǝǝ lǝŋ yii Dǝɓlii Masǝŋ Israel ne kyaŋ pǝ'manne.
4 Dǝɓlii, ne cok mo ge pǝ̃ǝ pǝ sǝr Edom ne tǝ waa ah daŋ,
sǝr coo gǝrgǝrri, bam tǝ ge sǝŋ.
Oho, bam tǝ ge sǝŋ pǝlli.
5 Waa laŋra pel Dǝɓlii, waa Sinai mai laŋ,
Laŋ pel Dǝɓlii Masǝŋ Israel ta.
6 Ne cok zah'nan Samgar we Anat tǝkine zah'nan Jael, fahlii lii 'yakra,
Za ma kyãhra gwǝǝ a syeera tǝ fahlii matǝ reeree ahe.
7 Zaluu maswah ah kǝka kǝsyil za Israel ya,
Ara kǝka ŋhaa mo ge ur ne sõo,
Mo ge ur ne sõo Debora, amo ye mǝǝ kǝsyil za Israel.
8 Ne cok za Israel mo nǝǝra masǝŋ ki cam mafuu ahe,
Sal ge ruu pǝ sǝr ah daŋ.
Koo kǝsyil za Israel matǝ 40.000 laŋ,
Kwora bal tǝkine zǝǝ kǝsyil ɓǝǝr a.
9 Zahzyil ɓe a ne zaluu Israel tǝkine za
mai mo pǝ̃ǝra gwari ka ruu salle.
Na yii Dǝɓlii!
10 Awe za ma yee tǝ mǝǝ korro masãhe ,
Awe za ma hai tǝ daagol marwãh ahe,
Tǝkine za ma syee tǝ fahlii, we foo ɓǝ.
11 We laa cii fan joŋ za mo tǝ joŋra zah lak bii ɗao,
Tǝ faara ɓǝ kaa kacella mai Dǝɓlii mo kaa ɓo ne mǝ za Israel.
So za Dǝɓlii syeera ge zah ɓaale.
12 Mo syee o, mo syee o Debora, mo ɗǝǝ lǝŋni.
Barak we Abinoam, mo urri, mo ge ne daŋgai ɓo ra.
13 Za matǝ goŋga gera wo zaluu ɓǝǝra,
Za Dǝɓlii gera wol ahe, zyeɓra suu ka ruu salle.
14 Za Benyaamin gera gin Efraim ge pǝ cok tǝforoŋ kǝpelle,
Fahfal ah tǝcoŋ za Israel manyeeki ah gera gin gŋ ge ta.
Za swah sooje ɗǝrra gin Makir ge,
Zaluu sooje gera gin Zebulon ge ta.
15 Za goŋ Isakar gera mor Debora ne Barak ta.
Syeera tǝbǝlam ɓǝǝ ɗǝrra ge pǝ cok ma tǝforoŋ ne hǝǝre.
Za Ruben ɗeera syee tǝ ɓǝ gan ahe.
16 We dan kaa ɓo pǝ lao laa cii jyak dǝǝ mor fẽene?
Oho, za Ruben kaara ɓo tǝ ɗee syee ɓǝ gan ahe.
17 Za Gad kaara ma ɓǝǝ ɓo kah el Yordan nǝfah morcomzah'nanne.
Za Dan haira ma ɓǝǝ ɓo pǝ dahe.
Za Asǝr kaara ma ɓǝǝ ɓo kah mabii ne wah ahe.
18 Za Zebulon ne za Naftali gaɓra suu ɓǝǝ ne ruu salle.
19 Za goŋ gera, ruura salle.
Ne cok ah za goŋ Kanaanien ruura sal Taanak kah bii Megiddo.
Amma lwaara woo fan zah sal ah ya.
20 Ŋwǝǝmǝŋgai ruura sal coksǝŋ,
Ruura sal ne Sisera tǝ fahlii ɓǝǝ moo syeera gŋ.
21 Bii el Kison woo ra kal ne ko.
El Kison, el matãa yo.
Zahzyil ɓe, mo syee ge pel ne swahe.
22 Cii ɓal pǝr cii ne ɗaŋ ah mo tǝ ɗaŋra,
Mor tǝ ɗaŋra ne swah pǝlli.
23 Angelos faa:
Zahyee tǝ Meros, zahyee tǝ za ma kaara yaŋ ahe,
Zahyee tǝ ɓǝǝ pǝ'manne!
Mor zyiira ka gin gbah jol Dǝɓlii ya,
Gera ka gbah jol Dǝɓlii ne ruu sal tǝkǝ̃ǝ ah ne za maswah ya.
24 Masǝŋ mo ẽe Jael mawin Eber Keniyo kal ŋwǝǝ daŋ,
Masǝŋ mo ẽe ko kǝsyil ŋwǝǝ mai mo kaara ɓo wo sǝr nyee daŋ.
25 Sisera syea bii zwanne,
So nyi won nyi ko zwǝ,
So 'naa nǝm swah gee ko ne pǝ tahsah za goŋe.
26 Jael nyen jol ge wo gaari,
Nyen jokǝsãh ah ɓaŋ tǝwoo ma joŋ yeɓ i Sisera ne dah tǝtǝl nyi ko,
Gaa ge nyi kahfǝn ne ŋhaa welle.
27 Ɗǝŋ ge mor ɓal Jael, lee ge sǝŋ swǝ gŋ,
Ɗǝŋ ge sǝŋ mor ɓal ah lee ge sǝŋ.
Pǝ cok mai mo ɗǝŋ ge gŋ swǝ ge sǝŋ lee wul sǝ.
28 Mah Sisera ɗǝŋ ẽe cok zahtǝwoo faa:
Muŋta sal ah so goo ɓo bai gin nai mor fẽene?
A fẽe ye joŋ muŋta sal ah ra so goo ɓo nai ne?
29 Ŋwǝǝ ma ne tǝtǝl kal ŋwǝǝ ma pǝ faadal ah zyiira ɓǝ zah ahe,
Ako laŋ so jin zyii ɓǝ zah suu syak ah faa:
30 Oho, lwaara fan zah sal ɓe, ka tǝ womra o ya ne?
Dǝɓ vaŋno lwaa mǝlaŋ win vaŋno koo gwa,
Mbǝro ma woo zah sal maŋwǝǝ ah mǝ Sisera yo,
Mbǝro sol ma kǝkaŋ ah daŋ mǝ pa swah yo.
31 Dǝɓlii, za syiŋ ɓo daŋ mo ɓeɓra naiko!
Amma za 'yah ɓo daŋ mo yeara tǝgbana com mai moo
zoo pǝ kol gin lal pǝcwakke!
So sǝr kaa 'yak syii jemma nai.
© Bible Moundang © Alliance Biblique du Tchad, 1996.
