1 Ɗerewol mai kee ɓǝ mai Jeremias mo faa, ne fan mai mo joŋko. Jeremias ako ye we Hilkiija, dǝɓ morsǝ̃ǝ za joŋzahsyiŋ mai mo kaara ɓo yaŋ ma ɗii ne Anatot pǝ sǝr Benyaamin. 2 Ne cok Josias we Amon mo kaa goŋ sǝr Yuda syii jemma tǝtǝl sai, Dǝɓlii faa ɓǝ nyi Jeremias. 3 So Dǝɓlii faa ɓǝ nyi ko ne cok Jojakim we Josias mo kaa goŋ ɓo kpǝ. Fahfal ah so faa ɓǝ nyi ko ɓal pǝpãare, ŋhaa dai zah'nan mai mo ge gbahra za yaŋ Jerusalem kal ne ko, ka fĩi patǝ dappe ah ne syii jemma tǝtǝl vaŋno ah Sedekias we Josias mo kaa goŋ ɓo yo.
Dǝɓlii ɗii Jeremias
4 Dǝɓlii faa nyi me: 5 Kǝpel ka me ɓah joŋ mo ɓǝr ma ɓo ya ba, me tǝ mo ɓe, kǝpel ka mo ɓah byaŋ ya ba, ame nǝǝ mo ka mo yea profeto ɓe wo zana. 6 So me zyii faa: Dǝɓlii, me tǝ ɓǝ faa pǝsãh ya, ame pǝlaŋne. 7 Amma Dǝɓlii so faa nyi me: Mo faa sõone amo pǝlaŋne ka, amma mo ge wo za mai me pee mo ɓo wo ɓǝǝra, mo faa ɓǝ mai daŋ me faa ɓo nyi mo nyi ra. 8 Ame Dǝɓlii me faa, mo ɗuu gal ɓǝǝ ka, mor me ga yea ne mo ka byak mo.
9 So Dǝɓlii nyen jol juu tǝkpuuzah ɓe, faa nyi me: Me maa ɓǝ faa ɓe ge ɓo mo zah ka mo faa. 10 Tǝ'nah mai me nyi swah ɓo nyi mo tǝ za sǝr camcam tǝkine tǝ za goŋ sǝr camcam daŋ ta, mor ka mo lwǝǝ ra, mo hah ra, ka mo ɓeɓ ra, mo muŋ ra, ka mo zyeɓ fanne, ka mo swaa fan yea pǝswahe.
Fakwan camcam gwa
11 Dǝɓlii fii me faa: Jeremias mo kwo fẽe ɓo ne? Me zyii faa: Ame kwo jol kpuu amand ɓo. 12 So Dǝɓlii faa nyi me: Amo kwo ɓo pǝsãhe, ame tǝ byak ka ɓǝ faa ɓe mo joŋ baa ge cok ahe.
13 Dǝɓlii so faa ɓǝ nyi me faɗa, fii me faa: Amo kwo ɗah fẽe maki ah ɓo faɗa ne? Me zyii zah ah faa: Ame kwo cii masuŋ ah tǝ gin fahsǝŋ ginni. 14 So faa nyi me: Ɓeɓ ga gee fahsǝŋ ge tǝ za mai mo kaara ɓo pǝ sǝr mai daŋ. 15 Mo laa ɓǝ mai me tǝ faani, me ga ɗii za mai mo fahsǝŋ daŋ ge. Za goŋ ɓǝǝ ga gera, a ga ɓyakra fakal ɓǝǝ zahfah yaŋ Jerusalem, a ga ryaŋra ɓaale yaŋ ah ɓoo kǝsyilli, so a ga ryaŋra yaŋ maluu manyeeki ah pǝ sǝr Yuda ta. 16 Me ga ŋgoŋ kiita tǝ za mai mo joŋra faɓe' mo soɓra me ɓoo, mo kal tǝ tǝǝra ɓǝrdi wo masǝŋ ki ra, ne juupel wo fan mai mo zyeɓra ne jol ɓǝǝ naiko. 17 Amma amo, mo pee zahzyil mbaŋ, mo ge faa ɓǝ mai daŋ me faa ɓo nyi mo ka faani. Mo ɗuu gal ɓǝǝ ka. Mo ka nai ya ɓe, ne cok mo ge wo ɓǝǝ ɓe, me ga joŋ mo ɗuu galle. 18-19 Jeremias, mo syii sok kpẽe mo laa. Koo zune mo pǝ sǝr mai daŋ, za goŋ sǝr Yuda, zaluu ah ra, ne za joŋzahsyiŋrĩ, tǝkine za daŋ a ga syiŋra mo. Amma tǝ'nahko, me joŋ mo ɓo ka mo gak uu pel ɓǝǝra, mo ga yea na yaŋ maswah ah ma ne ɓaale, na waddǝǝ ma vãmme, na ɓaale ma ne vãm syẽ. Ka gak kaara swah tǝ ɓo ya, mor me ga yea ne mo ka byak mo. Ame Dǝɓlii me faa ɓo naiko.
© Bible Moundang © Alliance Biblique du Tchad, 1996.
