Kǝǝ malii gbǝ tǝ sǝr Israel
1 Dǝɓlii faa ɓǝ nyi Jeremias tǝ ɓǝ kǝǝ, faa: 2 Sǝr Yuda gbǝ yel ɓo, za tǝ wuk pǝ yaŋ ah maluu ra, zan ah haira ɓo tǝ sǝr tǝ swaara ɓǝ, za yaŋ Jerusalem tǝ yera yee fii gbah jolle. 3 Zaluu yaŋ ah a peara za yeɓ ɓǝǝ ka ga bea bii, a gara zah lak bii, amma ka lwaara bii gŋ ya, a jinra ne daŋ ɓǝǝ tǝkolle, swãa re ra, tǝtǝl jin ra pǝryak, so jǝmra fan ge tǝtǝlli. 4 Zahzyil nǝǝ za pǝpǝǝ, jǝmra fan ge tǝtǝlli, mor bam ka tǝ tan a, sǝr yak ɓo ne lii ah daŋ. 5 Koo kǝsyicok laŋ, ma nǝǝmin a soɓ wel ah mai mo byaŋ ɓo pǝfuu ba ɓooni, mor wom kǝka. 6 Korro cok a yeera uu pǝ cok ma tǝgee sǝŋ ah ra, a ira tǝ'yak na goo, nahnǝn ɓǝǝ foo tǝnjǝŋ mor ka lwaara farel a.
7 Za ɓe tǝ yera yee wo ɓe: Koo faɓe' ɓuu mo tǝ cen ru mgbaŋ laŋ Dǝɓlii, mo gbah jol ɓuu tǝgbana mai mo faa ɓǝ ah ɓo. Faɓe' ɓuu pǝpãa no cam, aru joŋ faɓe' ɓo wo ɓo. 8 Amo syak ɓo mo ye Dǝɓ mai Israel mo rǝk nahnǝn ɓo nyi. Ne cok ru dan pǝ bone ɓe, amo syak ɓo mo ye pa ma ǝ̃ǝ ru gŋ. Mor fẽe amo so tǝ sǝr ɓuu tǝgbana gwǝǝ ne dǝɓ mai mo tǝ pǝ̃ǝ ga ne ɓal moo swan gŋ zah'nan vaŋno to ne? 9 Mor fẽe mo so tǝgbana dǝɓ mai za mo ge zoo zahmacee ah ɓo, tǝgbana dǝɓ gorom mai mo ka so gak gbah jol dǝɓ yao ne? Dǝɓlii aru tǝ ɓe, mo no ne ru, aru ye za ɓo, mo soɓ ru ɓoo ka.
10 Dǝɓlii faa ɓǝ tǝ ɓǝǝ naiko, faa: Za mai a 'yahra ka ɗuu gin wo ɓe kal ga haihai naiko, ka gak gbanra suu ɓǝǝr a, mor ah me ka laa pǝ'nyah ne ra ya. Me ga foo ɓǝ ɓǝɓe' mai mo joŋra, me ga ŋgoŋ kiita tǝ ɓǝǝ mor faɓe' ɓǝǝra.
11 So Dǝɓlii faa nyi me: Mo fii me ka me gbah jol za mai ka. 12 Koo mo syẽera fan laŋ, me ka ga laa yee ɓǝǝ mo tǝ yeera fii gbah jol ne ya. Koo mo syakra fan joŋ syiŋ wo ɓe ne tǝkine nyi fakpãhpǝǝ ɓǝǝ nyi me laŋ, me ka ga laa pǝ'nyah ne ra ya. Amma me ga ik ra pǝ wul ne salle, ne koŋne tǝkine syem maɓe' ahe.
13 So me faa: Masǝŋ Dǝɓlii, mo tǝ ɓe, profetoen a faara nyi za: Sal ka lwaa we ya, koŋ laŋ ka ga wǝ ya. Mor amo ye faa ɓǝ ah ɓo naiko, sai jam ye ga yea pǝ sǝr ɓuu to.
14 Amma Dǝɓlii zyii faa: Profetoen marai tǝ gwahra ber pǝ tǝɗii ɓe, me pee ra ya, me nyi fahlii nyi ra, wala faa ɓǝ nyi ra ɗǝ ya. Ɓǝ mai moo faara nyi we daŋ lom yo, ɓǝ ah gee wo ɓe ge ya, tǝ cuura ɓǝ kol ne ɓǝ foo ma zahzyil ɓǝǝra. 15 Ame Dǝɓlii me faa ɓǝ mai me ga joŋ wo profetoen mai me pee ra ya, amma moo so cuura ɓǝ pǝ tǝɗii ɓe, moo faara koŋ ne syem ka ge pǝ sǝr mai ya, me ga ik ra ne sal tǝkine koŋne. 16 Za mai mo cuura ɓǝ mai nyi ra laŋ, me ga ik ra ne sal ne koŋ ta. Wul ɓǝǝ ga myah tǝ fahlii tǝgǝǝ yaŋ Jerusalem nooko, dǝɓ ma cii wul ɓǝǝ ka ga yea ya. Fan ah a ga joŋ wo ɓǝǝ ne lii ɓǝǝ daŋ, a ga joŋ wo ŋwǝǝ ɓǝǝra, ne wee ɓǝǝ mawǝǝ ne maŋwǝǝ daŋ. Me ga soo ra mor ɓǝɓe' ɓǝǝ mo joŋra.
17 Jeremias, mo faa nyi zana: Swaa ɓǝ ɓii me tǝ swaa tǝ joŋ mĩi yee ɗuu nahnǝn ɓe com ne suŋ daŋ, me ka in zah yee kpee ya syaŋsyaŋ. Mor za ɓe lwaara nwãh ɓo pǝ'manne, fasyen tǝ syen ra no cam. 18 Ne cok me pǝ̃ǝ ge zah goo lal ɓe, me kwan wul za mai sal mo ik ra myah mane, ne cok me ge tǝgǝǝ yaŋ, me so kwan za mai koŋ mo ik ra ɓo pǝ wul myah mane. Profetoen ne za joŋzahsyiŋ a foora ɓǝ yeɓ ɓǝǝ to, amma tǝra fan mai mo tǝ joŋra ya.
Za pǝǝra Dǝɓlii ka mo gbah jol ɓǝǝra
19 Dǝɓlii, amo soɓ za Yuda ɓoo nai lii sǝ ɓe ne? Amo syiŋ za Sion ɓe ne? Mor fẽe mo joŋ ru pǝɓe' ŋhaa ka ru gak laɓ kao nai ne? Aru kyeɓ jam, amma ru ka lwaa ya, aru foo ru ga laɓɓe, amma so ɓǝ ma nǝǝ zahzyil a gin dai ru. 20 Dǝɓlii, aru toobii tǝ ɓǝ faɓe' ɓuu ne mǝ pa ɓuu lii ra daŋ mor aru joŋ faɓe' ɓo wo ɓo. 21 Oseni, mo foo ɓǝ faa ɓo mo faa ɓo, mo soɓ ru myah ka, mo cuu swãa yaŋ Jerusalem mai mo cok kal ɓo mayǝk yo ka, mo gbǝ ɓǝ gbanzah mai mo gbǝ ɓo ne ru, mo jin syel ɓǝ ah ka. 22 Masǝŋ za ki ka gakra tan bam ya, coksǝŋ ka gak joŋ bam tan gin sǝŋ suu ah ya. Dǝɓlii Masǝŋ ɓuuru, aru soɓ suu ɓuu ɓo wo ɓo, mor amo yee joŋ fan marai daŋ.
© Bible Moundang © Alliance Biblique du Tchad, 1996.
