Ɓǝ ɓeɓ yaŋ Jerusalem
1 Goŋ Sedekias pee Pasur we Malkia ne pa joŋzahsyiŋ Zefanias we Maaseja wo Jeremias, faa nyi ko: 2 Oseni, mo fii Dǝɓlii mor ɓuuru, mor Nebukanezar goŋ sǝr Babilon pǝ̃ǝ ɓo ka ruu sal ne ru. Ɗah maki Dǝɓlii ga joŋ dǝǝbǝǝri ah vaŋno mor ɓuu a yee zah ah pii soo no ne?
3 So Dǝɓlii faa ɓǝ nyi Jeremias. Jeremias so faa nyi za mai Sedekias mo pee ra ge: 4 Dǝɓlii Masǝŋ Israel faa sye: Me ga yee zah sooje mai Sedekias mo rǝk ɓo ka ruu sal ne goŋ Babilon ne sooje mai mo ge ryaŋra ɓaale yaŋ nyee ɓo. Me ga tai fan sal ɓǝǝ ge ɓǝr ɓaale. 5 Ame ne suu ɓe me ga ruu sal ne we ne swah suu ɓe daŋ, ne zahzyil syen mo sye me ɓo ne kpãh mai me ɓaŋ ɓo pǝ'manne. 6 Me ga ik za mai mo kaara ɓo yaŋ nyẽe pǝ wulli, dǝfuu ne faɓal daŋ a ga wukra ne syem maɓe' ahe, 7 amma mǝ Sedekias goŋ sǝr Yuda ne zaluu pel ah ra, ne za mai sal ne koŋ ne syem maɓe' ah mo ik ra pǝ wul a daŋ, me ga soɓ goŋ Nebukanezar ne za syiŋ ɓǝǝ mai mo tǝ 'yahra ra ka ik pǝ wul gbah ra, Nebukanezar ga ik ra pǝ wulli, ka ga coŋ dǝɓ kǝsyil ɓǝǝr a, ka ga yee syak wala kwo syak tǝ dǝɓ vaŋno ya. Ame Dǝɓlii me faa naiko.
8 So Dǝɓlii faa nyi Jeremias: Mo faa nyi za ame Dǝɓlii me faa sye: Me rǝk fahlii ɓo pel ɓii gwa: fahlii cee, ne fahlii wulli. We ẽe nǝǝ gin gŋ vaŋno. 9 Koo zune mo kaa pǝ yaŋ nyẽeko, a ga ira ko zah salle, wala ne koŋne, wala ne syem maɓe' ahe. Amma koo zune mo pǝ̃ǝ mo ge nyi jol nyi Babilonien mai mo gera ɓo tǝ ruu sal ne yaŋ nyẽe ɓe, ka ga ira ko pǝ wul a, a ga ǝ̃ǝ cee suu ahe. 10 Mor ame ɓaŋ nahnǝn ɓo tǝ yaŋ nyẽeko, ka mor ka me soɓ yea jam ya, amma ka me ɓeɓ yaŋ ahe, me ga soɓ ga mor jol goŋ Babilon a ga ɓaa wii nyi. Ame Dǝɓlii me faa naiko.
Kiita tǝ yaŋ goŋ sǝr Yuda
11-12 Jeremias faa nyi za yaŋ goŋ sǝr Yuda: Awe morsǝ̃ǝ goŋ David, we syii sok laa ɓǝ mai Dǝɓlii mo tǝ faa nyi we: Zah'nan Masǝŋ daŋ sai we ŋgoŋ kiita ne fahlii goŋga, we ǝ̃ǝ dǝɓ mai mo tǝ laa bone gin jol pa mai mo tǝ cuu bone nyi ko. We joŋ nai ya ɓe, fan maɓe' ah mai we tǝ joŋni, a ga kǝǝ me ɓaŋ kpãh tǝ ɓii pǝ'manne, kpãh ah ga yea tǝgbana wii mai mo ka gak rum ya. 13 Amo yaŋ Jerusalem, mo kaa ɓo pǝ cok ma tǝforoŋ tǝ gee ah sǝŋ, tǝgbana waa mawah ah moo yea ma pǝ cok ma tǝgbai ahe. Amma ame Dǝɓlii me ga ruu sal ne mo. Amo faa dǝɓ ka gak ruu sal ne mo, wala ka dah ɓaale ɓo ka dan ga gŋ ya. 14 Amma ame Dǝɓlii me ga ŋgoŋ kiita tǝ ɓii tǝ ɓǝ fan mai we joŋni, me ga ɓaa wii nyi yaŋ goŋ ɓiiri, wii ga sye yaŋ ah belbelle. Ame Dǝɓlii me faa naiko.
© Bible Moundang © Alliance Biblique du Tchad, 1996.
