Kyeɓra ka in Jeremias ga lalle
1 Ne cok Jojakim we Josias mo kaa goŋ sǝr Yuda sǝ, Dǝɓlii faa nyi Jeremias: 2 Mo ge uu zah yaŋ Masǝŋ, ka mo faa ɓǝ mai me faa ɓo nyi mo daŋ nyi za mai mo gera ɓo gin yaŋ maluu sǝr Yuda daŋ ge ɓo ka juupelle, mo nǝǝ ɓǝ ki gŋ ge lal vaŋno ka. 3 Ɗah maki a ga laara ɓǝ ah a soɓra fahlii ɓe' ɓǝǝ no ne? Mo joŋra nai ɓe, me ga soɓ ɓǝ foo ɓe mai me foo me zyeɓ kan ɓo ka muŋ ra mor yeɓ ɓe' ɓǝǝra.
4 Dǝɓlii faa nyi Jeremias ka mo faako nyi za: Ame Dǝɓlii me faa sye: Sai we laa zah ɓe, ne syee mor ɓǝ cuu ɓe mai me nyi ɓo nyi we. 5 We laa ɓǝ faa za yeɓ ɓe profetoen mai mee pee ra gin wo ɓiiri. Amma we ka zyii laa ɓǝ faa ɓǝǝr a. 6 We ka tǝ syee mor ɓǝ marai daŋ ya ɓe, me ga ɓeɓ yaŋ mai tǝgbana me ɓeɓ ma Silo ta, za sǝr daŋ a ga cuura tǝcuu ne ɓǝ yaŋ maiko.
7 So za joŋzahsyiŋ ne profetoen tǝkine za daŋ mo laara ɓǝ mai ame Jeremias me faa pǝ yaŋ Masǝŋ, 8 ne cok mai me kee ɓǝ faa Dǝɓlii mo pee me ɓo ne nyi za vǝr nai to, za joŋzahsyiŋ ne profetoen tǝkine za daŋ ur gbǝra me kǝtaŋ kǝtaŋ faara: Amo nǝn pǝkoŋ wulli. 9 Mor fẽe mo faa ɓǝ pǝ tǝɗii Dǝɓlii ŋ yaŋ Masǝŋ mai ga yea tǝgbana ma Silo, yaŋ Jerusalem laŋ a ga ɓeɓɓe, koo dǝɓ vaŋno laŋ ka ga yea gŋ ya ne? So za daŋ ryaŋra me pǝ yaŋ Masǝŋ ɓoo kǝsyilli.
10 Ne cok ah zaluu Yuda laara ɓǝ mai mo joŋ ɓo, urra gin yaŋ goŋe, ge haira zahfah yaŋ Masǝŋ mafuu ahe. 11 So za joŋzahsyiŋ ne profetoen faara nyi zaluu tǝkine za daŋ: Dǝɓ mai nǝn pǝkoŋ wulli, mor faa ɓǝɓe' ɓo tǝ yaŋ mana, awe laa ɓǝ ah laŋ ɓo ne sok ɓiiri.
12 So me faa nyi zaluu tǝkine za daŋ: Dǝɓlii ye pee me ka faa ɓǝ tǝ yaŋ Masǝŋ tǝkine tǝ yaŋ Jerusalem daŋ, ɓǝ ah ko ye we laa ko. 13 Sai we fer kal ɓii tǝkine fan mai daŋ wee joŋni, we syee mor ɓǝ faa Dǝɓlii Masǝŋ ɓiiri. Nai ɓe, a ga soɓ ɓǝ foo ah mo foo ɓo ka muŋ we. 14 Ma ɓe, ame mor jol ɓiiri, we joŋ ne me tǝgbana zahzyil ɓii mo 'yahe. 15 Amma we tǝ njaŋ, we i me ge lal ɓe, awe tǝkine za ma kaa yaŋ nyẽe daŋ ka we i dǝɓ ma bai ɓǝɓe' ɓo, ɓǝ ah ga yea tǝtǝl ɓiiri. Mor Dǝɓlii ye pee me ka faa ɓǝ mai daŋ nyi we.
16 So zaluu ne za daŋ faara nyi za joŋzahsyiŋ ne profetoen: Dǝɓ mai ka nǝn pǝkoŋ wul a, mor faa ɓǝ zah Dǝɓlii Masǝŋ man ɓo nyi na.
17 Fahfal ah za ki kǝsyil zaluu urra, faara ɓǝ nyi za mai mo taira ɓo gŋ, faara: 18 Ne zah'nan mai Ezekias mo kaa goŋ sǝr Yuda ɓo, profeto Mika ma Moraset faa ɓǝ fan mai mo yah gin joŋ daŋ nyi za Yuda, faa: Dǝɓlii ma ne swah daŋ faa sye: Za syiŋ ɓii ga pǝǝra Sion tǝgbana 'wahe, Jerusalem ga yea tǝgbana cok mai mo ɓaara ɓol tǝsal ɓo gŋ, tǝgee mai yaŋ Masǝŋ mo gŋ a ga dǝ gǝ̃ǝre. 19 Ezekias goŋ Yuda ne zan ah ira Mika pǝ wul tǝ ɓǝ ah ya, jeertǝ Ezekias ɗuu gal Dǝɓlii, kyeɓ fahlii ka joŋ 'yah ahe. So Dǝɓlii soɓ ɓǝ foo ah mo foo ɓo ka muŋ ra. Zǝzǝ̃ǝko na tǝ ga ɗii ɓeɓ gin tǝ suu man ne ko.
20 So dǝɓ ki no a ɗii ne Urias, we Semaja ma Jearim yo, faa ɓǝ pǝ tǝɗii Dǝɓlii tǝ yaŋ mai ne tǝ za sǝr ah daŋ, tǝgbana mǝ Jeremias tǝɗe'. 21 Ne cok goŋ Jojakim ne sooje ah ra tǝkine zaluu ah daŋ mo laara ɓǝ mai Urias mo faa, goŋ kyeɓ ka in ko pǝ wulli, amma Urias laa ɓǝ ahe, gal re ko, so ɗuu kal ge sǝr Egiɓ. 22 Goŋ Jojakim so pee Elnatan we Akbor ne za ki kal ge mor ah sǝr Egiɓ ka gban ko gin ne ko. 23 Ge gbǝra Urias ge ne ko, ge nyira nyi goŋe. So i ko ge lalle, ɓaŋ wul ah cii pǝ cok cii wul za pãare.
24 Amma Ahikam we Safan zyii ɓǝ ge mor Jeremias, za lwaa ira ko ge lal a.
© Bible Moundang © Alliance Biblique du Tchad, 1996.
