Jeremias rao kpuu zahsol dǝǝ ge sol ahe
1 Ne cok Sedekias we Josias mo kaa goŋ sǝr Yuda sǝ, Dǝɓlii faa nyi Jeremias 2 mo zyeɓko kpuu zahsol dǝǝ ne salle, ka mo ɓaŋko rao ge sol suu ahe. 3 So Dǝɓlii faa nyi ko mo peeko pee ge wo goŋ Edom, Moab, Ammon, Tirus, ne Sidon, ne zah profetoen ɓǝǝ mai mo gera ɓo yaŋ Jerusalem, ka ẽe goŋ Sedekias.
4 Dǝɓlii faa nyi Jeremias: Mo faa nyi ra: Dǝɓlii ma ne swah daŋ Masǝŋ Israel faa sye: 5 Ame ne yǝk ɓe ne swah ɓe me ye joŋ dunia ne zahban dǝfuu mai mo gŋ, faɓalle, tǝkine fan camcam mo gŋ daŋ, me gak soɓ fan ah ga mor jol dǝɓ mai me 'yahe. 6 Zǝzǝ̃ǝ ame nyi za mai daŋ ɓo nyi dǝɓ yeɓ ɓe Nebukanezar goŋ sǝr Babilon ka mo lwaa ra, ame joŋ nǝǝ cok laŋ ɓo ka mo laara zah ahe. 7 Za sǝr daŋ a ga joŋra mor ahe, a ga joŋra mor wel ah tǝkine we nan ah daŋ, ŋhaa ka dai zah'nan mai sǝr ah moo ga leere. So za sǝr ah laŋ a ga joŋra mor sǝr maswah ah ra, tǝkine za goŋ maluu ahe. 8 Za mai wala sǝr goŋ mai mo zyii ka joŋ mor Nebukanezar ya, mo soɓ suu ah mor jol ah ya ɓe, me ga ŋgoŋ kiita tǝ sǝr ah me pee sal gin gŋ ne koŋne, tǝkine syem maɓe' ahe, ŋhaa sai ka me nyi sǝr ah ge nyi Nebukanezar jol tǝɗe' ɓe. Ame Dǝɓlii me faa naiko.
9 We laa ɓǝ profetoen ɓii ne za ẽe ciŋ ɓii ne za ma lolom kee zah ah nyi we ne za ma kyãh ne fasaa ne za ma joŋ yiila tǝkine za ma joŋ kǝndaŋ ka. Za mai daŋ a faara nyi we we ka ga joŋ mor goŋ Babilon ya. 10 Ɓǝ mai za mai mo tǝ faara nyi we daŋ ber kol o, we tǝ syii sok mor ɓǝ ɓǝǝ ɓe, za ki ga woora we sǝr ɓii kal ne pǝɗǝkki, me ga nĩi we myahe, we ga muŋ. 11 Amma za mai mo soɓra suu ɓǝǝ mor goŋ Babilon mo tǝ joŋra mor ah ɓe, me ga soɓ ra pǝ sǝr ɓǝǝ ka mo pǝǝra, ka mo kaara gŋ. Ame Dǝɓlii me faa naiko.
12 Jeremias so faa ɓǝ mai nyi Sedekias goŋ sǝr Yuda nai ta, faa: We soɓ suu ɓii mor jol goŋ Babilon, we joŋ mor ah ne zan ahe. Nai ɓe, we ga yea ne cee. 13 Mor fẽe amo ne za ɓo daŋ mo 'yah ka sal ne syem maɓe' ne koŋ mo ik we ge lal ne? Mor Dǝɓlii faa fan mai a ga joŋ wo za mai mo zyii joŋra mor goŋ Babilon ya daŋ naiko. 14 Profetoen mai moo faara nyi we we joŋ mor goŋ Babilon ka, we laa zah ɓǝǝ ka, ka tǝ zyakra we. 15 Dǝɓlii ne suu ah faa zye pee ra ɗǝ ya, tǝ gwahra ber nyi we pǝ tǝɗii ahe, ka mo nĩiko we kal mo so ikko we pǝ wul tǝkine profetoen mai moo gwahra ber nyi we daŋ.
16 So Jeremias faa ɓǝ nyi za joŋzahsyiŋ tǝkine za mai mo no cok ah daŋ, faa: Dǝɓlii faa sye: We laa ɓǝ faa profetoen mai moo faara nyi we aa ɓe a ga woora fan yeɓ ɓǝr yaŋ Masǝŋ mai mo woora kal ge ɓo Babilon ne ko jin ge ne ko ka. Ɓǝ mai mo tǝ faara nyi we daŋ ɓǝ kol o. 17 We laa ɓǝ faa ɓǝǝ ka, we ge joŋ yeɓ zahmor goŋ Babilon. We joŋ nai ɓe, we ga kaa jam. We 'yah ka yaŋ mai mo ciŋ fǝl mor fẽene? 18 Ara ye mo profetoen 'manna ɓe, ara mo ne ɓǝ faa ɓe ko no ɓe, mo fiira me Dǝɓlii ma ne swah daŋ, mo faara fan yaŋ Masǝŋ mai mo coŋ ɓo yaŋ Jerusalem tǝkine ma ɓǝr yaŋ goŋ daŋ, mo woora kal ge sǝr Babilon ne kao.
19-20 (Ne cok goŋ Nebukanezar mo woo Jojakin we Jokakim goŋ sǝr Yuda ne zaluu sǝr ah tǝkine ma yaŋ Jerusalem daŋ kal ge sǝr Babilon ne ko, soɓ wǝǝdǝǝ kpuusǝŋ ne mabii mai mo zyeɓra ɓo ne vãm syẽ mo kan ɓo ne ko, ne cok ma kan fan tǝl ahe, tǝkine fan yaŋ Masǝŋ manyeeki ahe.)
21 We laa ɓǝ faa ɓe, Dǝɓlii ma ne swah daŋ, Masǝŋ Israel me faa ɓo tǝ ɓǝ fan mai mo coŋ ɓo ɓǝr yaŋ Masǝŋ yaŋ Jerusalem tǝkine ma ɓǝr yaŋ goŋe. 22 A ga woo ra kal ga sǝr Babilon ne a yea gŋ ŋhaa sai ka me so foo ɓǝ ah ɓe. So me ga woo gŋ jin ge ne me rǝk ra pǝ cok maiko. Ame Dǝɓlii me faa naiko.
© Bible Moundang © Alliance Biblique du Tchad, 1996.
