Bai goŋga za Israel
1 Dǝɓlii faa: Dǝɓ mo syel mawin ahe, so mawin ah mo kal ge kan wor ki ɓe, wor ah ma kǝpel ka gak zaŋ ko ge yaŋ ah ne faɗa yao, sǝr ah ga ɓeɓɓe. Amma ame Dǝɓlii me faa, Israel, amo ne za 'yah ɓo mai mo tǝ joŋ tǝkoi ne ra pǝpãare, so zǝzǝ̃ǝ mo 'yah ka jin gin wo ɓe! 2 Mo ɓaŋ nahnǝn mo ẽe cok ge pǝ cok ma tǝgee sǝŋ ah ra ɗao, cok mai mo joŋ tǝkoi gŋ ya a no ne? Amo kaa kah fahlii byak za 'yah ɓo tǝgbana dǝɓ Araɓ moo kaafuu kǝsyicok ka joŋ zana, amo ɓeɓ sǝr ɓo ne tǝkoi ne ɓǝɓe' ɓo, mor mo syee mor masǝŋ ki ra. 3 Mor ah me cak bam ɓo ka tan a, ne bam zah gwahl daŋ. Amo na matǝkoi mai swãa mo ka ren a.
4 Zǝzǝ̃ǝko, amo ɗii me ne pa ɓo, mo faa me 'yah mo ɓo daga laŋ dai, 5 me ka ɓaŋ kpãh haihai ya, me ka kee ɓǝɓe' tǝ dǝɓ ga lii ya. Israel, amo faa naiko, amma ne daŋ laŋ mo so joŋ faɓe' mai zahzyil ɓo moo 'yahe.
Sai za Israel ne za Yuda mo toora bii ɗǝ
6 Ne cok Josias mo kaa goŋ ɓo, Dǝɓlii faa ɓǝ nyi me Jeremias, faa: Mo kwo fan mai Israel mawin tǝkoi mo ŋwookyaŋ soɓ me ɓoo ne ɓe ne? Kal ge pǝ cok ma tǝgee sǝŋ ah ne mor kpuu maluu ah ra daŋ ka joŋ tǝkoi gŋ. 7 Ame Dǝɓlii me foo, mo joŋko fan joŋ ah daŋ ɓe, fahfal ah a ga pii soo ge wo ɓe ba. Amma zyii ka pii soo ya, naa mah ah mawin matǝ vǝrvǝr ma ɗii ne Yuda laŋ kwo ɓe. 8 So Yuda mo kwo ame syel ki ɓo ne Israel me nĩi ko ɓoo, mor soɓ me, so kal tǝ joŋ tǝkoi. Amma Yuda naa mah ah matǝ vǝrvǝr ɗuu gal a, ako laŋ so joŋ tǝkoi ta. 9 Foo ɓǝ ah ya syaŋsyaŋ, so ɓeɓ sǝrri, gbǝ ɓǝ yǝk kpuu ne tǝsalle, a juupel wo ɓǝǝra. 10 Ame Dǝɓlii me faa, fahfal ah naa mah ah Yuda matǝ vǝrvǝr pii soo ge wo ɓe ɓe, amma pii soo ne zahzyil ah daŋ ya.
11 So Dǝɓlii faa nyi me: Israel soɓ zye ɓoo ɓe mgbaŋ laŋ, ɓǝɓe' ah a pǝram gin tǝ mǝ Yuda matǝ vǝrvǝr ko. 12 So faa nyi me, me ge fahsǝŋ, me faa nyi Israel ma ŋwookyaŋ sye: Ame Dǝɓlii me faa, mo piiko soo ge wo ɓe, mor ame ye pa kwan syakke, me ka joŋ kpãh ne ki yao, mor me ka ɓaŋ kpãh ga lii ya, ame Dǝɓlii me faa naiko. 13 Ame Dǝɓlii me faa, sai fan vaŋno, mo keeko ɓǝɓe' ahe, mor ako ŋwookyaŋ ne Dǝɓlii Masǝŋ ahe, mo keeko faɓe' ah mai mo joŋko ne masǝŋ za gwǝǝ mor kpuu maluu ah ra daŋ, zyiiko ka laa zah ɓe ya.
14 Awe za ŋwookyaŋ raino, we pii soo ge, mor ame ye Dǝɓlii ɓiiri, me ga nǝǝ dǝɓ vaŋno vaŋno kǝsyil ɓii gin pǝ yaŋ maluu daŋ, me ga woo za gwa gwa gin morsǝ̃ǝ ɓii daŋ, me ga zaŋ ra pii soo ge tǝwaa Sion ne ko. 15 Me ga nyi zaluu mai moo laara zah ɓe nyi we, a ga joŋra yeɓ kǝsyil ɓii ne yella ne fatanne. 16 So ne cok we ɓoo ge pel pǝ sǝr ah pǝpãa ɓe, za ka ga faara ɓǝ sunduku gbanzah Dǝɓlii ga zah ya, ka ga ɓaŋra syiŋ ah wala foora ɓǝ ah ya, ka ga yeara ne 'yah ah ya, ka ga zyeɓra maki ah laŋ ya. 17 Ne cok zah'nan ah mo ge ɓe, a ga ɗiira yaŋ Jerusalem ne Cokkal Masǝŋ, za sǝr daŋ a ga taira ga gŋ mor tǝɗii ɓe. 18 Ne zah'nan ah Israel ne Yuda gwa daŋ a ga taira ki fahsǝŋ a ga gera pǝ sǝr mai me nyi nyi pa ɓǝǝ lii ka kaa gŋ.
Za Masǝŋ syeera mor masǝŋ ki cam
19 Israel, me faa ɓo me ga nyiŋ mo na we ɓe, me ga nyi sǝr masãh ma kal sǝr wo sǝr daŋ nyi mo. Me so faa, mo ga ɗii me ne Daddǝ, mo ka ga soɓ me faɗa yao. 20 Amma ame Dǝɓlii me faa, tǝgbana mawin matǝ vǝrvǝr ah moo joŋ tǝgwĩi ne wor ah mor pa 'yah ahe, amo laŋ mo joŋ ɓo wo ɓe nai ta.
21 Cii ɓǝ ŋwaa tǝ cii pǝ cok ma tǝgee sǝŋ ah ra, za Israel ye tǝ yera yee tǝkine pǝǝre, mor ɓaŋra fahlii maɓe' ah ɓo, yaŋra Dǝɓlii Masǝŋ ɓǝǝ ɓe. 22 Awe za mai daŋ we ŋwookyaŋ soɓ Dǝɓlii ɓo, we pii soo, a ga zyeɓ we, a ga joŋ we na za tǝ goŋga.
Awe faa: Oho aru tǝ gin wo Dǝɓlii no, mor ako ye Dǝɓlii Masǝŋ ɓuuru. 23 Ru tǝ ɓe, ru ka lwaa gbah jol ne juupel wo masǝŋ ki pǝ cok ma tǝgee sǝŋ ah ra ya, ɓǝ mai za pãa moo ŋwaa gŋ ka ne yeɓ ya, sai pa gbah jol ɓuu za Israel ako ye Dǝɓlii Masǝŋ ɓuu to. 24 Mo ẽe ɗǝ, juupel wo Ba'al ye vǝr fan mai daŋ pa ɓuu mo gaɓ ne joŋ yeɓ ahe, daga gwii ɓǝǝra, dǝǝ ɓǝǝra, ne wee ɓǝǝ mawǝǝ ne maŋwǝǝ daŋ ne cok ka ru pǝnyee ba. 25 Zǝzǝ̃ǝko, ru swah ga sǝŋ ne ɓǝr jol swãare, ka swãa mo re ru pǝlli. Aru ne pa ɓuu ra daŋ ru joŋ faɓe' wo Dǝɓlii Masǝŋ ɓuu daga nyee ɓuuru, ru ka zyii laa zah ah ya.
© Bible Moundang © Alliance Biblique du Tchad, 1996.
