Jeremias ne Rekabien
1 Ne cok zah'nan Jojakim we Josias mo kaa goŋ sǝr Yuda ɓo, Dǝɓlii faa ɓǝ nyi Jeremias, faa: 2 Mo ge wo morsǝ̃ǝ Rekabien ka mo faa ɓǝ ne ra. Mo zaŋ ra ge ɓǝr yaŋ maki ah ne pǝ yaŋ Masǝŋ, ka mo nyi yim nyi ra zwahe. 3 So Jeremias ge ɗii morsǝ̃ǝ Rekabien, Jazania we Jeremias maki ah cam, we dǝɓ ma ɗii ne Habasinia ne wee pah ah tǝkine wee ahe. 4 So Jeremias zaŋ ra ge yaŋ Masǝŋ ne kal ge ɓǝr yaŋ wee Hanan we Jigdalia dǝɓ Masǝŋ ne ra, yaŋ ah a gwari ne yaŋ zaluuri, a tǝtǝl yaŋ Maaseja we Sallum dǝɓlii yaŋ Masǝŋ. 5 So Jeremias woo ŋhǝǝ rǝk nyi Rekabien, so ɓaŋ yim kan nyi ra gŋ daŋ vaŋno, faa nyi ra: We zwah o.
6 Amma zyiira faa: Ru ka zwan yim ya, mor pa ɓuu lii Yunadaɓ we Rekaɓ faa nyi ru, aru ne morsǝ̃ǝ ɓuu daŋ ru zwǝ yim ka. 7 So faa laŋ nyi ru ka ru vuu yaŋ ka, ru pǝǝ 'wah ka, ru pea kpuu vin ka, ru lee laŋ ka ta. Faa nyi ru, pǝ zah'nan cee ɓuu daŋ sai ru kaa pǝ tal mbǝro, mor ka ru nǝn wo sǝr mai ru kaa ɓo gŋ na gwǝǝre. 8 Aru syee mor ɓǝ mai daŋ Yunadaɓ we pa ɓuu lii Rekaɓ mo faa ɓo nyi ru. Aru ne suu ɓuu ru ka zwan yim ya, ŋwǝǝ ɓuu ka zwanra ya, wee ɓuu mawǝǝ ne maŋwǝǝ laŋ ka zwanra ya ta. 9 Aru vuu yaŋ ka kaa gŋ taa ya, ru ka ne kpuu vin ma syak ɓuu ya, ru ka ne 'wah laŋ ka pǝǝ fan gŋ ya. 10 Aru kaa pǝ tal mbǝro, aru syee mor ɓǝ mai daŋ pa ɓuu lii Yunadaɓ mo faa ɓo nyi ru. 11 Amma ne cok Nebukanezar goŋ sǝr Babilon mo ge tǝ ɗaŋ sǝr nyẽeko, ru faa sai na ge yaŋ Jerusalem, mor ka na ǝ̃ǝ jol za sal Babilonien ne Sirien, mor ah ru kaa ɓo yaŋ Jerusalem zǝzǝ̃ǝko.
12-13 So Dǝɓlii ma ne swah daŋ, Masǝŋ Israel, faa nyi Jeremias mo ge faako nyi za sǝr Yuda ne za yaŋ Jerusalem: Ame Dǝɓlii me tǝ fii we, we zyii ka laa zah ɓe ne syee mor ɓǝ faa ɓe ya mor fẽene? 14 Morsǝ̃ǝ Yunadaɓ laara ɓǝ mai Yunadaɓ mo faa nyi ra, mo zwǝra yim ka, ŋhaa dai tǝ'nahko, koo dǝɓ vaŋno kǝsyil ɓǝǝ ka zwan yim ya. Mor laara ɓǝ mai pa ɓǝǝ lii mo faa ɓo nyi ra. Ame laŋ me faa ɓǝ nyi we pǝlli, amma we ka zyii laa zah ɓe ya. 15 Ame pea za yeɓ ɓe profetoen ɓe gin wo ɓiiri, a faara nyi we, we soɓ fahlii ɓe' ɓii ra, we joŋ fan matǝ njaŋ ahe. Laira we, faara we juupel wo masǝŋ ki ra ka, we joŋ mor ɓǝǝ ka, mor ka we nǝn wo sǝr mai me nyi ɓo nyi we ne pa ɓii lii ra. Amma we zyii ka laa zah ɓe wala ɓaŋ syiŋ ɓǝ faa ɓe ya. 16 Morsǝ̃ǝ Yunadaɓ syeera mor ɓǝ mai pa ɓǝǝ lii mo faa nyi ra. Amma ma ɓii we zyii ka laa zah ɓe ya. 17 So ame Dǝɓlii ma ne swah daŋ, Masǝŋ Israel, me ga pee ɓeɓ mai daŋ me faa ɓǝ ah ɓo ge tǝ za sǝr Yuda, ne za yaŋ Jerusalem. Ame ga joŋ ɓǝ ah nai mor ne cok me faa ɓǝ nyi we ɓe, we ka zyii laa ya, ne cok me ɗii we, we ka zyii ɗii ya.
18 Jeremias so faa nyi Rekabien: Dǝɓlii ma ne swah daŋ, Masǝŋ Israel faa: Awe syee mor ɓǝ mai pa ɓii lii Yunadaɓ mo faa ɓo nyi we daŋ, awe laa zah ahe. 19 Ame Dǝɓlii ma ne swah daŋ, Masǝŋ Israel, me faa, morsǝ̃ǝ Yunadaɓ we Rekaɓ ka ga pee we wor ma joŋ yeɓ pel ɓe ya ŋhaa ga lii.
© Bible Moundang © Alliance Biblique du Tchad, 1996.
