Sedekias fifii zah Jeremias
1 Ne cok maki ah Nebukanezar ɓaŋ Sedekias we Josias kan goŋ sǝr Yuda ne pǝ cok Jojakin we Jojakim. 2 Amma Sedekias ne zaluu ah ra tǝkine za daŋ zyii ka syeera mor ɓǝ mai Dǝɓlii moo faa nyi Jeremias ka mo faako ya.
3 Ne cok ah goŋ Sedekias pee Jukal we Selemia ne pa joŋzahsyiŋ Zefanias we Maaseja ge wo Jeremias. Faara nyi ko: Oseni mo juupel wo Dǝɓlii Masǝŋ man mor ɓuuru. 4 Ne cok ah ka Jeremias tǝ kyãh kǝsyil za ne tǝtǝl suu ahe, ka ɓah gbanra ko ɓoo ga daŋgai ya ba. 5 Za sal Farao pǝ̃ǝra daga sǝr Egiɓ. Ne cok Babilonien mai mo tǝ ruura sal ne yaŋ Jerusalem mo laara ɓǝ ahe, so zolra ge hai lal pǝɗǝk ne Jerusalem.
6 So Dǝɓlii ma ne swah daŋ, Masǝŋ Israel, faa nyi Jeremias: 7 Mo faa nyi goŋ sǝr Yuda mai mo pee mo ka fii me sye: Za sal Farao mai mo tǝ ginra ka gbah jol ɓo, a ga jinra ga yaŋ ɓǝǝ sǝr Egiɓ. 8 So Babilonien ga pii soora ginni, a ga ruura sal ne yaŋ Jerusalem, a ga rera, a ɓoora wii nyi. 9 Ame Dǝɓlii me lai we, me faa we joŋ tǝgwĩi ne suu ɓii ka faa sõone Babilonien ka pii soora ge yao ka, amma a ga jinra ginni. 10 Koo we ruu sal ne za sal Babilon mai mo ge tǝ ruura sal ne we, we nĩi ra ne lii ɓǝǝ daŋ laŋ, za mai mo lwaara nwãh ɓo, mo soɓra ra ɓo pǝ tal mbǝro ɓǝǝ ne ko, zan ah a ga urra, a ɓaara wii nyi yaŋ nyẽeko.
Gbǝra Jeremias ge daŋgai
11 Za sal sǝr Babilon soɓra ruu sal ne yaŋ Jerusalem, mor za sal Farao tǝ gin gwari. 12 Ne cok ah Jeremias ur gin yaŋ Jerusalem ka ga pǝ sǝr Benyaamin, mor ka ga nyiŋ zah faren mǝ ah kǝsyil zan ahe. 13 Amma ne cok mo ge dai zahfah Benyaamin, swah za byak cok mai mo gŋ a ɗii ne Jeriija we Selemia we Hanania, gbǝ Jeremias faa nyi ko: Mo tǝ ga wo Babilonien. 14 Jeremias zyii faa: Ka nai ya, me ka tǝ ga wo ɓǝǝr a. Amma Jeriija zyii nyiŋ ɓǝ faa ah ya, gbǝ Jeremias, zaŋ ko kal ge wo zaluu ne ko. 15 Zaluu ge ɓaŋra kpãh tǝ Jeremias, loɓra ko, so ɓaŋra ko ge gaa yaŋ Yunatan pa ma ŋwǝǝ fan goŋe. (Mor yaŋ ah yea tǝgbana yaŋ daŋgai.) 16 Ɓaŋra Jeremias kal ge yaŋ ma mor sǝr ne ko, nǝn gŋ zah'nan pǝpãare.
17 Goŋ Sedekias pepee ge kyeɓ Jeremias, zaŋra ko ge pel ah yaŋ goŋ ne ko, so lal fii ko 'yaŋ faa: Dǝɓlii faa ɓǝ ɓo no ne? Jeremias zyii faa: A no, ɓǝ ah faa sye, mo yah ga mor jol goŋ Babilon. 18 So Jeremias fii goŋ Sedekias faa: Me joŋ faɓe' fẽe ɓo wo ɓo ne zaluu ɓo ra tǝkine za pãa ma ɓǝr yaŋ nyee daŋ, ka we gbǝ me ɓoo ge daŋgai ne? 19 Profetoen ɓii mai mo faara goŋ Babilon ka gin ruu sal ne we wala ne sǝr mai ya, a fẽe ye joŋ wo ɓǝǝ ne? 20 Oseni goŋe, me pǝǝ mo, mo laa ɓǝ faa ɓe, ka mo joŋ fan mai me faa ɓǝ ah ɓo nyi mo. Mo soɓ me ge yaŋ Yunatan pa ŋwǝǝ fan kao, mor mo kal soɓ me ge ɓe, me ga wǝ gŋ.
21 So goŋ Sedekias faa nyi za ka mo gera ne Jeremias pǝ yaŋ za ma byakra goŋe, so faa ka mo nyira zahtǝfah tǝwaa nyi ko vaŋno zah'nan daŋ, sai ka tǝwaa vǝr gin tǝgǝǝ yaŋ daŋ ɓe. Jeremias kaa pǝ yaŋ za ma byak cok naiko.
© Bible Moundang © Alliance Biblique du Tchad, 1996.
