Kalra ge sǝr Egiɓ ne Jeremias
1 Jeremias vǝr faa ɓǝ mai daŋ Dǝɓlii Masǝŋ ɓǝǝ mo pee ko ne ka faa nyi ra. 2 So Azaria we Hosea, Johanan we Karea, ne za maɓea ah ra daŋ, faara nyi Jeremias: Amo tǝ gwah berre, Dǝɓlii Masǝŋ man pee mo ka mo faa nyi ru ru ge sǝr Egiɓ ka ɗǝ ya. 3 Amma Baruk we Neriija ye kǝǝ mo ur ɓo tǝ ɓuu ka soɓ ru ga mor jol Babilonien, ka mo ikra ru, wala mo woora ru kal ge sǝr Babilon ne ko.
4 Johanan ne zaluu sooje tǝkine za daŋ zyii ka laara ɓǝ faa Dǝɓlii mo faa ka mo kaara sǝr Yuda ya. 5 So Johanan ne zaluu sooje woora za mai mo coŋ ɓo sǝr Yuda daŋ kalra ge sǝr Egiɓ ne ko, woora za mai mo yea myahra ɓo kǝsyil za sǝr camcam, mo so pii soora ge ɓo sǝr Yuda: 6 za wǝǝ ne ŋwǝǝ ne wee manyee tǝkine wee goŋ maŋwǝǝ daŋ kal ne ko. Taira za mai Nebusaradan swah sooje mo soɓ ra jol Gedalia ka mo byak ra, ne Jeremias tǝkine Baruk daŋ kal ne ko. 7 Zyii ka laara ɓǝ faa Dǝɓlii ya, kalra ge sǝr Egiɓ ŋhaa ge daira yaŋ Takfanes.
8 Dǝɓlii faa ɓǝ nyi Jeremias yaŋ Takfanes, faa: 9 Mo kyeɓ tǝsal maluu ahe, ka mo woo cii ge sǝŋ zahpel yaŋ pǝ cok mai za moo syee gŋ ga yaŋ govener pǝ yaŋ nyẽeko, mo joŋ ne nahnǝn za manyeeki ah ka mo kwora. 10 Ka mo so faa nyi ra, ame Dǝɓlii ma ne swah daŋ, Masǝŋ Israel, me faa, me ga ɗii dǝɓ yeɓ ɓe Nebukanezar goŋ sǝr Babilon ge nyee ne ko, me ga kan fakal goŋ ah tǝ tǝsal mai me cii ge ɓo sǝŋ, a ga ɓyak tal mbǝro ah tǝl ahe. 11 Nebukanezar a ga ge nyee a ɗaŋ sǝr Egiɓ, za mai mo mor ka ik pǝ wulli, sal ga ik ra pǝ wulli, za mai mo mor ka wuk ne syemme, syem maɓe' ah ga ik ra pǝ wulli, za mai mo mor ka gbahe, a ga gbahra ra kal ne ko. 12 Me ga ɓaa wii nyi yaŋ masǝŋ za Egiɓ ra, goŋ sǝr Babilon ga ɓaa wii nyi masǝŋ ɓǝǝra, wala a ga woo kal ga sǝr Babilon ne ko. A ga vãh sǝr Egiɓ nǝǝ tǝgbana pakǝpii fan moo in tandi wo mbǝro ah ra. Fahfal ah a ga pii soo kal jam. 13 A ga dah tǝsal mai mo peera ɓo ka foo ɓǝ ah yaŋ Bet-Semes sǝr Egiɓ, a ga ɓaa wii nyi yaŋ masǝŋ Egiɓien ra.
© Bible Moundang © Alliance Biblique du Tchad, 1996.
