Dǝɓlii faa ɓǝ tǝ Filistien
1 Ka Farao ɓah ruu sal ne yaŋ Gaza ya ba, Dǝɓlii faa ɓǝ nyi Jeremias tǝ Filistien. 2:4-7; Zak 9:5-7 2 Faa: Mo ẽe ɗǝ, bii tǝ yee ga sǝŋ nǝfah kǝsǝŋ, a ga rah tǝgbana bii moo rah pǝ el yee ga lalle, a ga rah nyiŋ sǝr tǝkine fan mai mo gŋ, yaŋ maluu ne dǝfuu mo kaara ɓo gŋ daŋ. Za ga yera yee mor ka fii gbah jolle. Za mai mo kaara ɓo wo sǝr daŋ a ga yera yee. 3 A ga laara cii ɓal pǝrri, ne cii ɓal muŋta sal ne zahrõm ah ra mo tǝ ciini. Za wee ka ga jinra nahnǝn nǝfal ẽe wee ɓǝǝ ya, mor swah ɓǝǝ vǝr ɓe. 4 Cok ka muŋ Filistien ge ɓe, mor ka ŋgoŋ gbah jol mai mo coŋ ɓo daga sǝr Tirus ne Sidon daŋ. Ame Dǝɓlii me ga muŋ Filistien mai mo urra gin pǝ kyo Kaftor daŋ ge. 5 Ɓǝ ren swãa malii ah lwaa za Gaza ɓe, za yaŋ Askalon yeara zah tǝɗum tǝɗum. Tǝcoŋ Filistien ga yera yee i zah nekẽne? 6 Awe faa: Kafahe Dǝɓlii, mo ga kaa 'yak nekẽne? Mo pii soo ge pǝ pẽe ɓo, mo kaa gŋ 'yak o. 7 Amma a gak kaa 'yak ɗii ne cok me nyi yeɓ ɓo nyi ka joŋ ne? Ame ye pee ko ka ruu sal ne Askalon tǝkine za mai mo kaara ɓo kah mabii.
© Bible Moundang © Alliance Biblique du Tchad, 1996.
