Kiita maki ah tǝ Babilon faɗa
1 Dǝɓlii faa: Me ga pee zyak maɓe' ah kuu ge tǝ sǝr Babilon ne zan ahe. 2 Me ga pee za gwǝǝ gin ɓeɓ sǝr Babilon tǝgbana zyak moo ɓaŋ kun kal ne ko. Ne cok zah'nan ɓeɓ ah mo ge ɓe, a ga ryaŋra zah ɓǝǝ ruu sal ne ra, a ga gbǝǝra ra soɓ sǝr ah ɓoo tǝkolle. 3 We soɓ za sal Babilon mo lwaa 'nǝǝra guu ɓǝǝ wala ɓaara mbǝro vãm ɓǝǝ ka. We soɓ wee tǝbanna ɓǝǝ ka, we vǝr za sal ɓǝǝ tǝɗe'. 4 A ga lwaara nwãhe. Za mai vãm mo kaara ɓo daŋ, a ga wukra ne tǝ fahlii tǝgǝǝ yaŋ ɓǝǝra. 5 Ame Dǝɓlii Masǝŋ ma ne swah daŋ, me ka soɓ za Israel ne za Yuda ɓoo ya, koo mo joŋra faɓe' ɓo wo ɓe Dǝɓ Matǝdaŋdaŋ Israel laŋ ko. 6 We ɗuu we soɓ sǝr Babilon! We ɗuu ka we ǝ̃ǝ cee suu ɓiiri! We soɓ mo ikra we mor faɓe' Babilon ka. Zǝzǝ̃ǝko me tǝ ga faŋ val tǝl ahe, me ga soo ko tǝgbana yeɓ ahe. 7 Babilon yea jol ɓe tǝgbana tahsah vãm kaŋnyeeri ma zwan fanne, za sǝr daŋ zwahra fan ne ko. Za zwahra yim ahe, so kiŋ tǝtǝl nyi ra. 8 Babilon lee gwari nai sǝ, ɓeɓ ɓe. We yeyee tǝl ahe: We kyeɓ syiŋ ka kiŋ nwãh ah ne ko, ɗah maki a laɓ no ne? 9 Za gwǝǝ mai mo kaara ɓo gŋ faara: Ru kyeɓ ka gbah jol Babilon, amma gak laɓ ya. Na soɓ o, na pii soo ge sǝr man o. Masǝŋ ŋgoŋ kiita ɓo tǝ Babilon pǝ'manne, ɓeɓ yaŋ ah tǝɗe' ɓe.
10 Dǝɓlii faa: Za ɓe a faara: Dǝɓlii joŋ na ɓo na za tǝ goŋga. Na ge kee ɓǝ fan mai Dǝɓlii Masǝŋ man mo joŋ ɓo nyi za Sion. 11 Dǝɓlii ur zahzyil za goŋ Medien mor ka mo foora ɓǝ ka ɓeɓ Babilon. Dǝɓlii tǝ ga faŋ val ɓǝ ɓeɓ yaŋ ahe. Zaluu sal laira ɓǝ faa: We zyeɓ guu ɓiiri, we woo bal ɓii uu ne ko. 12 We ɓaŋ tutowal sal ge sǝŋ, ka ruu sal ne Babilon, we zyeɓ za tǝkor sal rǝk pǝsãhe. We woo za ka mo lal mokra.
Dǝɓlii tǝ joŋ fan mai mo fooko ɓǝ ah ɓo ka joŋ wo za Babilon. 13 Babilon ne el camcam pǝpãare, a ne joŋ pǝlli ta, amma cok mǝ ah i zah ɓe, zah'nan ah vǝr ɓe. 14 Dǝɓlii ma ne swah daŋ haa zah ne suu syak ah faa: Me ga pee za pǝpãa tǝgbana tǝzyee ge ka ruu sal ne Babilon, a ga kaara kacella, za ga dahra gor ma cuu ɓǝ swah ɓǝǝ mo joŋra ɓo.
Lǝŋ ma yii Masǝŋ
15 Dǝɓlii ye joŋ sǝr ne swah ahe,
Ako ye joŋ dunia ne fatan ahe.
Ako ye ɓyak coksǝŋ ge ɓo sǝŋ ne fatan ahe.
16 Mo faa ɓǝ ɓe, bam haŋ coksǝŋ,
A ur swãh gin zahtǝmgboo sǝrri,
A joŋ bam sãh ka mo tǝ ge sǝŋ.
A pee zyak gin pǝ cok mai mo tai rǝk ɓo gŋ gin kuuni.
17 Ɓǝ mai joŋ dǝfuu daŋ ciŋra tǝgwĩi ɓo, ara ka ne tǝtǝl ao,
Za ma coo masǝŋ ki daŋ swãa ga re ra ne ɓǝ masǝŋ ki ɓǝǝra,
Mor masǝŋ matǝ goŋga ah ye ka, ara ka ne cee ya.
18 Mor fan makol ah ra ma nen mai dǝɓ mo syesyak yo.
Ne cok Dǝɓlii mo ge ka ŋgoŋ kiita ne ra ɓe, a ga muŋ ra.
19 Amma Masǝŋ Yakuɓ ka nai ya.
Ako ye Dǝɓ mai mo joŋ fan daŋ,
Nǝǝ za Israel ka mo ciŋra za mǝ ahe.
A ɗii ko ne Dǝɓlii ma ne swah daŋ.
Bik Dǝɓlii
20 Dǝɓlii faa: Babilon, amo ye bik ɓe, amo ye fan sal ɓe. Me ɓaŋ mo i za sǝr ne ko, me vǝr sǝr goŋ camcam ne mo. 21 Me ɓaŋ mo ik pǝr ne ko tǝkine za ma yee tǝ ɓǝǝ daŋ, me ɓeɓ muŋta sal ne ko ne za ma ɗaŋ ah ra daŋ. 22 Me ik za wǝǝ ne ŋwǝǝ ne za fatan ne wee manyee ne wee tǝbanna tǝkine woi daŋ ne mo. 23 Me ik za kǝpii fan ne ŋgaɓ fan ɓǝǝ, ne za ma pǝpǝǝ ne dǝǝ, ne za goŋ ne zaluu ɓǝǝ daŋ ne mo.
Kiita tǝ Babilon
24 Dǝɓlii faa: Me ga soo Babilon ne zan ah ne nahnǝn ɓii mor faɓe' mai daŋ mo joŋra wo Sion. 25 Babilon, amo tǝgbana waa mai mo lee jee za ne lii ah daŋ. Amma, ame Dǝɓlii me ga ruu sal ne mo. Me ga ɓaŋ mo ɓoo ga sǝŋ, me soɓ mo gŋ ciŋ sãhe. 26 Ka ɓaŋra tǝsal tǝ gboŋ ɓo koo vaŋno laŋ vuu yaŋ ne ya. Mo ga yea na cok kol ga lii ga lii. Ame Dǝɓlii me faa naiko.
27 We ɓaŋ tutowal ge sǝŋ ka ruu salle! We ul tǝsol sal ka za mo laara! We joŋ za mo zyeɓra suu ka ruu sal ne Babilon! We faa nyi za goŋ Ararat ne Minni, ne Askenas mo ge ruura salle, mo nǝǝra kaigama ma kal pel salle, mo pǝ̃ǝra ne pǝr tǝgbana tǝzyeere. 28 We ɗii za goŋ Medien ne zaluu ɓǝǝ ne zaluu sooje ɓǝǝ tǝkine za sǝr ɓǝǝ daŋ, ka mo zyeɓra suu ka ruu sal ne Babilon. 29 Sǝr laŋ geri geri, coo gǝrgǝr. Mor Dǝɓlii tǝ joŋ ɓǝ mai mo faako ɓo. A ga joŋ sǝr Babilon ciŋ cok kol mai za mo ka kaa gŋ ya. 30 Za sal sǝr Babilon soɓra ruu salle, kaara ɓǝr ɓaale ɓǝǝra, mor swah ɓǝǝ vǝr ɓe, gera ɓo tǝgbana ŋwǝǝre. Zahfah yaŋ ah lee ge sǝŋ, so yaŋ ah tǝ syen wii. 31 Zapee ginra ɓǝrki ɓǝrki mor ka faa nyi goŋ Babilon za sal danra yaŋ ne lii ah daŋ ɓe. 32 Nyiŋra cok yee bii ɓe, ɓaara wii nyi pee ɓe ta. Za sal Babilon daŋ zahzyil nǝǝ ra ɓe. 33 Coŋ ɓo biŋ nai to o, za syiŋ ɓǝǝ ga ŋgom ra ga sǝŋ, a ga syeera tǝ ɓǝǝ dah ra ne ɓal tǝgbana dǝɓ moo ɗuu sor tǝ sǝrri. Dǝɓlii ma ne swah daŋ, Masǝŋ Israel faa naiko.
34 Nebukanezar goŋ sǝr Babilon ge re yaŋ Jerusalem, laŋ yaŋ ah bilbil, ɓaŋ sǝ̃ǝ ge ɓǝr tǝgbana fan malii ma mor bii moo sǝ̃ǝ fanne, woo fan mai zahzyil ah mo tǝ 'yah daŋ, soɓ tǝcoŋ ah myah ge lalle. 35 Sai za Sion mo faara: Ɓǝɓe' mai Babilon mo joŋ wo man ɓǝ ah mo pii soo ge tǝtǝl ahe. Za yaŋ Jerusalem mo faara: Bone mai Babilon mo cuu nyi ru, ɓǝ ah mo pii soo ge tǝtǝl ahe.
Dǝɓlii ga gbah jol za Israel
36 So Dǝɓlii faa nyi za yaŋ Jerusalem: Me ga cam tǝ ɓiiri, me ga faŋ val zahwaa ɓiiri, me ga ǝŋ bii sǝr Babilon, me ga joŋ el ah ra daŋ yakke. 37 So Babilon ga ciŋ fǝlli, nǝǝ cok ye ga kaa gŋ to. Za ka ga kaa gŋ ya. Koo zune mo kwo ɓe daŋ, gal ga re ko tǝ ɓǝ fan mai mo joŋ ɓo wo yaŋ ahe. 38 Za Babilon daŋ a ga yera yee na ɓolle, a ga ŋwaara yee tǝgbana wee ɓolle. 39 Koŋ i ra ɓo ne? Me ga nyi farel malii ah nyi ra. Me ga nyi fazwan nyi ra a laara pǝ'nyahre, a ga nwãhra nǝmmi, ka ga kpiŋra yao. 40 Me ga woo ra ka ga ŋgom tǝgbana pǝsǝ̃ǝ ne sǝgwiiri. Ame Dǝɓlii me faa naiko.
Rera Babilon
41 Yaŋ Babilon mai za sǝr daŋ moo yiira, sal re ɓe, yaŋ ah so ciŋ fan ma ren gal za sǝr ɓo o. 42 Bii malii ah ge tǝ Babilon, wea bii ɗuu tǝtǝl yaŋ ahe. 43 Yaŋ ah ra ciŋ cok kol ɓe, ciŋ kǝsyicok maɓol tǝcer mai za mo ka gŋ ya, koo mo ka gara gŋ laŋ ya ɓo. 44 Me ga ŋgoŋ kiita tǝ Bel masǝŋ Babilon, me ga joŋ ko ne doole, ka mo nyiko fan sãh ah daŋ mo sǝ̃ǝko ɓo ge. Za ka ga juura pel wol ah faɗa yao.
Ɓaale yaŋ Babilon lee ɓe. 45 Za Israel, we ɗuu gin gŋ ge lalle. Zune daŋ mo ɗuu ǝ̃ǝ cee suu ah zah kpãh ɓe me ɓaŋ ɓo pǝ'manne. 46 Zahzyil mo nǝǝ we, wala gal mo re we tǝ ɓǝ mai we tǝ laa pǝ sǝr ah ka. Mor syii daŋ ɓǝ maɓe' ah gin joŋ pǝ sǝr ahe, za goŋ a ruura sal wo ki. 47 Zah'nan ah no ginni, ne cok ah me ga ŋgoŋ kiita tǝ masǝŋ Babilon ra, swãa ga re za sǝr ah ne lii ah daŋ. A ga ikra zan ah daŋ pǝ wulli. 48 Ne cok Babilon mo lee ge mor jol za mai mo tǝ ga gera gin fahsǝŋ ka ɓeɓ ah ɓe, fan mai mo no wo sǝr tǝkine coksǝŋ daŋ a ga 'nyahra suu. Ame Dǝɓlii me faa naiko. 49 Babilon ik za pǝ wul wo sǝr ne lii ah daŋ. Zǝzǝ̃ǝ Babilon ga leere, mor ik za Israel ɓo pǝ wul pǝlli.
Masǝŋ faa ɓǝ nyi Yahuduen sǝr Babilon
50 Awe za ɓe, we sǝr Babilon, awe ǝ̃ǝ gin zah wul ɓe. Zǝzǝ̃ǝ we kaa kao, we gyo. Koo we pǝɗǝk ne sǝr ɓii mgbaŋ laŋ, sai we foo ɓǝ ɓe Dǝɓlii ɓiiri, we foo ɓǝ Jerusalem ta. 51 Awe faa: Ru laa tǝǝ ɓo pǝlli, swãa kǝ̃ǝ ru ɓo no cam, ru ka pǝswah yao, mor za gwǝǝ nyiŋra cok matǝdaŋdaŋ yaŋ Masǝŋ ɓe. 52 Mor ah me faa, zah'nan ah no ginni, ne cok ah me ga ŋgoŋ kiita tǝ masǝŋ Babilon ra, za ma lwaara nwãh wo suu, a ga 'meera pǝ sǝr ah ne lii ah daŋ. 53 Koo Babilon mo yee ge coksǝŋ, mo ge vuu yaŋ ma ne ɓaale ah gŋ laŋ, me pee za ga ɓeɓɓe. Ame Dǝɓlii me faa naiko.
Ɓeɓ Babilon
54 Dǝɓlii faa: We laa cii yee mo tǝ cii Babilon ɗǝ, tǝ yera yee mor ɓeɓ mo ge ɓo tǝ sǝr ahe. 55 Ame tǝ ɓeɓ Babilon, me tǝ yee zah ah ka mo faako ɓǝ ka. Za sal danra yaŋ ahe, cii yee ɓǝǝ mo tǝ ruura sal a cii tǝgbana bii malii ahe. 56 Gera ɓo ka ɓeɓ Babilon, gbahra sooje ah ra bamme, saŋ ɓǝǝ hah ɓe. Ame ye Masǝŋ ma ŋgoŋ kiita tǝ ɓǝɓe', me ga soo Babilon tǝgbana yeɓ ah mo joŋko. 57 Me ga joŋ zaluu ah ne za fatan ah tǝkine sooje ah ra daŋ zwah yim tǝtǝl kiŋ ra. A ga nwãhra nǝmmi, ka ga kpiŋra yao. Ame Goŋ me faa naiko, ame ye Dǝɓlii ma ne swah daŋ. 58 Ɓaale yaŋ Babilon mayǝk lii za sal ga hah ga sǝŋ, a ga ɓaara wii nyi zahfah ah ra mawah ko. Yeɓ mai za mo gaɓ ne joŋ ah daŋ a ga yea tǝkolle, wii ga sye belbel. Dǝɓlii ma ne swah daŋ faa naiko.
Jeremias pepee ge sǝr Babilon
59 Seraja we Neriija we Maaseja, ako ye pa swan fahlii goŋ Sedekias. Ne syii patǝ nai ah Sedekias mo kaa goŋ sǝr Yuda ɓo, Seraja swǝ fahlii Sedekias ge Babilon, so Jeremias pee ko ge ne ɓǝ gŋ ta. 60 Jeremias ŋwǝǝ ɗerewol, kee ɓǝ ɓeɓ mai mo tǝ yah gin tǝ sǝr Babilon, tǝkine ɓǝ fan manyeeki ah daŋ gŋ. 61 Faa nyi Seraja: Ne cok mo ge dai Babilon ɓe, sai mo kee ɓǝ mai mo ŋwǝǝ ɓo pǝ ɗerewol nyee daŋ nyi zana. 62 Fahfal ah ka mo so juupel faa: Dǝɓlii, amo faa mo ga ɓeɓ cok maiko, fan ma ne cee, dǝfuu ne faɓal daŋ ka ga yea gŋ ya, cok ah ga ciŋ cok kol ga lii. 63 Seraja, ne cok mo kee ɗerewol ah nyi za vǝr ɓe, ka mo ɓaŋ tǝsal mo baŋ ge wol ah mo ɓoo ge pǝ el Efrat, 64 ka mo so faa: A ga joŋ wo Babilon naiko. A ga danne, ka fǝ̃ǝ pǝ̃ǝ gin sǝŋ yao, mor ɓeɓ mai Dǝɓlii mo tǝ ga pee gin tǝl ahe.
Ɓǝ faa Jeremias i zah nyee ɓe.
© Bible Moundang © Alliance Biblique du Tchad, 1996.
