Yaŋ Jerusalem leere
(2 ZaG 24:18–25:7)1 Ne cok Sedekias mo kaa goŋ, ka joŋ syii ɓo jemma gwa tǝtǝl vaŋno, kaa goŋ yaŋ Jerusalem syii jemma tǝtǝl vaŋno. A ɗii mah ah ne Hamutal, mǝlaŋ Jeremias ma yaŋ Libna yo. 2 Goŋ Sedekias joŋ fan maɓe' ah pel Dǝɓlii ryakryak na goŋ Jojakim mo joŋni. 3 Kal yaŋ Jerusalem ne sǝr Yuda daŋ a pǝɓe' no cam, mor ah Dǝɓlii ɓaŋ kpãh tǝ ɓǝǝ gbahra zan ah kal ne ko.
Sedekias ŋwookyaŋ ne goŋ Babilon. 4 Ne zah'nan jemma vaŋno pǝzyil fĩi patǝ jemma, ne syii doraŋ ah Sedekias mo kaa goŋ ɓo, Nebukanezar goŋ sǝr Babilon ge ne za sal ah daŋ, ge ruu sal ne yaŋ Jerusalem. Gbahra jul fahfal yaŋ ah lalle. So ryaŋra yaŋ ahe. 5 Ryaŋra yaŋ ah ne sal ŋhaa dai syii jemma tǝtǝl vaŋno ah Sedekias mo kaa goŋ ɓo. 6 Ne zah'nan doraŋ pǝzyil fĩi patǝ nai ah ne syii ahe, koŋ wǝ yaŋ Jerusalem pǝ'manne, za ka lwaara farel ka ren a. 7 So cera ɓaale yaŋ ahe, sooje sǝr Yuda daŋ kyeɓra ka ɗuu ne suŋ kalle, Babilonien ryaŋra yaŋ ah kiŋ cyõ. Lal pǝ̃ǝra tǝ fahlii ma ga pǝ 'wah goŋ kǝsyil ɓaale mai mo cera ɓo, ɗuura ka ga fah kǝ kah el Yordan. 8 Amma za sal Babilonien foora mor goŋ Sedekias, ge gbǝra ko tǝbǝǝ gwari ne yaŋ Jeriko. Sooje ah ra daŋ ɗuura kalle, soɓra ko ɓoo syak ahe. 9 Ne cok mo gbǝra Sedekias, zaŋra ko kal ge nyi goŋ Nebukanezar ne ko, ka a yaŋ Ribla pǝ sǝr Hamat. Nebukanezar ŋgoŋ kiita tǝl ah gŋ ŋhaako. 10 Goŋ Babilon gbah wee Sedekias ŋgom ge lal yaŋ Ribla ne nahnǝn pa ɓǝǝra. Ŋgom zaluu sǝr Yuda ge lal ta. 11 So nǝǝ nahnǝn Sedekias gwa daŋ ge lalle, ɓoo celeelu ge nyi jol zaŋra ko kal ge Babilon ne ko. Sedekias kaa pǝ daŋgai gŋ ŋhaa dai zah'nan wul ahe.
Yaŋ Masǝŋ ɓeɓ ɓe
(2 ZaG 25:8-17)12 Ne zah'nan jemma pǝzyil fĩi dappe, ne syii jemma tǝtǝl doraŋ ah Nebukanezar mo kaa goŋ sǝr Babilon ɓo, Nebusaradan swah sooje ma byak goŋ faa nyi za sal ah mo danra yaŋ Jerusalem. 13 Ɓaa wii nyi yaŋ Masǝŋ ne yaŋ goŋ ne yaŋ za maluu ah tǝkine yaŋ za mai mo yaŋ Jerusalem daŋ. 14 Sooje ah hahra ɓaale yaŋ ah ge sǝŋ. 15 So Nebusaradan woo tǝcoŋ za manyeeki ah mai mo coŋra ɓo yaŋ Jerusalem ne za mai mo ge nyira jol nyi tǝkine tǝcoŋ za ma tan zah yeɓ camcam daŋ kal ge sǝr Babilon ne ko. 16 Amma soɓ za masyak manyeeki ah fahfal pǝ sǝr Yuda, ka mo pǝǝra sor tǝkine pea kpuu vin.
17 Babilonien dahra waddǝǝ kpuusǝŋ ma vãm syẽ mai mo yaŋ Masǝŋ, tǝkine cok ma kan fan tǝl ah ma vãm syẽ mo kanra mabii ɓo ne gŋ daŋ, woora vãm syẽ ah daŋ kal ge sǝr Babilon ne ko. 18 Woora ciiri, fan woo cokki, nyahe, ne tahsah ma syee syim gŋ tǝkine fan ma vãm syẽ mo mor ka joŋ yeɓ yaŋ Masǝŋ daŋ kal ne ko. 19 So swah sooje ma byak goŋ woo tǝkpelzaŋraŋ, tahsah, ne fan ma vãm kaŋnyeeri ne ma vãm solai ah ra daŋ. 20 Fan ma vãm syẽ ah ra mai goŋ Salomo mo zyeɓ mor yaŋ Masǝŋ: wǝǝdǝǝ matǝ gwa, ne cok ma kan fan tǝl ahe, ne mabii, tǝkine wǝǝ dǝǝ kpuusǝŋ ma vãm syẽ jemma tǝtǝl gwa mo gbǝ uu ɓo ne ko. Fan marai daŋ dǝɓ ka gak lii yǝk ah ya. 21-22 Wǝǝdǝǝ matǝ gwa, pǝzyil ah gǝǝgǝǝ vaŋno ah i jol ɓo jemma tǝtǝl nama, suu waddǝǝ malii kahlaa ah i jol jemma tǝtǝl gwa, yǝk vãm ah 'ah ah nǝn tǝwee jol nai. Tǝtǝl ma vãm syẽ ah mai mo tǝtǝl ahe, wah ah i jol dappe. Fan ma kǝkaŋ ah ne foto kpuu grenadin kiŋ tǝtǝl ah zyaŋ cyõ, fan ah ra daŋ a ne vãm syẽ. 23 Fan ma kǝkaŋ ah mai mo kaŋra ɓo wo wǝǝdǝǝ ah daŋ matǝ vaŋno ah kpuu grenadin jemma doraŋ tǝtǝl yea wol ahe, foto kpuu grenadin mai mo kiŋ ɓo wol ah zyaŋ cyõ, a temere, maki ah laŋ fan wol ah nai ta.
Yahuduen kal ge Babilon
(2 ZaG 25:18-212 27-30)24 Nebusaradan swah sooje ma byak goŋ woo Seraja pa joŋzahsyiŋ malii, ne patǝ gwa ah pa joŋzahsyiŋ Zefanias tǝkine zaluu yaŋ Masǝŋ sai. 25 Tǝgǝǝ yaŋ laŋ ge ɓaŋ dǝɓ mai mo yea kaa swah sooje ɓo, so woo za rǝŋ kǝsyil zaluu ma pel goŋe, ne patǝtǝl swah sooje mai ako ye moo woo sooje pǝ sǝr ahe, tǝkine za mayǝk ah ra jemma jemma yea. 26 Nebusaradan woo ra kal ge wo goŋ Babilon ne ko, ka a yaŋ Ribla. 27 Goŋ Babilon loɓ ra ne bǝrǝǝ tǝkine ik ra pǝ wul yaŋ Ribla sǝr Hamat ŋhaako. Woora za sǝr Yuda gin sǝr ɓǝǝ kal ne naiko.
28 Pãa za mai Nebukanezar mo gbah ra kal ne a naiko. Pǝzyil syii ah mo kaa goŋ syii rǝŋ, woo za kal ne 3.023, 29 mo kaa goŋ dai syii jemma tǝtǝl nama, woo za yaŋ Jerusalem kal ne 832. 30 Ne cok mo kaa goŋ dai syii jemma gwa tǝtǝl sai Nebusaradan woo za kal ne 745. Pãa zan ah mo woo kal ne daŋ tai 4.600. 31 Ne zah'nan jemma gwa tǝtǝl dappe pǝzyil fĩi jemma tǝtǝl gwa, ne syii jemma sai tǝtǝl rǝŋ ah fahfal mo gbǝra Jojakin goŋ sǝr Yuda kal ɓo ne ko, Evil-Marduk goŋ sǝr Babilon joŋ Jojakin pǝsãhe, wǝǝ ko gin pǝ daŋgai ɓoo. Syii ah syii kaa goŋ ah yo. 32 A faa ɓǝ 'nyah ne ki, yii ko kal za goŋ mai mo gera ɓo pǝ daŋgai sǝr Babilon ne ki daŋ. 33 So nyi fahlii nyi Jojakin wǝǝ mbǝro daŋgai mo wol ah ge lalle. Pǝ zah'nan cee ah mo kaa daŋ, a ren farel ne goŋe. 34 Goŋ a nyi farel masãh ah nyi ko ren zah'nan Masǝŋ daŋ, tǝgbana mai zahzyil ah mo 'yahe.
© Bible Moundang © Alliance Biblique du Tchad, 1996.
