Za sal ryaŋ yaŋ Jerusalem
1 Awe za Benyaamin, we ɗuu we pǝ̃ǝ gin Jerusalem ka we ǝ̃ǝ, we ul tǝsol sal yaŋ Tekoa, we ɓaŋ tutowal sal ge sǝŋ yaŋ Bet-Hakkerem mor gaɓ ne ɓeɓ malii ah tǝ ga gee fahsǝŋ ginni. 2 Yaŋ Sion, a tǝgbana cok pii fan masãh ahe, 3 amma me ga ɓeɓɓe. Za goŋ camcam ga gera ne za sal ɓǝǝra, a ga gbahra jul ryaŋ yaŋ ah ne ko, zune daŋ a ga kaa pǝ cok mai zahzyil ah mo 'yahe. 4 A ga faara: Na zyeɓ suu ka ruu sal ne Jerusalem! Na zyeɓ suu, na ga ruu sal ne ki ne com kǝsyitǝtǝlli! Amma so faara: Na gbǝ rol ɓe, lil joŋ ɓe, com tǝ yah dan o. 5 We ur na ge ruu sal ne Jerusalem ne suŋ ko, na ɓeɓ yaŋ ahe.
6 Dǝɓlii ma ne swah daŋ faa nyi za goŋ rai: We cee kpuu ge lalle, we wor sǝr ge sǝŋ kah ɓaale ka we ryaŋ yaŋ Jerusalem ne ko, me ga ɓeɓ yaŋ ah mor ɓǝɓe' baa ɓo gŋ pǝlli. 7 Ɓǝɓe' a wuu ɓǝr yaŋ Jerusalem tǝgbana lak bii moo wuu bii. Ame kwan ɓǝ foo ɓe' ɓǝǝ ne ɓǝ ɓeɓ fan ye pǝ yaŋ ah to, me kwan za ma ne syem ne za ma ne nwãh wo suu cẽecẽe. 8 Awe za yaŋ Jerusalem, we nyiŋ lai ɓe me tǝ lai we, mor ka me soɓ we, me ga joŋ yaŋ ɓii tǝgbana cok kol mai za mo ka kaa gŋ ya.
Za Israel ŋwoora kyaŋ
9 So Dǝɓlii ma ne swah daŋ faa nyi me: A ga ŋhǝǝra tǝcoŋ za Israel mai mo coŋ ɓo tǝgbana dǝɓ moo ŋhǝǝ lee kpuu vin. Mor maiko mo hǝǝ ǝ̃ǝ manyeeki ah tǝgbana mo gak no na pa 'wah moo joŋni. 10 Me zyii faa: Me ge faa ɓǝ nyi ra ne lai ra ɓe, azu ye ga laa ɓǝ faa ɓe ne? Coora sok ɓǝǝ ɓo coo, ka ga laara ya, ka ga zyii laara ɓǝ faa ɓo ya, a syakra ɓǝ ah syakke. 11 Dǝɓlii, mo ɓaŋ kpãh ɓo tǝtǝl ɓǝǝra, me ɓaŋ ɓo nai ta, me ka gak rõm laŋ yao. So Dǝɓlii faa nyi me: Mo soɓ kpãh ɓe rǝk ge tǝtǝl wee manyee mai mo tǝ fahlii tǝgǝǝ yaŋ tǝkine tǝ wee tǝbanna mo taira ɓo. A ga gbahra za wǝǝ ne ŋwǝǝ ɓǝǝ daŋ kal ne tǝkine za matam ah daŋ. 12 Ame Dǝɓlii me faa, yaŋ ɓǝǝ ne 'wah ɓǝǝ tǝkine ŋwǝǝ ɓǝǝ daŋ a ga ciŋ mǝ za ki. Me ga ŋgoŋ kiita tǝ za sǝr maiko. 13 Mor ara ne lii ɓǝǝ daŋ, zaluu ne wee manyee daŋ, a kyeɓra lak ne fahlii maɓea ahe. Profetoen ne za joŋzahsyiŋ daŋ a gwahra berre. 14 A wuura zahzyil nyi za ɓe tǝ ɓǝ faɓe' ɓǝǝra, a faara: Ɓǝ ki kǝka, awe jam. So jam kǝka! 15 Ame Dǝɓlii me faa, swãa a ren ra tǝ ɓǝ joŋ fan mai me syiŋ ɓo no ne? Ka, swãa ka ren ra tǝ ɓǝ ah ya syaŋsyaŋ. A ga leera tǝgbana za ki mo leera ɓo ta. Ne cok me ŋgoŋ kiita tǝ ɓǝǝ ɓe, a ga vǝrra.
Za Israel soɓra fahlii Masǝŋ ɓoo
16 Dǝɓlii faa nyi zan ahe: We uu tǝwoŋ fahlii ka we ẽe cokki, ka we fifii we faa: Fahlii matãa mai na yea tǝ syee gŋ a kẽne? Fahlii masãh ah kẽne? Ka we syee gŋ, we ga yea jam. Amma zan ah faara: Ru ka ga syee gŋ ya. 17 So Dǝɓlii woo za byak cok rǝk ka mo lai ra ka mo laara cii kokõorĩi, amma faara: Ru ka laa ya.
18 So Dǝɓlii faa: We laa ɓǝ fan mai mo tǝ ga joŋ wo za ɓe. 19 Sǝrri, mo laa, me ga soɓ ɓeɓ ge tǝ zai ko, reba yeɓ ɓǝǝ mo joŋra ɓo yo, mor zyii laara zah ɓe ya, ɓoora ɓǝ cuu ɓe ge lalle. 20 Me ka tǝ 'yah ɓǝrdi mai moo woora gin sǝr Seba ge nyi me ne ya, me ka ne 'yah fan gbãh moo woora pǝ sǝr maɗǝk ah gin ne ya ta. Me ka nyiŋ fan nyi ɓǝǝr a, me ka laa pǝ'nyah ne syiŋ ɓǝǝ moo joŋra ya ta. 21 Ame Dǝɓlii me ga joŋ za mai ɓeara tǝ ɓal a leara ga sǝŋ, pah wee ne wee ɓǝǝ ne bai ɓǝǝ ra tǝkine jǝk ɓǝǝ ra daŋ a ga wukra.
Za sal gee fahsǝŋ ge
22 Dǝɓlii faa: Za tǝ gin fah pǝ sǝr ma fahsǝŋ ginni, za maswah ah pǝ sǝr maɗǝk ah zyeɓra suu sal ɓo. 23 Woora guu ɓǝǝ ne zǝǝ ɓǝǝ ɓo tǝ gin ne ko, zan ah ra pǝgaɓ no cam, ka kwanra syak ya, kyaŋ ɓǝǝ a cii tǝgbana wea bii mabii moo ciini, yeera ɓo tǝ pǝr ɓǝǝra, pǝ̃ǝra ɓo ka ruu sal ne Sion. 24 Za yaŋ Jerusalem faara: Aru laa ɓǝ ɓǝǝra, suu ɓuu wuk sǝnak sǝnak ne galle, zahzyil nǝǝ ru tǝgbana mawin mai mo kaa byaŋ ɓo. 25 Faara: Na ge lal ka, na kyãh tǝ fahlii ka ta, mor za syiŋ man ra gŋ ne fan salle. Gal ryaŋ zah man ɓe. 26 Dǝɓlii faa: Za ɓe, we ɓaa mbǝro dahsuu, ka we hǝr tǝ sǝrri. We yeyee ne mĩi tǝgbana dǝɓ moo yeyee wul we tǝ vaŋno ahe, mor dǝɓ ma ɓeɓ ɓii tǝ ga ge gwari nai sǝ, ka ruu sal ne we.
27 Dǝɓlii faa nyi Jeremias: Me kan mo ɓo ka mo lii za ɓe, mo lii ra, ka mo tǝ ɓǝ kal ɓǝǝra. 28 Kalra za ma ŋwookyaŋ daŋ ne ɓe' ɓe, a kyãhra ne in ɓǝ zah zana, tǝtǝl ɓǝǝ pǝyak kal vãm ɓe, ɓeɓra ɓo ne lii ɓǝǝ daŋ. 29 Pa woŋ dahwii a woŋ ne swah ka wii mo zye vãm ka sǝr ma wol ah mo ge lalle, amma vãm ah gak ka hǝǝ ka sǝr mo pǝzyil ah mo ge lal a. Joŋ yeɓ ah ga pel ka ne yeɓ ya. Ɓǝ za maɓea ah mo syen ge lal a, a nai ta. 30 A ga ɗiira ra ne vãm ma ɓoo ga lalle, mor ame Dǝɓlii me ɓoo ra ge lal ɓe.
© Bible Moundang © Alliance Biblique du Tchad, 1996.
