1 Me tǝ 'yah tǝtǝl ɓe mo yea na lak bii, ka mĩi yee mo wuu ge nahnǝn ɓe, ka me yeyee com ne suŋ daŋ mor za ɓe mai mo ikra ra ɓo pǝ wulli . 2 Kǝnah me no ne cok mai ka me ge kaa gŋ kǝsyicok ɓe, me soɓ za ɓe, me kal ga gŋ, mor ara daŋ za bai goŋga ye ra, ciŋra za tǝ vǝrvǝr ɓe.
3 Dǝɓlii faa: Za ɓe a kaara ma ne ɓal gwah ber cẽecẽe. Pǝ sǝr ah ber nyiŋ cok goŋga kaa gŋ ɓe. A joŋra faɓe' ɓǝrki ɓǝrki. Tǝra me Masǝŋ ɓǝǝ yao.
4 Zune daŋ a joŋ vǝrvǝr ne bai ahe, dǝɓ ma zyii nyiŋ ɓǝ naa pah ah kǝka, zune daŋ a joŋ vǝrvǝr ne naa pam tǝgbana Yakuɓ mo joŋni, dǝɓ daŋ a gwah ber nyi bai ahe. 5 Ara ne lii ɓǝǝ daŋ, a joŋra vǝrvǝr ne bai ɓǝǝra, dǝɓ ma faa goŋga kǝka kǝsyil ɓǝǝr a, feera fahlii vǝrvǝr ɓo ne lii ɓǝǝ daŋ, a joŋra faɓe', so ka zyiira toobii ya. 6 A joŋra ɓǝ maɓe' ah ɓǝrki ɓǝrki, a joŋra vǝrvǝr ga morki morki. Dǝɓlii faa: Za ɓe ka zyii nyiŋra ɓǝ ɓe ya.
7 Mor ahe, Dǝɓlii ma ne swah daŋ faa: Me ga hǝǝ za ɓe na vãm ka me lii ra ne ko. Za ɓe joŋra faɓe', ame so joŋ fẽe ne ra faɗa ne? 8 Tǝrĩi ɓǝǝ a tǝgbana nãaguu mai moo in dǝɓ pǝ wulli, sai a faara ɓǝ ma ne vǝrvǝr ah ra to. Zune daŋ a faa ɓǝ ma'nyah ah nyi pa jǝk ahe, so a kaafuu ah ma pǝ zahzyilli. 9 Dǝɓlii faa: Me ka ga ŋgoŋ kiita tǝ ɓǝǝ mor ɓǝ marai ya ne? Me ka ga faŋ val tǝ za ma morãi ya ne?
10 Jeremias faa: Me ga yeyee tǝ ɓǝ waare, me ga yeyee ne mĩi tǝ ɓǝ cok pii fanne, mor cok ah ra daŋ yak tǝɗe' ɓe, koo dǝɓ vaŋno laŋ ka syee gŋ yao, dǝɓ ka laa cii yee dǝǝ gŋ laŋ yao, juu tǝkine nǝǝ cok zolra gin gŋ kal ɓe.
11 Dǝɓlii faa: Me ga joŋ yaŋ Jerusalem ciŋ gboŋni, tǝkine cok mai sǝgoi mo ga kaa gŋ. Yaŋ maluu mo pǝ sǝr Yuda daŋ, a ga ciŋ cok kolle, koo dǝɓ vaŋno laŋ ka ga yea gŋ ya.
12 Jeremias fifii faa: Dǝɓlii, mor fẽe sǝr mai ɓeɓ ɓo, so yak ciŋ cok kol ɓo, koo dǝɓ vaŋno laŋ ka syee gŋ yao ne? Azu ye ne tǝtǝl ka gak laa mor ɓǝ mai ne? Amo cuu mor ah ɓo nyi zu ka mo gak faako ɓǝ ah nyi za ki ne?
13 Dǝɓlii zyii faa: Fan mai joŋ nai mor za ɓe soɓra ɓǝ cuu ɓe me nyi ɓo nyi ra ɓoo ɓe. Ka zyii laara zah ɓe wala joŋra fan mai me faa ɓo nyi ra ka joŋ ya. 14 Amma so yerra zahzyil ɓǝǝ kal tǝ syeera mor Ba'al tǝgbana pa ɓǝǝ mo cuura ɓo nyi ra. 15 So we laa ɓǝ mai ame Dǝɓlii ma ne swah daŋ, Masǝŋ Israel, me ga joŋ. Me ga nyi farel mazwak ah nyi za ɓe ka mo rera, me ga nyi fawul nyi ra zwahe. 16 Me ga myah ra ga kǝsyil za mai suu syak ɓǝǝ ne pa ɓǝǝ lii ra daŋ mo tǝra ɓǝ ɓǝǝ taa ya. Me ga pee za sal gin ruu sal ne ra, ŋhaa sai ka me vǝr ra tǝɗe' ɓe.
Za yaŋ Jerusalem yera yee mor fii gbah jolle
17 Dǝɓlii ma ne swah daŋ faa: we foo ɓǝ fan mai mo tǝ joŋni. We ge ɗii ŋwǝǝ ma yeyee mai mo tǝra ɗǝǝ lǝŋ wul ɓo ge ne ko. 18 Za faara: We faa nyi ra mo hǝǝra gwari, ka mo ge ɗǝǝra lǝŋ wul nyi ru, ka mĩi yee mo hǝǝ nahnǝn ɓuu ka ru yeyee ge sǝŋ ne mĩi syẽ.
19 We laa cii yee mo tǝ cii Sion ɗǝ: Za mana, ɓeɓ lwaa na ɓe! Swãa malii ah lwaa na lii ɓe! Na soɓ sǝr man o, mor hahra yaŋ man daŋ ge sǝŋ ɓe!
20 Jeremias faa: Awe ŋwǝǝre, we laa ɓǝ mai Dǝɓlii mo faa, we syii sok mor ɓǝ faa ahe, we cuu yeyee wul nyi wee ɓii maŋwǝǝre, we cuu lǝŋ wul nyi wee bai ɓii ra, ka mo ɗǝǝra. 21 Mor wul ge dan zahtǝwoo yaŋ man ra, ne pǝ faadal man ra ɓe, ik wee manyee myah ge sǝŋ tǝ fahlii tǝgǝǝ yaŋ, ik wee tǝbanna pǝ cok luma. 22 Wul dǝfuu ga myah tǝ sǝr tǝgbana mǝr fan moo myah ma tǝ sǝr pǝ 'wahe, a tǝgbana keesyer mai mo joŋra sor ɓe, moo soɓra fahfal dǝɓ mo ka tai ga tǝki ya. Ɓǝ mai Dǝɓlii mo faa nyi me, ka me faa koiko.
23 Dǝɓlii faa: Dǝɓ ma ne tǝtǝl mo yiiko suu ne ɓǝ fatan ah ka, dǝɓ maswah mo yiiko suu ne ɓǝ swah ah ka ta, koo pa joŋ laŋ mo yiiko suu ne ɓǝ joŋ ah ka. 24 Dǝɓ mo tǝ 'yah yii suu ah ɓe, sai mo yiiko suu ah mor ako tǝ me ɓo, a laa mor ɓǝ faa ɓe. Mor ame Dǝɓlii me joŋ fan ma ne fahlii ah ne matǝ njaŋ tǝkine masãh ah wo sǝrri. Ame 'yah fan ma morãi to. Ame Dǝɓlii me faa naiko.
25 Dǝɓlii faa: Zah'nan ah no ginni, ne cok ah me ga ŋgoŋ kiita tǝ za mai mo daara kan ma zahzyil a, amma mo daara ma wo suu lal ɓo to 26 za sǝr Egiɓ, ne Yuda, ne Edom, ne Ammon, ne Moab, tǝkine za mai daŋ mo kaara ɓo kǝsyicok mo swãara rĩi ɓǝǝ ge ɓo lalle . Za marai ne za Israel daŋ daara kan ma zahzyil a.
© Bible Moundang © Alliance Biblique du Tchad, 1996.
