Joɓ tǝ yeyee ɓǝ zah'nan cee ahe
1 Me gaɓ ne kaa sǝŋ ne cee ɓe. Mo laa ɓǝ faa ɓe me tǝ faa ne ɓǝ swaa pǝ zahzyil ɗao. 2 Masǝŋ, mo ŋgoŋ kiita tǝ ɓe ka, mo cuu ɓǝ mai mo ne tǝtǝl ɓe nyi me. 3 A pǝsãh wo ɓo ka mo joŋ ɓǝɓe' wo ɓe no ne? A pǝ'nyah wo ɓo ka mo syẽa fan mai amo ye mo joŋ ne suu ɓo no ne? A pǝ'nyah wo ɓo ka mo laa pǝ'nyah ne ɓǝ foo za faɓe' mo foora ɓo no ne? 4 Amo ẽe fan tǝgbana dǝfuu moo ẽera ne? 5 Zah'nan cee ɓo pǝcõo na ma ɓuu ta ne? 6 Mor fẽe mo kyeɓ mor faɓe' ɓe mo mgbai ɓǝɓe' ɓe me joŋ daŋ nai ne? 7 Mo tǝ ɓe, me ka ne ɓǝɓe' ya, so dǝɓ ma gak ǝ̃ǝ me jol ɓo kǝka.
8 Jol ɓo ye joŋ me, zyeɓ me, so zǝzǝ̃ǝ jol matǝ vaŋno ko ye jin ɓo ka muŋ me. 9 Mo foo, mo joŋ me ne vuuri, mo so tǝ ga jin me ga pǝ vuu sǝr faɗa. 10 Amo nyi swah nyi pa ɓe ka byaŋ me, amo ye joŋ me joŋ pǝ'man ɓǝr ma ɓe. 11 Amo ye zyeɓ suu ɓe ne woiŋ, mo so ɓoo sǝ̃ǝ ge tǝ woiŋ mo jee nǝǝ ge gŋ, mo so ɓoo wak ge tǝl ahe. 12 Amo joŋ gboŋgboŋ wo ɓe mo nyi cee nyi me, amo ye tǝ byak me ne cee. 13 Amma zǝzǝ̃ǝko me tǝ ɓe, daga cok ah sǝ, mo no ne ɓǝ foo ma tǝsyeɓ ah ka ɓe. 14 Amo kaa ɓo tǝ byak ka ẽere, ka me kal joŋ faɓe' ɓe, ka mo zyii rõm me ka. 15 'Manna, me kal joŋ faɓe' ɓe, ka me lwaa gaɓ jol ɓo ɓe, amma ne cok me joŋ fan matǝ njaŋ ah ɓo ɓe, me ka gak ɓaŋ tǝtǝl ga sǝŋ ya, ame lwaa gaɓɓe, swãa ren me. 16 Me kal ɓaŋ tǝtǝl ɓe ge sǝŋ biŋ ɓe, mo kyeɓ mor ɓe tǝgbana ɓol moo kyeɓ mor nǝǝ, amo joŋ dǝǝbǝǝri ɓo ka cuu bone nyi me ne ko. 17 Cẽecẽe mo no ne za ma faa ɓǝɓe' tǝtǝl ɓe, kpãh ɓo mo ɓaŋ ɓo tǝ ɓe, a ga pelle, ga pelle.
18 Masǝŋ, mo soɓ me byaŋ mor fẽene? Kǝnah me wǝ ɓo kǝpel ka za kwo me ya ba. 19 Me byaŋ kǝnah gin ɓǝr ma ɓe sǝ mo ciira me, ka me yea sǝŋ ka, mai ka a pǝsãhe. 20 Zah'nan cee ɓe ka biŋ nai to ya ne? Mo soɓ me o, mo soɓ me laa pǝ'nyah ɗao. 21 Me tǝ yah kal gwari, me ka jin ge fahfal kpee yao, me ga pǝ cokfuu mai za wul mo gŋ. 22 Pǝ cok ah cokfuu gŋ, cokfuu matǝ kurum kurum tǝkine ɓǝ ma nǝǝ zahzyil ye gŋ to, pǝ cok ah cokfãi gŋ tǝgbana suŋni.
© Bible Moundang © Alliance Biblique du Tchad, 1996.
